E Promesa pa Keda Bírgen Ta Yuda?

Kiko e promesa pa keda bírgen ta enserá?

E ta enserá primintí verbalmente òf por eskrito ku bo ta apstené di relashon seksual te ora bo kasa.

E promesa pa keda bírgen a bira popular den añanan ’90 ora ku e Kongreso di Iglesia Boutista di Zùit na Merka a lansa un programa titulá “Amor Berdadero Ta Warda.” E programa akí ta stimulá hóbennan pa sigui normanan di Beibel i bisa nò na sèks promé ku matrimonio, meskos ku hopi otro hóben a hasi kaba.

Djis despues, un programa similar a kuminsá kaminda nan a duna e presentenan ku a hasi e promesa pa keda bírgen un renchi di plata ku ta simbolisá (i kòrda nan riba) nan promesa pa apstené di relashon seksual te ora nan kasa.

Hende ta kumpli ku e promesa pa keda bírgen?

E kontesta ta dependé di ken bo puntra.

• Segun e investigadónan Christine C. Kim i Robert Rector, “vários estudio a mustra ku pa hopi hóben e promesa pa keda bírgen ta nifiká baha man na aktividat seksual komo teenager òf kuminsá tene relashon seksual mas lat den bida.”

• Un investigashon publiká pa e Instituto Guttmacher ta mustra ku “hóbennan ku ta ‘primintí pa keda bírgen’ tin mes tantu chèns pa hasi sèks ku esnan ku no a hasi e promesa ei.”

Dikon e resultadonan ta kontradiktorio?

• Algun estudio ta kompará hóbennan ku a primintí pa keda bírgen ku hóbennan ku no a hasi e promesa ei i ku no ta pensa meskos tokante sèks.

• Otro estudionan ta kompará hóbennan ku a primintí pa keda bírgen ku hóbennan ku no a hasi e promesa ei pero ku sí ta pensa meskos tokante sèks.

Kiko e último estudio ta mustra? Dr. Janet Rosenbaum, un spesialista den salú di hóbennan, ta bisa ku despues di sinku aña “no tin diferensia den e kondukta seksual di hóbennan ku a primintí pa keda bírgen i esnan ku no a primintí esaki.”

Un mihó opshon

E programanan di primintí pa keda bírgen tin bon meta. Pero e problema ta ku hóbennan no ta siña e normanan ku nan tin mester pa kumpli ku e promesa ei. Dr. Rosenbaum ta bisa ku hopi di e hóbennan ku ta primintí pa keda bírgen “no ta hasi e promesa akí algu di nan mes. Esnan ku ta disidí pa no hasi sèks promé ku matrimonio mester ta konvensí di esei i no djis pasobra nan ta partisipá den un programa.”

Beibel en bèrdat ta animá hende pa nan tin e tipo di konvikshon ei, no a base di un promesa skirbí òf verbal, sino dor di yuda nan usa nan ‘kapasidat di komprondé i asina entrená esaki pa distinguí loke ta bon for di loke ta malu.’ (Hebreonan 5:14) Al fin i al kabo, e idea di keda bírgen no ta djis un asuntu di evitá malesa i embaraso; e ta un manera pa mustra onor na e Kreador di matrimonio.​—Mateo 5:19; 19:4-6.

E normanan ku tin den Beibel ta pa nos mes bon. (Isaías 48:17) Tur hende, sea kual sea nan edat, por kultivá e forsa nesesario pa obedesé e mandamentu di Dios pa “hui di fornikashon.” (1 Korintionan 6:18) Ora ku nan kasa, nan por tene relashon seksual i haña e plaser ku esei ta trese kuné, sin tin nodi di preokupá òf lamentá, loke hopi hende ta eksperensiá despues ku nan a hasi sèks promé ku matrimonio.