Kreashon òf Evolushon?​—Parti 4: Kon Mi Por Splika Ku Mi Ta Kere den Kreashon?

Bo por!

Bo por pensa: Un mucha muhé ku yama Danielle a sinti ku e no tabata sufisiente sabí pa papia tokante siensia i evolushon. E ta bisa: “Mi no tabata gusta e idea di bai kontra di mi maestro i kompañeronan di klas.” Diana tambe ta di akuerdo i ta bisa: “Ora nan tabata papia ku mi usando términonan sientífiko, nan a laga mi keda tur konfundí.”

Pero, kòrda ku bo meta no ta pa gana un debate. I bo no tin nodi di sa tur kos di siensia pa splika dikon abo ta haña ku ta lógiko ku e universo tin un Kreador.

Tep: Usa e lógika simpel ku ta pará skirbí na Hebreonan 3:4: “Ta hende a traha tur kas, ma esun ku a traha tur kos ta Dios.”

Un hóben ku yama Carol ta rasoná asin’akí riba e prinsipio di Hebreonan 3:4: “Imaginá bo ta kana den un mondi será hopi leu for di sivilisashon. Diripiente bo ta mira un toothpick bentá abou. Na ki konklushon bo ta yega? Mayoria hende lo pensa: “Un hende mester a pasa aki banda.” Si algu asina chikitu i insignifikante manera un toothpick ta evidensia di bida inteligente, kuantu mas ta e universo i tur loke tin den dje!”

Si un hende bisa: “Si kreashon ta un realidat, ta ken a krea e Kreador anto?”

Bo por kontestá: “Djis pasobra nos no ta komprondé tur kos tokante e Kreador no ta nifiká ku e no ta eksistí. Por ehèmpel, podisé bo no sa tur kos tokante e persona ku a diseñá bo telefòn, pero bo sa sigur si ku ta un hende a diseñ’é, no ta bèrdat?” [Permitié kontestá] “Ta bèrdat ku tin kos ku nos no ta komprondé tokante nos Kreador, pero tin hopi kos ku nos sa sí. Si bo ke sa mas, lo mi ta kontentu pa konta bo loke ami a siña tokante dje.”

Prepará bon

Beibel ta bisa ku bo mester ta ‘kla pa defendé bo mes dilanti di ken ku ke sa motibu di e speransa ku bo tin; pero hasi esaki na un manera suave i ku rèspèt profundo.’ (1 Pedro 3:15) P’esei, ta importante pa bo sa kiko bo ta bisa i kon bo ta bis’é.

1. Kiko bo ta bisa. Bo amor pa Dios ta importante i por motivá bo pa defend’é. Pero djis bisa otro hende kuantu bo ta stima Dios podisé no ta bai konvensé nan ku Dios a krea tur kos. Kisas ta mihó pa usa ehèmpelnan di naturalesa pa mustra dikon ta lógiko pa kere den kreashon.

2. Kon bo ta bis’é. Mustra ku bo ta sigur di bo mes, pero no hasi kos di mal manera ni rebahá otronan. Hende ta mas dispuesto pa skucha bo punto di bista si bo ta papia na un manera respetuoso di loke nan ta kere aden i rekonosé ku nan tin e derecho pa saka nan mes konklushon.

   “Ta importante pa no ofendé e otro persona ni hasi manera bo ta un ‘sabe-lo-todo.’ Lo bo no logra nada si e sinti ku bo ta rebah’é.”​—Elaine.

Loke por yuda bo splika bo kreensia

Un hóben ku yama Alicia ta bisa: “Si nos no ta prepará, nos lo por preferá di keda ketu pa evitá ku nos ta pasa bèrgwensa.” Pues, preparashon ta hopi importante. Jenna ta bisa: “Mi ta sinti mi hopi mas kómodo pa papia tokante kreashon si mi a pensa adelantá riba un ehèmpel simpel pero bon pensá.”

Unda bo por haña ehèmpelnan asina? Hopi hóben tabatin éksito ora nan a usa lo siguiente:

• E foyeto Bida Ta Obra di un Kreador?

• E foyeto El origen de la vida. Cinco cuestiones dignas den análisis.

• E vidio Las maravillas de la creación revelan la gloria de Dios (vidio)

• E seri “Kasualidat òf Diseño?” den e revista Spièrta! (Riba BIBLIOTEKA ONLINE Watchtower yena den e opshon di buska (ku komia) “kasualidat òf diseño?”)

• Usa BIBLIOTEKA ONLINE Watchtower pa hasi investigashon adishonal.

Tambe bo por haña informashon útil den e artíkulonan anterior di e seri “Kreashon òf Evolushon?”

1. Parti 1: Dikon Mi Por Kere den Dios?

2. Parti 2: Mi Mester Kere den Evolushon?

3. Parti 3: Dikon Mi Por Kere den Kreashon?

Tep: Skohe ehèmpelnan ku ta konvensé abo; asina lo ta mas fásil pa bo kòrda nan i lo bo por splika nan ku konvikshon. Purba train adelantá kon lo bo splika loke bo ta kere aden.