Un Karta di Kuerpo Gobernante
Kerido Kompañeronan Testigu di Yehova,
Ta un gran onor pa nos karga nòmber di e Soberano Universal, Yehova. E nòmber ei ta eterno, inkomparabel i ningun hende no por elimin’é. Yehova ta esun ku a duna nos e privilegio di por karga su nòmber, i spesialmente desde aña 1931 nos ta ser identifiká ku e nòmber distintivo ei. (Isa. 43:10) Nos ta sumamente orguyoso di por identifiká nos mes komo Testigu di Yehova.
Diabel ta keda buska manera pa eliminá e nòmber di Dios. Bou di su influensia e nashonnan ta menospresiá Yehova su nòmber. Babilonia e Grandi, e imperio mundial di religion falsu, ta odia e nòmber divino i a sak’é for di hopi tradukshon di Beibel. Pero Hesus sí a halsa e nòmber di su Tata i a dun’é e promé lugá den e orashon modelo ku el a siña su siguidónan. El a bisa: “Pues, hasi orashon anto asin’akí: ‘Nos Tata ku ta den shelu, bo nòmber sea santifiká.’ ” (Mat. 6:9) Despues, den un orashon sinsero na su Tata, el a bisa: “Mi a manifestá bo nòmber na e hendenan ku bo a duna mi for di mundu.” (Juan 17:6) Ya ku nos ke sigui e bon ehèmpel di Hesus, nos ta mas determiná ku nunka pa proklamá Yehova su nòmber yen di entusiasmo rònt mundu.
E teksto di aña 2009, “Duna testimonio kabal di e bon nobo,” a motivá nos pa kumpli ku nos ministerio plenamente. (Echo. 20:24, NW ) No kabe duda ku Yehova a bendishoná nos esfuersonan rikamente e aña di sirbishi ku a pasa. Yehova su pueblo a duna un tremendo testimonio rònt mundu pa e gloria i onor di Su nòmber. Un máksimo nobo di 7.313.173 publikadó a uni nan bosnan pa prediká na tur hende, i tambe pa siña esnan sinsero ku ta buska solushon pa e tantísimo problemanan ku nan ta enfrentá tur dia. E asistensia di 18.168.323 na e Konmemorashon di Kristu su morto ta indiká ku kisas miónes di hende mas por kuminsá invoká e nòmber di Yehova promé ku fin di e sistema di kosnan malu akí.
Tanten ku Yehova ta permití, nos lo sigui prediká e bon notisia di Reino ku entusiasmo, usando tur medio posibel pa alkansá hende den nos teritorio. (Mat. 24:14; Mar. 13:10) Sea ku nos ta prediká di kas pa kas, riba kaya, via karta i telefòn, òf informalmente, laga nos hasi esfuerso pa yuda mas tantu hende posibel konosé Yehova su nòmber i propósito.
Nos tin tur motibu pa kere ku Yehova lo aktua pronto pa santifiká su nòmber. (Eze. 36:23) E tempu ta aserkando rápidamente pa tur esnan ku ta difamá Dios su nòmber keda silensiá. Ki un glorioso dia esei lo ta pa tur e sirbidónan leal di Yehova ku a duna di konosé Su nòmber i ku a alabá su soberania universal!
Yehova su kuido amoroso pa su pueblo tabata bisto rònt mundu na e Kongreso di Distrito i Kongreso Internashonal 2009 “Keda Alerta!” E kongresonan ei a bira un parti importante den nos historia teokrátiko, motivando nos pa bira mas konsiente di e nesesidat di keda alerta pa Yehova su dia.—Mar. 13:37; 1 Tes. 5:1, 2, 4.
En bèrdat, Yehova ta bon pa nos tur; e ta yena nos kurason ku goso. E ta pone nos drumi den lugánan di yerba bèrdè i ta hiba nos kantu di awanan ketu.—Sal. 23:1, 2; 100:2, 5.
Boso por tin sigur ku Yehova lo sigui bendishoná boso segun ku boso ta sigui sirbié den e lunanan binidero!
Mashá kumindamentu pa henter nos hermandat mundial.
Boso rumannan,
Kuerpo Gobernante di Testigunan di Yehova