LOKE HÓBEN SA PUNTRA
Kiko Mi Manera di Bisti Ta Bisa di Mi?
Dikon ta bon pa paga tinu na loke bo ta bisti? Pasobra nos manera di bisti ta bisa algu di nos. Kiko bo manera di bisti ta bisa di bo?
Tres eror grandi tokante moda i kon bo por evitá nan
Eror #1: Laga e medionan di komunikashon bisa bo kon bo mester bisti.
Un tiner ku yama Theresa a bisa: “Tin biaha, mi ta gusta un sierto paña pasobra nan ta hasi hopi propaganda tokante e paña. Ora bo mente ta yen di imágen di hende ku un sierto paña bistí, por ta difísil pa keda sin sigui e moda ei.”
Propaganda no ta afektá mucha muhé so. E buki The Everything Guide to Raising Adolescent Boys ta bisa ku mucha hòmber tambe tin tendensia di sigui moda. For di tempu nan ta mucha, hopi kompania ta pone propaganda pa atraé nan.
Un mihó opshon: Beibel ta bisa: “E hende simpel [òf, sin eksperensia] ta kere tur kos, ma e hòmber prudente ta wak bon unda e ta bai.” (Proverbionan 14:15) E prinsipio di Beibel ei ta siña bo pa wak bon kiko e propagandanan ta purba di bisa bo. Por ehèmpel, ora un propaganda pa un sierto paña ta bisa ku e paña ta sèksi, puntra bo mes:
‘Ken realmente ta benefisiá si mi sigui e moda akí?’
‘Kiko e paña akí lo bisa di mi estilo di bida?’
‘E paña akí lo mustra realmente ken mi ta i kiko mi ta kere?’’
Konseho: Pa un siman, presta bon atenshon na e propagandanan di paña i otro medio di komunikashon ku ta papia di moda. Ki estilo di bida nan ta promové? Bo ta kere ku na fini manera nan ke influensiá bo pa sigui sierto moda? Un tiner ku yama Karen a bisa: “Mi ta sinti ku e hóbennan tin un preshon enorme pa nan aparensia ta perfekto, pa bisti perfekto i pa nan tin un kurpa perfekto. Pa e kompanianan ku ta hasi propaganda ku sa esei, e hóbennan ta bira un blanko fásil.”
Eror #2: Skohe pa bisti na un manera djis pa pas den un grupo.
Un tiner ku yama Manuel a bisa: “Si un sierto paña ta na moda, tur hende ta bai bisti e paña ei. Si bo no bisti asina, hende lo papia malu di bo.” Un tiner ku yama Anna tambe ta di akuerdo ku esei. El a bisa: “Loke ta importante no ta pa bo djis bai ku moda, sino pa bo grupo di amigu aseptá bo.”
Un mihó opshon: Beibel ta bisa: “Stòp di laga e mundu akí forma boso.” (Romanonan 12:2) Ku e konseho ei na mente, pasa den e pañanan ku bo tin den kashi i puntra bo mes:
‘Kiko ta pone mi skohe loke pa bisti?’
‘Mi ta haña ku ta importante pa bisti paña di marka?’
‘Mi ke impreshoná hende ku mi manera di bisti?’
Konseho: En bes di wak djis dos opshon—paña ku ta na moda (i ku ta ser aseptá) òf paña ku no ta na moda mas (i ku ta ser rechasá)—pensa riba un di tres opshon: tin konfiansa den bo mes. Ora bo tin mas konfiansa den bo mes, lo bo no preokupá mashá ku loke hende ta bisa.
Eror #3: E pensamentu: ‘Mas sèksi un paña ta, mas mihó e paña ta.’
Un mucha muhé ku yama Jennifer a bisa: “Pa ser onesto, tin biaha, mi tin gana di bisti paña un poko provokativo; por ehèmpel, bisti algu kòrtiku, pèrtá òf mas sunú.”
Un mihó opshon: Beibel ta bisa: “No laga boso adorno ta di pafó so . . . ma laga esei ta e hende ku boso ta di paden.” (1 Pedro 3:3, 4) Ku e konseho ei na mente, pensa riba loke lo ta mas atraktivo—paña ku ta hala hende su atenshon òf ser un bon hende.
Konseho: Loke ta hasi bo mas atraktivo ta ser modesto. Ta bèrdat ku awendia esei no ta un kualidat masha popular, pero pensa riba esaki:
Bo a yega di papia ku un hende ku ta papia hopi i ku mayoria di biaha e ta papia di su mes? Loke ta mas tristu ta ku e persona ei no sa mes ku e ta alehá hende for di dje!
Paña ta manera e kòmbersashonnan ku nos tin. Si bo pañanan i bo kòmbersashonnan ta pa hala atenshon na bo mes, hende lo alehá di bo
Ora bo ta bisti na un manera indesente, lo bo haña e mesun reakshon. Ora bo paña ta manda e mensahe ‘mira mi aki,’ esei por laga parse ku bo ta insigur di bo mes òf ku bo ta sinti bo masha kos, òf tur dos kos. Esei por laga parse tambe ku bo ta desesperá pa haña atenshon, kisas asta atenshon di hende robes.
En bes di duna e impreshon di ta un persona ku bo no ta, purba di ta modesto. Un tiner ku yama Monica a bisa: “Bisti na un manera modesto, òf simpel, no ta nifiká ku bo tin ku bisti manera bo wela. Mas bien, e ta indiká ku bo respetá bo mes i otro hende.”