Timgad—Un Stat Skondí Yen di Sekreto
E EKSPLORADÓ yen di kurashi no por a kere su bista. Den e santu di e desierto di Algeria, el a topa ku un arko di triunfo romano! Na momento ku e eskoses James Bruce a hasi e deskubrimentu akí na aña 1765, e no por a imagin’é ku e tabata pará riba e ruinanan di e stat di mas grandi ku e romanonan a yega di traha na Nort Afrika: e antiguo Thamugadi, ku awe yama Timgad.
Mas ku un siglo despues, na aña 1881, arkeólogonan franses a kuminsá saka e ruinanan bon konserbá di Timgad for di bou di santu. Nan a yega na e konklushon ku maske e stat tabata keda den un region seku i desolá, tòg su habitantenan a disfrutá di un bida kómodo i luhoso. Pero kon bini e romanonan a disidí di establesé un kolonia próspero den un lugá asina? I kiko nos por siña for di e antiguo stat akí i su habitantenan?
UN AGÈNDA SKONDÍ
Ora ku e romanonan tabata kolonisá gran parti di Nort Afrika un 100 aña promé ku Kristu, algun tribu nomádiko a resistí nan ferosmente. Kon e romanonan lo por a trese trankilidat den e region? Na promé instante, e konkistadónan a usa e sòldánan di e Terser Legion di Ougusto pa traha vários fòrti i puesto di vigilansia den e region inmenso ei, yen di seru, i ku awe ta forma e parti nort di Algeria. Sinembargo, mas despues nan a traha e stat di Timgad ku un otro propósito.
Ofisialmente, e romanonan a traha Timgad pa veteranonan ku a baha ku penshon, pero nan berdadero intenshon tabata pa usa e stat pa debilitá e oposishon di e tribunan, i nan a logra nan meta tambe. E bida kómodo na Timgad a kuminsá atraé e hendenan di e region ora ku nan tabata bai den e stat pa bende nan merkansia. Pero ta siudadano romano so tabatin mag di biba den Timgad. Pues, hopi hende nortafrikano tabata dispuesto pa djòin e Legion Romano pa un periodo di 25 aña pa asina nan por a haña e siudadania romano tantu pa nan mes komo pa nan yu hòmbernan.
Algun afrikano no a keda konforme ku djis nan siudadania, i nan a logra okupá posishonnan haltu den Timgad i otro statnan kolonial. E plan astuto di e romanonan pa integrá e hendenan lokal tabata asina eksitoso ku, apénas 50 aña despues ku nan a funda e stat, mayoria di habitante tabata di Nort Afrika.
ROMA A KONKISTÁ KURASON DI E HENDENAN
Pilánan elegante di e marshe kaminda tabata pone stènt
Kon e romanonan a logra nan meta di konkistá e kurason di e afrikanonan? Wèl, na promé lugá nan a promové igualdat entre e siudadanonan, basá riba un idea di e polítiko romano Siseron. Tantu e veteranonan romano komo e siudadanonan di orígen afrikano a haña e mesun tantu tereno. Nan a parti e stat den blòknan di kas di 20 pa 20 meter, separá pa kayanan smal. Sin duda, e repartishon ordená i hustu akí a atraé e habitantenan.
Meskos ku den hopi otro stat romano, e habitantenan tabata topa otro na e foro, òf plenchi públiko, riba e dianan mas drùk di marshe pa tende último notisia òf pa hunga wega. E hendenan ku tabata biba den e serunan seku den bisindario kasi sigur a imaginá nan mes kaba kanando den sombra di e pasionan tur na pilá riba un dia kayente, òf relahando den un di e tantísimo lugánan di baña grátis ku tabatin. Tambe nan por a mira nan mes sintá ta kòmbersá ku nan amigunan banda di e fònteinnan refreskante. Tur esaki mester a parse un soño pa nan.
Un piedra di graf ku e parti ariba dòrná ku diosnan trinitario
E teater na aire liber tambe a yuda e romanonan konkistá kurason di e hendenan. E teater akí por a akomodá mas ku 3.500 hende di e stat i di e pueblonan den serkania. E aktornan tabata presentá obranan teatral ku tabata yen di inmoralidat i violensia, e tipo di entretenimentu ku e romanonan tabata gusta.
E religion romano tambe a hunga un ròl den konkistá e kurason di e hendenan. E flur- i murayanan di e lugánan di baña públiko tabata dòrná ku mosaikonan kolorido ku tabata mustra esenanan di mitologia pagano. Komo ku bañamentu tabata un parti importante di bida diario, e habitantenan pokopoko a siña konosé e diosnan i religion romano. E intento pa integrá e afrikanonan den e kultura romano tabata asina eksitoso ku asta e piedranan di graf tabata dòrná ku diosnan trinitario afrikano i romano.
E STAT BUNITA TA PASA PA OLVIDO
Despues ku Emperador Trajano a funda e stat na aña 100 despues di Kristu, e romanonan a stimulá produkshon di grano, zeta di oleifi i biña den henter Nort Afrika. Den poko tempu, e área ei a bira e fuente prinsipal di e produktonan akí pa e imperio romano. Meskos ku e otro statnan kolonial, Timgad tambe a prosperá bou di e gobièrnu romano. Ku tempu, e poblashon a krese asina tantu ku e stat a ekspandé pafó di e murayanan fortifiká di Timgad.
Komèrsio ku Roma a hasi e habitantenan di e stat i e doñonan di tereno masha riku, miéntras ku e kunukeronan lokal no tabata haña masha ganashi. Den siglo 3 despues di Kristu, inhustisia sosial i belasting haltu a pone ku e kunukeronan a rebeldiá. Algun di nan ku a bira katóliko a djòin e donatistanan, un grupo religioso ku a lanta kontra e korupshon ku tabatin den Iglesia Katóliko.—Wak e kuadro “E Donatistanan No Tabata un ‘Iglesia Puru.’”
Despues di siglonan di konflikto religioso, guera sivil i invashon di e bárbaronan, Roma finalmente a pèrdè su kontrol riba Nort Afrika. Rònt di siglo 6, e tribunan arabir di e region a kima Timgad por kompleto, i e stat a pasa pa olvido pa mas ku 1.000 aña.
“TA ASINA TA BIBA ÒF LAGA!”
Un inskripshon na latin na e plenchi públiko ku ta bisa: “Yag, baña, hunga, hari. Ta asina ta biba òf laga!”
Na e plenchi públiko di Timgad, arkeólogonan a haña un inskripshon na latin ku a parse nan prèt. E inskripshon tabata bisa: “Yag, baña, hunga, hari. Ta asina ta biba òf laga!” Un historiadó franses a bisa ku e inskripshon akí ta “reflehá un filosofia di un bida sin muchu ambishon, pero ku pa algun hende ta ser konsiderá komo e yabi di sabiduria.”
De echo, e romanonan tabata biba segun e filosofia ei pa hopi tempu kaba. Apòstel Pablo, kende a biba den promé siglo, a papia di hende ku tabatin e siguiente filosofia di bida: “Laga nos kome i bebe, pasobra mañan nos ta muri.” Aunke e romanonan tabata religioso, nan a biba pa e plaser di e momento, sin pensa mashá riba e sentido òf propósito di bida. Pablo a spièrta e kristiannan pa tene kuidou ku hendenan asina. El a bisa: “No laga hende gaña boso. Mal kompania ta daña bon kustumber.”—1 Korintionan 15:32, 33.
Maske e hendenan di Timgad a biba un 1.500 aña pasá, kos no a kambia mashá. Hopi hende ta biba pa awe so. Pa nan, e mentalidat di e romanonan ta masha lógiko: disfrutá di bida awor, sin preokupá ku e konsekuensianan. Pero Beibel, en kambio, ta konsehá nos pa nos ta mas sabí. Komo ku “e mundu aki, manera nos konos’é awor, lo pasa bai,” e ta rekomendá nos: “Esnan ku ta trata ku asuntunan di mundu, [biba] komo si fuera nan no ta kompletamente okupá ku e kosnan ei.”—1 Korintionan 7:31, BPK.
E ruinanan di Timgad ta konfirmá ku e sekreto di un bida felis i ku propósito no ta basá riba e inskripshon ku a haña den e santunan di Nort Afrika. Mas bien, e ta basá riba e konseho ku nos ta haña den Beibel: “Mundu ta pasa bai i tambe su deseonan, ma esun ku ta hasi e boluntat di Dios ta keda pa semper.”—1 Huan 2:17.