Kiko Mi Por Hasi si Hende Ta Papia Riba Mi?

Dikon bo ta sinti bo di hùrt

Tin biaha, pa malu hende ta papia riba bo òf nan ta hasi redu djis pa daña bo reputashon; podisé nan ta konta algu ku no ta bèrdat. Pero asta ora e papiamentu no ta ku mal intenshon, tòg e ta hùrt, foral si ta un amigu òf amiga ta esun ku a papia riba bo.​—⁠Salmo 55:12-14.

“Mi a haña sa ku un amiga di mi tabata papia riba mi tras di mi lomba. E tabata bisa ku mi ta egoista, ku mi no tin kunes ku otro hende. Esei a hùrt mi masha hopi! Mi no por a komprondé dikon e tabata bisa e kos ei.”​—Ashley.

Konklushon: Niun hende no gusta pa otro hende papia malu di nan, sea ku e persona ku ta papia malu di nan ta un bon amigu òf nò.

E mal notisia: No ta semper bo por evitá ku hende ta papia riba bo

Hende ta papia riba otro hende pa vários motibu. Algun motibu ta:

Pasobra nan ta interesá den otro hende. Hende gusta ta den kompania di otro hende. Pues, ta masha normal pa nos papia ku otro hende (i tokante otro hende). Bon mirá, Beibel ta animá nos pa mustra interes den otro hende.​—⁠Filipensenan 2:4.

“E tópiko di mas interesante pa papia ariba semper ta hende!”​—Bianca.

“Mi mester atmití ku mi gusta sa kiko ta pasando ku otro hende, i pa despues mi konta otro hende loke mi a haña sa. Mi no sa dikon, pero gewon mi gusta esei.”​—Katie.

Pasobra nan ta sinti nan mes laf. Den tempu di Beibel, tabatin hende ku “tabata pasa tur nan tempu liber kontando algu nobo òf skuchando algu nobo.” (Echonan 17:21) Awe ta meskos!

“Tin biaha, no tin nada interesante ta pasa. E ora ei, tin hende ta inventá kos pa nan por tin algu di papia riba dje.”​—Joanna.

Pasobra nan ta sinti nan insigur di nan mes. P’esei mes Beibel ta spièrta nos pa no kompará nos mes ku otro hende. (Galationan 6:4) Lamentablemente, tin hende ta papia malu di otro hende pa asina purba di skonde ku nan ta sinti nan mes insigur òf inferior na otro hende.

“Ora hende ta kana papia kos malu di otro hende, esei ta mustra kiko tin den kurason di e hasidónan di redu ei. Hopi biaha, esei ta mustra ku nan ta envidiá e persona ku nan ta papia malu di dje. Nan ta plama rumor falsu pa nan por sinti nan mes bon, sí, pa konvensé nan mes ku nan ta mihó ku e persona ku nan ta papia malu di dje.”​—⁠Phil.

Konklushon: Sea bo gusta òf laga, semper hende lo papia riba otro hende, i esei ke men ku nan lo papia riba bo tambe.

E bon notisia: Tin kos ku bo por hasi pa trata ku e situashon

Probablemente, bo no por evitá ku hende ta papia riba bo, pero tin algu sí ku bo por hasi: Bo por kontrolá kon lo bo reakshoná. Si bo haña sa ku hende ta papia riba bo, tin por lo ménos dos kos ku bo por hasi.

OPSHON 1: No hasi kaso di loke ta ser bisá. Hopi biaha, e mihó solushon ta djis legumai e asuntu, foral si loke ta ser bisá ta ko’i kèns. Sigui e konseho di Beibel: “No sea lihé pa rabia.”​—⁠Eklesiástes 7:9.

“Hende tabata bisa ku mi ta frei un mucha hòmber ku ni sikiera mi konosé! E kos ei tabata asina ridíkulo ku gewon m’a keda hari.”​—⁠Elise.

“E mihó defensa kontra redu ta un bon reputashon. Asta si un hende plama un rumor hopi fèrfelu tokante bo, ta masha poko hende lo hasi kaso di esei si bo tin un bon reputashon. Bèrdat semper ta sali na kla.”​—⁠Allison.

Tep: Si bo tin problema pa legumai e asuntu, skirbi loke hende a kana bisa di bo i kon bo a sinti bo. Beibel ta bisa: “Loke bo tin di bisa, bis’é den bo mes.” Kisas despues di hasi esei, ta mas fásil pa bo lubidá e asuntu.​—⁠Salmo 4:4.

OPSHON 2: Papia ku e persona ku a kuminsá ku e redu. Kisas bo ta sinti ku e kos ku nan a bisa di bo ta asina serio ku bo mester papia ku e persona ku a kuminsá ku e redu.

“Si bo papia ku e persona ku ta papia riba bo, e persona ei ta siña ku ora e papia riba hende, e hende ku tempu lo haña sa esei. Es mas, esei por resolvé e problema i trese pas entre boso.”​—⁠Elise.

Pero, promé ku bo bai papia ku un hende ku a papia riba bo, lo ta bon pa bo repasá e siguiente prinsipionan di Beibel i hasi bo mes e preguntanan ku ta kompañá nan.

• “Ta bobedat pa respondé promé ku bo kaba di skucha.” (Proverbionan 18:13) ‘Di bèrdat mi tin tur detaye? E persona ku a bin konta mi loke ta ser bisá a komprondé e kos bon?’

• “Tur hende mester ta kla pa skucha, slo pa papia, slo pa rabia.” (Santiago 1:​19) ‘Awor ta e mihó momento pa papia ku e persona? Lo mi por papia na un manera kalmu tokante e asuntu? Òf mihó mi warda te ora mi ta mas trankil?’

• “Trata otro hende den tur kos meskos ku bo ke pa nan trata bo.” (Mateo 7:​12, BPK) ‘Si ta ami tabata esun ku a bisa algu, kon lo mi ke pa e persona bin papia ku mi? Na ki momento i na unda lo mi preferá pa e hasi esei? Kon lo mi gusta pa e trata e asuntu ku mi?’

Tep: Promé ku bo bai papia ku e persona, skirbi loke bo tin pensa di bis’é. Kaba, laga un òf dos siman pasa, i bolbe lesa loke bo a skirbi pa wak si tin algu ku bo mester kambia. Ademas, bo por konta un di bo mayornan òf un amigu òf amiga madurá loke bo tin pensá di hasi, i bo por pidi nan konseho.

Konklushon: Hopi kos den bida, bo no tin kontrol riba dje. Un di nan ta ku hende lo papia riba bo. Pero loke sí bo tin kontrol riba dje ta e manera ku abo lo trata ku e situashon.