E Trabou di Mas Importante
1. Ki sakrifisionan nos apresio profundo pa sirbishi lo konmové nos pa hasi?
1 Dikon nos ta haña animashon regularmente pa dediká nos tempu, energia i rekursonan na e trabou di prediká? Pasobra no tin ningun otro trabou ku ta mas importante ku esei! Ora nos reflekshoná riba e benefisionan di largu alkanse, esei lo duna nos mas deseo pa partisipá den e trabou akí ku nunka mas lo ser ripití.—Echo. 20:24.
2. Kon nos ta yuda santifiká e gran nòmber di Yehova ora nos ta prediká?
2 Santifiká Yehova Su Nòmber: E trabou di prediká ta enfatisá ku e Reino di Yehova mediante Kristu Hesus lo remplasá tur gobièrnu humano i solushoná tur e problemanan di humanidat. (Mat. 6:9, 10) Lo ta bisto ku Yehova ta e úniko ser ku por libra nos for di malesa i morto. (Isa. 25:8; 33:24) Siendo ku nos ta karga su nòmber, otro hende ku ta opservá nos bon kondukta i zelo lo por glorifik’é. (1 Ped. 2:12) Ki un satisfakshon nos ta sinti ora nos ta yuda hende rònt mundu haña sa e nòmber di e Señor Soberano Yehova!—Sal. 83:18, NW.
3. Ki bendishon esnan ku ta reakshoná faborabel na e mensahe di Reino ta risibí?
3 Salba Bida: Yehova “no kier pa ningun hende bai pèrdí, ma pa tur bin na repentimentu.” (2 Ped. 3:9) Sinembargo, kon nan lo por haña sa ta kiko Yehova ta konsiderá kondukta apropiá i inapropiá si niun hende no siña nan? (Jon. 4:11; Rom. 10:13-15) Ora hende ta reakshoná positivo na e bon notisia, e kalidat di nan bida ta mehorá segun ku nan ta bandoná práktikanan dañino. (Mik. 4:1-4) Ademas, nan ta haña e speransa gososo di biba pa semper. Nos trabou di prediká i hasi disipel ta salba tantu nos mes komo esnan ku ta skucha nos. (1 Tim. 4:16) Nos tin un papel sumamente onorabel den e trabou importante akí.
4. Dikon nos mester hasi tur loke nos por den e trabou di prediká i hasi disipel?
4 Pronto e tribulashon grandi lo pone un fin repentino na e mundu inhustu akí. Esnan ku ta adorá Yehova lo sobrebibí. P’esei, e trabou di prediká i hasi disipel ta e trabou di mas urgente, importante i benefisioso ku ta tumando lugá. Laga nos pon’é na promé lugá den nos bida!—Mat. 6:33.