For Di Nos Lectornan
Jesus Su Barba Den boso seri “Jesus—Con Su Aparencia Tabata di Berdad? Kico E Ta Awor?” (8 di december 1998), boso plachinan ta sugerí cu Jesus a desobedecé e ley cu a declará na Levítico 19:27: “Boso no mag corta boso cabei tur rond na banda corticu, i bo no mag destruí e punta di bo barba.” Di con boso plachinan no ta mustr’é cu su cabei na banda sin corta?
C. S., Inglatera
Evidentemente Dios a duna e ley aki pa prevení e hudiunan di corta nan barba of cabei den un manera cu lo a imitá cierto prácticanan pagano. Sin embargo, e mandamentu di Dios no tabata kier men cu e hudiunan absolutamente no tabatin mag di corta nan barba of cabei di cara. E relato na 2 Samuel 19:24 ta indicá cu hombernan hudiu normalmente “a atendé,” esta corta, nan cabei di cara. Te na ki grado nan a haci esei a dependé probablemente dje custumber cu a prevalecé. Evidencia arkeológico ta indicá cu atrabes di siglonan e hudiunan a usa un variedad di estilo di barba. P’esei nos plachinan artístico di Jesus cu barba corticu i pareu i banda di cabei cortá ta na armonia cu e evidencia.—RED.
Impacto di Asteroide Den e edicion di 8 di februari 1999, tabatin un artículo titulá “Asteroide, Cometa i Tera Ta Bai Dal den Otro?” Masha danki pa e artículo aki. El a duna un splicacion creibel dje posibel menasanan pa tera. Danki na Jehova, ningun desaster no a tuma lugá. Mi a apreciá e manera franco i onesto dje artículo.
O. R., Finlandia
Dios Ta Existí Mi no por describí con bon mi a haña e seri “Di Berdad Dios Ta Existí?” (8 di februari 1999) E artículonan a mustra mi ta ken ta e Dios cu mi a tende asina tantu di dje, pero cu mi no por a haña. Di profundo di mi curason mi ta yama danki pa iluminá e caminda di berdad pa hende manera ami.
C. P., Brazil
Redu Masha danki pa e artículo “Hóbennan Sa Puntra . . . Ki Malu Tin den Haci Redu?” (8 di mart 1999) Poco tempu pasá, ora un hende a plama e rumor cu ami lo ta e siguiente persona expulsá for dje congregacion, mi a haña sa personalmente con doloroso redu por ta. E mentira ei sí a haci dolor! E persona responsabel a pidi despensa, pero mi no tin confiansa den dje mas.
R. M., Suisa
Na mi scol redu ta plamá, pues e artículo a animá i fortalecé mi mashá. Mi tin bergwensa di bisa cu mi a yega di haci redu pa crea un mal impresion di otro hende. I ora mi amiganan a papia riba otro hende, mi a scucha nan i asta a tuma parti den e combersacion. P’esei ora mi tabata lesa e artículo, mi a keda di shok i a sinti cu cada frase tabata consehá mi tocante net loke mi tabata haci. Mi tin masha bergwensa di tur e redunan cu mi a haci. Mi sa cu lo sigui tin redu na mi scol, pero mi ta decididu pa ta suficiente fuerte pa ami no ta parti di dje.
M. W., Hapon
Carta pa Mayornan Mi a ser animá mashá dor dje artículo “Un Carta Special pa Nan Mayornan.” (8 di mart 1999) Ta loke ami lo mester a skirbi mi mes mayornan. Nan tabata bon ehempel den asistí na reunion cristian, ser regular den e ministerio i mustra hospitalidad. Mi tata tabata sirbidó ministerial; lo e mester tabata hopi ocupá cu debernan di congregacion. Tog, hopi bes el a planea recreo pa nos, i nunca nos no a envidiá nos compañeronan di scol. El a muri den un accidente di tráfico biniendo cas for di un congreso cristian, i nos bida a cambia drásticamente. Pero ora mi corda su estilo di bida di pone e Reino promé, i e fe di mi mama, mi ta ser impulsá pa sigui sirbi Jehova.
S. K., Hapon