Duna Yudansa na Víktima di Desaster Natural

Na aña 2020 mundu a eksperensiá vários desaster natural i e pandemia COVID-19. Kon Testigunan di Yehova a yuda e hendenan ku a ser afektá?

Durante e aña di sirbishi 2020,a e Komité di Koordinadó di Kuerpo Gobernante a aprobá pa usa 28 mion dòlerb na yudansa pa desaster natural. Nan a yuda hopi ruman ku a bira víktima di kalamidat. Tabatin mas ku 200 kalamidat, entre otro, e pandemia COVID-19, vários siklon tropikal, inundashon na Afrika, skarsedat di kuminda na Venezuela i sekura na Zimbabwe. A usa e donashonnan ei pa paga kuminda, awa, lugá pa keda, paña i kuido médiko. Ademas, a kumpra produkto básiko pa limpiesa i material pa drecha i rekonstruí edifisio. Wak algun ehèmpel di trabou di ousilio.

COVID-19. E pandemia a afektá nos rumannan físikamente, emoshonalmente i finansieramente. Pa yuda e rumannan, mas ku 800 Komité di Ousilio a ser formá mundialmente. E komiténan akí a analisá e nesesidatnan di nos rumannan, i mesora nan a duna informe ku a yuda e Komité di Koordinadó disidí kon pa dirigí e trabou di ousilio mas mihó.

Durante e aña, e Komiténan di Ousilio a yuda hopi hende haña kuminda, awa, produkto di higiena i remedi. Den algun área, e Komiténan di Ousilio a traha huntu ku e ansianonan lokal pa yuda e rumannan haña yudansa di gobièrnu.

Hende ku no ta Testigu a tuma nota di nos trabou di ousilio. Por ehèmpel, komisario di e distrito di Nakonde na Zambia, Field Simwinga, a bisa e rumannan: “Nos ta masha gradisidu pa boso yudansa ku a bini nèt na tempu pa e famianan afektá.”

Skarsedat di Kuminda na Angola. E pandemia COVID-19 a pone ku no tabatin sufisiente kuminda na Angola; p’esei, e preisnan a subi bastante. Kada bes tabata mas difísil pa nos rumannan kumpra kuminda.

Sukursal di Brazil a ser aserká pa yuda i nan a manda pakete di kuminda pa nos rumannan na Angola. E rumannan a investigá kua tabata e mihó manera pa kumpra i manda kuminda pa despues kumpra kuminda na kantidat grandi. A paga mas o ménos 22 dòler pa kumpra i manda pakete. I kada pakete a kontené kasi 20 kilo di kuminda manera aros, bonchi i zeta pa kushiná. Te ku awe, a manda 33.544 pakete di kuminda, esta, un total di 654 tòn. Tur esaki, huntu ku otro produkto lokal a yuda alimentá mas ku 50.000 hende!

Kon e rumannan a sinti ora nan a haña e yudansa akí? Alexandre, ku ta biba na un parti isolá di Angola, a bisa: “Esaki a laga mi mira bon kla ku Yehova ta stima mi i ku mi no ta mi so. Mi ta importante pa e organisashon di Yehova!” Mariza, un mama soltero, a bisa: “Yehova a skucha mi orashon. Mi ta yama Dios i su organisashon danki!”

Sekura na Zimbabwe. Durante e aña di sirbishi 2020, Zimbabwe a hañ’é ku un sekura severo ku a laga miónes di hende kasi muri di hamber. Míles di Testigu na Zimbabwe no tabatin sufisiente kuminda.

A forma sinku Komité di Ousilio pa pèrkurá kuminda pa nos rumannan. Sentenáres di publikadó a yuda empaketá kuminda, hinka kuminda den trùk òf pone nan vehíkulo disponibel.c Durante e aña di sirbishi 2020, a usa 691.561 dòler pa alimentá mas ku 22.700 hende!

Den algun kaso, e rumannan a usa tur loke nan tabatin di kome te ora e yudansa a yega. E rumannan a gradisí Yehova ora e kuminda a yega. Algun di nan asta a kuminsá kanta kantika di Reino.

Dos ruman muhé biuda, ku ta biba den un sierto área, a bai un reunion den nan bario kaminda lo a papia di e yudansa ku un organisashon no-gubernamental ta duna (NGO). Pero, na e reunion nan a kuminsá papia di polítika. Pues, e rumannan a disidí ku nan no por aseptá e kondishonnan pa haña yudansa. Ora nan tabata saliendo for di e reunion, e hendenan a hasi bofon di nan i bisa: “Wak pa despues boso no bin pidi kuminda serka nos!” Sinembargo, djis dos siman despues, e rumannan ku a yega den e área ei a yuda e ruman muhénan ku kuminda. Esei tabata hopi mas promé ku e yudansa ku NGO a manda!

E trabou di ousilio a duna un bon testimonio na Zimbabwe. Wak e ehèmpel di Prisca, ku ta biba den un pueblito. Prisca tabata sali tur djárason i djabièrnè den sirbishi, apesar ku tabatin problema di sekura. Hende ku tabata biba den e pueblito ei tabata hasi chèrchi di dje. Nan tabata bisa: “Bo famia lo muri di hamber pasobra bo ta kana rònt ta prediká.” Prisca tabata kontestá: “Yehova nunka a laga su sirbidónan na kaya.” Poko tempu despues, el a haña un pakete di kuminda di nos organisashon. Esaki a impreshoná algun di su bisiñanan. Nan a bisa Prisca: “Dios nunka a faya ku bo, pues nos ke siña mas tokante dje.” Awor, shete bisiña ta skucha e reunionnan di kongregashon na radio.

Segun ku nos ta yega mas serka di e fin, nos lo sigui eksperensiá desaster natural. (Mateo 24:3, 7) Nos ta apresiá boso donashonnan generoso ku boso ta duna na diferente manera riba donate.jw.org. Asina, nos por duna yudansa nèt na ora na nos rumannan ku ta den nesesidat.