BO TABATA SA?

Ki desafio Heródes a enfrentá ora e kier a rekonstruí e tèmpel na Herúsalèm?

Sálomon a traha e tèmpel riba un seru. El a traha muraya na e banda ost i banda wèst di e seru pa e terenonan rònt di e edifisio sagrado ei por a keda na un solo nivel. Heródes tabata ke un tèmpel mas mahestuoso ku esun di Sálomon, i p’esei el a disidí di remodelá i amplia e tèmpel ku tabata eksistí kaba.

E ingenieronan ku a traha pa Heródes a hasi e área nivelá na e parti nort di e tèmpel mas grandi pa por a rèk e pationan. Na e parti zùit, nan a rèk e área nivelá ku 32 meter. Pa logra esaki, nan a traha un seri di tùnel di piedra i muraya diki pa wanta e bandanan. Algun parti di e muraya akí tabata 50 meter haltu.

Heródes no tabata ke pa e proyekto pone e hudiunan sinti nan ofendí e hudiunan ni stroba e aktividat- òf sakrifisionan ku tabata tuma lugá den e tèmpel. E historiadó hudiu Hosefo a bisa ku Heródes a asta siña e saserdotenan hudiu kon pa hasi trabou di karpinté i mèslá pa hende no-outorisá no drenta den e partinan sagrado di e tèmpel.

Heródes a fayesé promé ku el a logra kaba ku e proyekto. Pa aña 30 despues di Kristu, ya nan tabatin 46 aña ta traha riba e proyekto. (Huan 2:⁠20) Ta e bisañetu di Heródes, Agripa II, a kompletá e trabou meimei di e promé siglo.

Dikon e habitantenan di Malta a kere ku apòstel Pablo tabata un asesino?

Algun habitante di Malta tabata bou di influensia di e konseptonan religioso di e griegonan. E buki di Echonan ta konta kiko a pasa despues ku un barku ku Pablo tabata ariba a noufragá dilanti di kosta di Malta. Ora el a bai tira palu seku riba un kandela ku nan a sende pa e hendenan ku tabata huntu kuné keinta nan kurpa, un kolebra venenoso a mord’é i keda kologá na su man. Ora e habitantenan a mira esei, nan a bisa: “Kasi sigur e hòmber akí ta un asesino, i aunke el a logra sali sano i salvo for di laman, Hustisia no ta lag’é sigui biba.”—⁠Echonan 28:⁠4.

E palabra griego pa “Hustisia” den e teksto akí ta “dike.” Maske dike por nifiká hustisia den un sentido general, den mitologia griego, Dike tabata nòmber di e diosa di hustisia. Nan tabata kere ku e diosa akí tabata wak kiko hende tabata hasi i informá Zeus di e aktonan di inhustisia ku a keda skondí pa asina e hendenan kulpabel haña kastigu. Pues, segun un dikshonario bíbliko, e habitantenan di Malta lo a pensa: “Maske Pablo a skapa for di morto riba laman, e tabata un hòmber marká pa haña kastigu serka e diosa Dike . . . via e kolebra.” Pero, nan a kambia di idea ora nan a mira ku nada no a pasa Pablo.