Birginidad—Pakico?

“E CULTO di birginidad”—esei ta loke Randall Balmer, profesor asociado di religion na Barnard College/Columbia University, ta yama un aparente inclinacion aumentante den hóbennan pa posponé actividad sexual te cu nan ta di mas edad.

No ta un sorpresa cu hopi animacion pa abstinencia sexual ta bini di organisacionnan religioso. “Pero,” segun Dr. Balmer, “e forsa impulsador tras dje culto di birginidad ta seglar i no religioso. E berdadero motivacion pa keda bírgen ta miedu, no miedu di castigu divino, sino miedu di un malesa fatal.” Pues, el a haci contraste entre “e culto di Bírgen Maria,” locual ta pinta abstinencia for di relacion sexual como un ideal religioso, i e “culto di birginidad,” cu ta presentá tal abstinencia mas tantu como un cuestion di salú.

Dr. Balmer ta sigui: “Un comentario tristu tocante e estado di religion den e década di 1990 ta cu e miedu di malesa ta producí moralidad. Guianan religioso ta asina ansioso pa no ofendé hende cu nan ta proponé un moralidad swak, of ningun mes. I p’esei ta keda pa científiconan i oficialnan di salubridad público consehá hóbennan tocante con pa hiba nan bida sexual.”

Sin embargo, esei no ta e caso cu berdadero cristian. Considerá Chad, un tiener criá como Testigo di Jehova. Un mucha muher di mundu a acerk’é i a cuminsá un combersacion. Pronto a sali na cla cu su intencion no tabata pa papia so. Chad ta bisa, “Di biaha mi a pensa. Mi no por a desapuntá Jehova. P’esei mi a bisa e mucha muher cu mi tabatin cu bai, teniendo presente cu mi semper tin cu agradá Jehova.”

Mescos cu Chad, hopi hóben cu ta Testigo di Jehova ta mantené moralidad excelente, no simplemente pa causa di bon salú sino primeramente pa agradá nan Creador, Jehova Dios. Miedu di malesa no ta loke ta producí nan moralidad. Mas bien, hóbennan asina ta sigui e conseho di Eclesiástes 12:1: “Corda, awor, bo Magnífico Creador den e dianan di bo hubentud.”