LOKE HÓBEN SA PUNTRA
Kiko Mi Tin Ku Tene Kuenta Kuné Ora Mi Ta Manda Mensahe?
:-) Mandamentu di mensahe por yuda bo keda den kontakto ku bo amigunan.
:-( Mandamentu di mensahe por kaba ku bo amistatnan i daña bo reputashon.
Den e artíkulo akí lo bo haña sa dikon ta importante pa sa
Tambe den e artíkulo akí tin:
Pa ken bo ta manda mensahe
Hopi hóben ta pensa ku ta imposibel pa biba sin manda mensahe. Ora bo ta manda mensahe, bo por keda den kontakto ku tur hende den bo lista di kontakto esta, basta bo mayornan no ta kontra di esei.
“Mi tata no ta gusta pa ami ku mi ruman muhé papia ku mucha hòmber. Si nos hasi esei mes, e mester ta na telefòn di kas den sala kaminda tin otro hende tambe.”—Lenore.
Bo mester sa ku si bo duna ken ku ta bo number, bo por haña bo den problema.
“Si bo no paga tinu ken tin bo number, bo por haña mensahe òf potrètnan ku bo no ke.”—Scott.
“Si un mucha hòmber ta manda mensahe tur ora bai pa un mucha muhé, òf visevèrsa, ta hopi fásil pa haña sintimentu pa e hende ei.”—Steven.
Beibel ta bisa: “Hende sabí ta mira peliger i ta evit’é.” (Proverbionan 22:3, Beibel na papiamentu koriente) Si for di promé bo tuma sierto medida, bo por spar bo mes di hopi doló di kurason.
Historia di bida real: “Ami ku un mucha hòmber tabata amigu i nos tabata manda hopi mensahe pa otro. Mi a bisa mi mes ku nos ta gewon hopi ‘close’ ku otro. Mi no a pensa ku lo tabata un problema te ku un dia el a bisa mi ku el a kuminsá gusta mi. Awor mi a realisá ku mi no mester a sali hopi kuné i manda asina tantu mensahe p’e.”—Melinda.
Pensa riba esaki: Kon Melinda su amistat ku e mucha hòmber lo a kambia despues ku e mucha hòmber a bis’é di su sintimentunan?
Kiko por a bai otro? Kiko Melinda por a hasi otro pa e ku e mucha hòmber keda djis amigu i nada mas?
Kiko bo ta manda den mensahe
Ta masha fásil pa manda mensahe i ta leuk pa haña nan tambe. Pero, ta mesun fásil tambe pa un hende komprondé un mensahe na su manera.
Bo mester sa ku ora bo ta manda mensahe, un hende por komprondé bo robes.
“Ora di manda mensahe, ta difísil pa sa ku ki emoshon òf tono e hende ta papia, asta ora e ta usa emoticons. Esei por hiba na mal komprondementu.”—Briana.
“Mi konosé mucha muhé ku a daña nan reputashon i ku ta konosí komo mucha muhé ku ta gusta flirt ku mucha hòmber; bo ta mira esei na e tipo di mensahenan ku nan ta manda.”—Laura.
Beibel ta bisa: “Hende hustu ta pensa promé kiko e kontestá.” (Proverbionan 15:28, Beibel na papiamentu koriente) Kiko nos por siña for di esei? Promé ku bo manda bo mensahe, lesa bon kiko bo a skirbi.
Ki ora bo ta manda mensahe
Bo mes por traha bo reglanan ora ta trata di mandamentu di mensahe; na moda di papia, bo ta forma bo propio etiketa den mandamentu di mensahe.
Bo mester sa ku ta importante pa bo tin regla ora di manda mensahe; sino por parse ku bo ta un hende sin manera, i hende lo kita pia for di bo.
“Ta fásil pa lubidá bo reglanan ora bo ta manda mensahe. Tin bes mi ta papia ku un hende òf sinta kome i na mes momento mi ta manda mensahe.”—Allison.
“Ta peligroso pa stür i manda mensahe. Si bo kita bo bista for di riba kaminda, bo por kousa un aksidente.”—Anne
Beibel ta bisa: “Tin un tempu stipulá pa tur kos, . . . un tempu pa keda ketu i un tempu pa papia.” (Eklesiástes 3:1, 7, Beibel Santu) Esei ta konta tambe pa lesamentu i mandamentu di mensahe.
Teps
Pa ken bo ta manda mensahe
;-)Obedesé e reglanan di bo mayornan.—Kolosensenan 3:20.
;-) No duna ken ku ta bo number. Na un manera nèchi, nenga di duna bo informashon personal, manera number di telefòn. Asina bo por siña bisa “nò,” i esei lo yuda bo tambe komo adulto.
;-) No bira muchu familiar ora bo ta manda mensahe pa otro hende no pensa ku ta flirt bo ta flirt ku nan. Nan por kere ku ta gusta bo ta gusta nan, i esei hopi biaha ta hiba na frustrashon i tristesa.
“Mi mayornan a mira ku mi ta usa mi telefòn na un manera responsabel. P’esei nan ta konfia ku mi ta wak bon promé ku mi hinka un hende su number di telefòn den mi lista di kontakto.”—Briana.
Kiko bo ta manda den mensahe
;-) Promé ku bo kuminsá skirbi e mensahe, puntra bo mes: “Den e kaso aki ta bon pa manda un mensahe?” Kisas ta mihó pa hasi un yamada òf papia ku e hende personalmente.
;-) No skirbi kos den e mensahe ku lo bo no a bisa e hende personalmente. Sarah di 23 aña ta bisa: “Si bo no por bis’é ku boka, bo no mester mand’é via mensahe tampoko.”
“Si un hende ta manda bo potrèt provokativo, bisa bo mayornan. Esei lo ta un protekshon pa bo i nan lo konfia bo mas.”—Sirvan.
Ki ora bo ta manda mensahe
;-) Disidí adelantá ki ora lo bo no usa bo selular. Un mucha muhé ku yama Olivia ta bisa: “Mi no tin mi telefòn huntu ku mi ora mi ta na mesa pa kome òf ora mi ta studia. Durante nos reunionnan kristian mi ta pag’é, pa mi no sinti mi tentá pa wak e kada ratu.”
;-) Tene kuenta ku otro hende. (Filipensenan 2:4) No manda mensahe ora bo ta kòmbersando ku un hende.
“Mi a pone regla pa mi mes. Por ehèmpel, mi no ta manda mensahe ora mi ta ku mi amigunan, a ménos ku ta algu hopi importante. Tampoko mi no ta duna hende ku mi no konosé bon mi number.”—Janelly.