Berdadero Felicidad—Kico Ta e Clave?

TABATA e intencion pa hende ta felis. Pakico nos por ta sigur di esei? Wel, considerá e principio di hende.

Jehova Dios a crea e promé pareha humano cu e abilidad pa disfrutá di felicidad. El a pone Adam i Eva den un paradijs, un hofi di placer yamá Eden. E Creador a duna nan tur e cosnan físico necesario pa bida. E hofi tabatin “tur palu deseabel na bista di hende i bon pa cuminda.” (Génesis 2:9) Adam i Eva tabata salú, fuerte i bunita—nan tabata perfecto i berdaderamente felis.

Pero, kico tabata e clave pa nan felicidad? Esei tabata nan hogar paradísico of tal bes nan perfeccion físico? E donnan aki di parti di Dios en berdad a contribuí na nan goso den bida. Pero nan felicidad no a dependé riba cosnan palpabel asina. E hofi di Eden tabata mas cu un parke bunita. E tabata un santuario, un lugá pa adorá Dios. E clave pa nan felicidad eterno tabata nan abilidad pa establecé i mantené un relacion amoroso cu e Creador. Pa ta felis, nan mester tabata spiritual promé.—Compará cu Mateo 5:3.

Spiritualidad Ta Hiba na Felicidad

Inicialmente Adam tabatin un relacion spiritual cu Dios. Esei tabata un relacion amoroso i tierno mescos cu esun di un yu cu un tata. (Lucas 3:38) Den e hofi di Eden, Adam i Eva tabatin circunstancianan ideal cu a permití nan satisfacé nan deseo pa rindi adoracion. Dor di obedecé Jehova di buena gana i motivá pa amor, nan lo a duna Dios muchu mas onor i gloria cu e creacion animal lo por a duna. Dotá cu inteligencia, nan lo por a alabá Dios pa su cualidadnan maraviyoso i lo por a sostené su soberania. Tambe nan lo por a sigui ricibí Jehova su cuido tierno i amoroso.

E relacion íntimo aki cu e Creador i obedencia na su leynan a trece berdadero felicidad na nos promé mayornan. (Lucas 11:28) Adam i Eva no tabatin nodi pasa hopi aña ta purba diferente manera promé cu nan a descubrí e clave pa felicidad. For dje momento cu nan a ser creá nan tabata felis. E echo cu nan tabata na pas cu Dios i sumiso na su autoridad a haci nan felis.

Sin embargo, e felicidad ei a terminá na momento cu nan a desobedecé Dios. Dor di rebelá, Adam i Eva a kibra nan relacion spiritual cu Jehova. Nan no tabata amigu di Dios mas. (Génesis 3:17-19) Ta parce cu Jehova a corta tur comunicacion cu nan for dje dia cu el a expulsá nan for dje hofi. Nan a perde nan perfeccion, e prospecto di biba pa semper i nan hogar paradísico. (Génesis 3:23) Pero mas importante, como cu nan a perde nan relacion cu Dios, nan a perde e clave pa felicidad.

Nos Abilidad pa Scoge

Promé cu Adam i Eva a muri, nan a pasa nan característicanan humano, nan concenshi natural i e capacidad pa desaroyá spiritualidad na nan desendencia. E famia humano no a ser degradá n’e nivel di bestia. Contrario cu animalnan, nos por bira reconciliá cu e Creador. (2 Corintionan 5:18) Como criaturanan inteligente, hende ta sigui tin e capacidad pa scoge si e kier obedecé Dios of no. Esaki a ser ilustrá hopi siglo despues ora Jehova a duna e nacion recien formá di Israel e opcion di bida of morto. Mediante su bocero Moises, Dios a bisa: “Di berdad mi ta pone dilanti bo awe bida i loke ta bon, i morto i loke ta malu.”—Deuteronomio 30:15-18.

Asta awor, miles di aña despues cu e Paradijs original a bai perdí, nos como hende ainda tin e abilidad di tuma e decision corecto. Nos tin un concenshi cu ta funcioná i un capacidad básico pa obedecé e leynan di Dios. Bijbel ta papia di “e hende cu nos ta di paden.” (2 Corintionan 4:16; Romanonan 7:22) E expresion aki tin di haber cu e potencial inherente cu nos tur tin pa reflehá e personalidad di Dios, pa pensa e manera cu e ta pensa, pa ta spiritual.

En cuanto nos naturalesa i conciencia moral, apostel Pablo a skirbi: “Ki ora cu hende dje nacionnan cu no tin ley haci di naturalesa e cosnan dje ley, e hendenan aki, aunke nan no tin ley, ta un ley pa nan mes. Nan ta net esnan cu ta demostrá cu e substancia dje ley ta skirbí den nan curason, miéntras cu nan concenshi ta duna testimonio cu nan i, entre nan mes pensamentu, nan ta ser acusá of asta dispensá.”—Romanonan 2:14, 15.

Sabiduria Divino i Obedencia —E Clave

Pero un hende lo por puntra: ‘Si nos tur tin un inclinacion natural di adorá Dios i, como resultado, pa disfrutá di berdadero felicidad, pakico tin asina tantu infelicidad?’ Pasobra pa por ta felis, cada un di nos tin cu crece spiritualmente. Aunke originalmente hende a ser creá den e imágen di Dios, el a alehá for di su Creador. (Efesionan 4:17, 18) P’esei, cada un di nos tin cu dal pasonan definitivo pa establecé i mantené un relacion spiritual cu Dios. Un relacion asina lo no desaroyá automáticamente.

Jesus a describí dos principio importante cu por yudá bo desaroyá spiritualidad. Unu ta gana conocimentu exacto di Dios, i e otro ta someté bo mes obedientemente na su boluntad. (Juan 17:3) Citando e Palabra di Dios, Jesus a bisa: “Ta pará skirbí: ‘Hende mester biba, no di pan so, sino di tur expresion cu ta sali for dje boca di Jehova.’” (Mateo 4:4) Na un otro ocasion, Jesus a declará: “Mi cuminda ta pa mi haci e boluntad di esun cu a mandá mi i terminá su trabou.” (Juan 4:34) Nos no tin nodi dedicá hopi década ta purba diferente manera pa haña felicidad. Experencia no ta e clave pa felicidad. Mas bien, solamente sabiduria divino i obedencia na nos Creador por hiba na berdadero goso den bida.—Salmo 19:7, 8; Eclesiástes 12:13.

Un cos ta sigur, e felicidad cu ta bini dor di ehercé sabiduria divino i tin e aprobacion di Dios no ta fuera di nos alcanse. (Echonan 17:26, 27) E conocimentu di Jehova i di su propósito ta disponibel pa tur hende. Cu miles di miyones di ehemplar den hopi idioma, Bijbel ta sigui ta e buki mas ampliamente distribuí na mundu. Bijbel por yudá bo bira amigu di Dios i disfrutá di berdadero felicidad, pasobra e Scritura ta bisa nos cu “felis ta e pueblo kende su Dios ta Jehova!”—Salmo 144:15.

[Kuadro na página 6]

Pasonan Cu Ta Hiba na Felicidad

1. Duna balor na spiritualidad i cultiv’é. Jesus a bisa: “Felis ta esnan cu ta tende e palabra di Dios i ta ward’é!”—Lucas 11:28.

2. Reconocé cu e aprobacion di Dios ta mas importante cu rikesa of cosnan di luho. Pablo a skirbi: “Siguramente, e ta un medio di gran ganashi, e debocion piadoso aki huntu cu autosuficiencia. . . . Teniendo cuminda, paña i dak, nos lo keda contentu cu e cosnan aki.”—1 Timoteo 6:6-8.

3. Haci esfuerso pa cultivá i respondé na un concenshi bíblicamente entrená.—Romanonan 2:14, 15.

4. Determiná pa obedecé Jehova Dios, cualificando asina pa ta parti di su pueblo. David di antigwedad a skirbi: “Felis ta e pueblo kende su Dios ta Jehova!”—Salmo 144:15.

[Plachi na página 7]

“Felis ta esnan cu ta conciente di nan necesidad spiritual.”—Mateo 5:3