Hasi Progreso

ORA bo a siña apliká prinsipionan bíbliko, pokopoko bo a kuminsá kambia e manera ku semper bo a pensa, papia i aktua. Hopi di e kambionan aki a tuma lugá asta promé ku bo a inskribí den e Skol di Ministerio Teokrátiko. Probablemente bo a hasi progreso te ku bo a dediká bo bida na Yehova. Esei kier men ku bo por stòp di hasi progreso? Apsolutamente ku nò. Bo boutismo ta simplemente un komienso.

E disipel Timoteo tabata sirbi kaba komo ansiano kristian ora Pablo a bis’é pa “reflekshoná” [NW] riba e konseho ku el a dun’é i tambe riba e privilegionan di sirbishi ku a ser konfiá na dje—p’e ta “dediká na” e kosnan aki—pa su “progreso por ta bisto pa tur hende.” (1 Tim. 4:12-15) Pues sea bo a kaba di kuminsá kana den e kaminda di e bèrdat òf bo tin hopi eksperensia den bida kristian, bo mester ta interesá den hasi progreso.

Konosementu i Transformashon

Na Efesionan 3:14-19, nos ta lesa ku apòstel Pablo a pidi den orashon pa su rumannan den fe por “komprondé . . . e hanchura i largura i haltura i profundidat” di e bèrdat. Ku e meta ei, Hesus a duna donnan den forma di hende pa siña, pa korigí i pa edifiká e kongregashon. Dor di meditá regularmente riba e Palabra inspirá di Dios i ku e guia di maestronan eksperensiá, nos por “krese” den sentido spiritual.—Efe. 4:11-15.

E kresementu ei ta inkluí ser “renobá den e spiritu di [nos] mente.” Esaki kier men ku nos ta kultivá un inklinashon mental fuerte ku ta na armonia ku esun di Dios i di Kristu. Pa logra esei nos tin ku apsorbá nan pensamentunan konstantemente, pa nos por “bisti e hende [òf “personalidat,” NW] nobo.” (Efe. 4:23, 24) Ora bo ta studia e Evangelionan, bo ta mira e relatonan aki di e bida di Kristu komo un modelo pa bo sigui? Bo ta purba identifiká karakterístikanan spesífiko di Hesus su personalidat, anto hasi un berdadero esfuerso pa imit’é den bo bida?—1 Ped. 2:21.

E tópikonan di bo kòmbersashon por indiká kuantu progreso bo a hasi. Personanan ku a bisti e personalidat nobo no ta laga mentira, insulto, kosnan vulgar ni komentarionan negativo sali for di nan boka. Mas bien, nan kòmbersashon ta “bon pa edifikashon . . . pa esaki por duna grasia na esnan ku ta tende.” (Efe. 4:25, 26, 29, 31; 5:3, 4; Hudas 16) E kosnan ku nan ta papia, tantu den privá komo na reunionnan di kongregashon, ta indiká ku e bèrdat ta transformando nan bida.

Un otro evidensia di progreso ta ora bo no ta ser tirá mas “p’aki p’aya dor di olanan, i hibá dor di tur bientu di doktrina.” (Efe. 4:14) Por ehèmpel, kon bo ta reakshoná ora mundu ta bombardiá bo ku ideanan nobo, kousanan nobo ku sierto movementunan ta promové i formanan nobo di dibertishon? Bo ta haña gana di dediká ménos tempu na bo debernan pa ku Dios ya asina bo por sigui tras di e kosnan ei? Tur ta kosnan ku por stroba bo di hasi progreso spiritual. Ta hopi mas sabí pa nos kumpra tempu pa aktividatnan spiritual!—Efe. 5:15, 16.

E manera ku bo ta trata otro hende tambe por ta un indikashon di bo progreso spiritual. Bo a siña pa ta “miserikòrdioso” ku e rumannan, “pordonando” nan libremente?—Efe. 4:32.

Bo progreso den hasi kosnan na e manera ku ta agradá Yehova mester ta evidente tantu den kongregashon komo na kas. Tambe esei mester ta bisto na skol, den lugánan públiko i na trabou. (Efe. 5:21–6:9) Bo progreso lo ta bisto si den tur e sirkunstansianan ei bo ta desplegá e kualidatnan ku ta agradá Dios na un grado mas pleno.

Usa Bo Donnan

Yehova a duna nos tur sierto abilidat i talento i e ta spera ku nos lo usa esakinan na fabor di otro hende di tal manera ku mediante nos e por ekspresá su grasia òf bondat inmeresí. Apòstel Pedro a skirbi relashoná ku esaki: “Komo ku kada un a risibí un don spesial, us’é pa sirbi otro komo bon mayordomonan di e grasia multiforme di Dios.” (1 Ped. 4:10) Kon abo ta kumpli ku bo papel komo mayordomo?

Pedro ta sigui bisa: “Esun ku ta papia, lag’é papia konforme e palabra di Dios.” (1 Ped. 4:11) E versíkulo aki ta enfatisá e echo ku nos tin e responsabilidat di papia kompletamente na armonia ku e Palabra di Dios, pa asina Dios wòrdu glorifiká. E manera ku nos ta papia tambe mester glorifiká Yehova. E entrenamentu ku bo ta risibí den e Skol di Ministerio Teokrátiko por yuda bo hasi presis esei: usa bo don- i kualidatnan pa glorifiká Dios mediante e manera ku bo ta yuda otro hende. Teniendo esei komo bo meta, kon bo mester midi bo progreso den e skol?

En bes di pensa riba kuantu punto bo a kubri kaba riba bo papel di konseho pa diskurso òf riba e tipo di asignashonnan ku bo a haña, reflekshoná riba e influensia positivo ku e entrenamentu ku bo a risibí den e skol tabatin riba bo sakrifisionan di alabansa. Komo ku e skol ta prepará nos pa ta mas efikas den sirbishi di vèlt, puntra bo mes: ‘Mi ta prepará loke mi ta bai bisa den sirbishi di vèlt? Mi a siña mustra interes den e personanan ku mi ta prediká na dje? Mi ta pone e base pa hasi rebishita dor di laga e hendenan ku un pregunta pa nos trata n’e siguiente bishita? Mi ta traha pa mehorá mi kapasidat di siña pa mi por yega na kurason di e personanan ku mi ta studiando Beibel kuné?’

No evaluá bo progreso solamente a base di e privilegionan di sirbishi ku bo ta risibí. Bo progreso ta bira bisto no ora bo risibí e asignashon, sino na loke bo ta hasi kuné. Despues ku bo a kumpli ku un asignashon ku a enserá siña otronan, puntra bo mes: ‘Realmente mi tabata un bon maestro? Mi a presentá e informashon di tal manera ku el a influensiá e bida di esnan ku a tend’é?’

E yamada pa usa bo donnan ta nifiká ku bo mester tuma inisiativa. Bo ta invitá otro rumannan pa traha ku bo den sirbishi di vèlt? Bo ta pensa riba maneranan pa yuda esnan nobo, yòn òf enfermo di bo kongregashon? Bo ta ofresé pa limpia Salòn di Reino òf pa yuda den vários manera na kongreso i asamblea? Bo por traha komo pionero ousiliar de bes en kuando? Ta posibel pa bo sirbi komo pionero regular òf yuda den un kongregashon kaminda tin mas nesesidat? Si bo ta un ruman hòmber, bo ta hasi esfuerso pa kumpli ku e kualifikashonnan bíbliko pa bo por bira un sirbidó ministerial òf ansiano? Ta un señal di progreso si bo ta dispuesto pa yuda i aseptá responsabilidat.—Sal. 110:3.

E Papel Ku Eksperensia Ta Hunga

Si bo ta sinti bo inadekuá debí ku bo no tin muchu eksperensia den hiba un bida kristian, no desanimá. E Palabra di Dios por hasi “hende simpel bira sabí.” (Sal. 19:7; 119:130; Pro. 1:1-4) Ora nos ta apliká konseho bíbliko nos por benefisiá di Yehova su sabiduria perfekto, lokual ta mas balioso ku tur loke eksperensia so por siña nos. Sin embargo, segun ku nos ta hasi progreso den nos sirbishi na Yehova, nos ta haña eksperensia balioso. Kon nos por probechá di dje?

Un persona ku a yega di pasa den hopi kos den bida lo por sinti e tentashon pa rasoná: ‘Mi a yega di haña mi ku e situashon aki kaba. Mi sa kiko mi tin ku hasi.’ Esaki ta un aktitut sabí? Proverbionan 3:7 ta spièrta: “No sea sabí den bo mes bista.” Klaru ku eksperensia ta amplia nos punto di bista relashoná ku e faktornan ku nos mester tene kuenta kuné ora di trata ku vários kos den bida. Pero si nos a progresá den sentido spiritual, nos eksperensia mester a graba tambe den nos mente i kurason ku nos tin mester di Yehova su bendishon pa nos por tin éksito. Nos progreso ta bira bisto no den e konfiansa ku nos ta manifestá ora di enfrentá difikultat den bida, sino na e echo ku mesora nos ta akudí na Yehova pa haña su guia. Nos ta demostrá progreso ora nos ta konvensí ku nada no por sosodé sin ku nos Tata selestial permití esei i ora nos ta mantené un relashon di konfiansa i kariño kuné.

Sigui Bai Dilanti

Apesar ku apòstel Pablo tabata un kristian ungí i spiritualmente madurá, el a rekonosé ku e mester a sigui ‘hasi esfuerso’ pa alkansá e meta di bida. (Fil. 3:13-16) Abo ta pensa meskos?

Kon leu bo a progresá? Evaluá bo kresementu dor di wak te kon leu bo a bisti e personalidat nobo, te na ki punto bo ta someté bo mes na Yehova su gobernashon supremo i usa bo donnan pa onra Yehova. E edukashon ku bo ta risibí di e Skol di Ministerio Teokrátiko mester laga e kualidatnan ku e Palabra di Dios ta resaltá bira kada bes mas bisto den bo manera di papia i siña otronan. Sigui konsentrá riba e aspektonan aki di bo kresementu. Haña goso den nan, i umbes bo progreso lo ta bisto.