Deklarashonnan Eksakto

KIKO lo por pone un kristian bisa algu ku no ta bèrdat? Talbes e ta djis ripití algu ku el a tende, sin tuma tempu pa kontrolá si e ta bèrdat. Òf kisas e ta eksagerá un punto pasobra e no a komprondé bon kiko e fuente di informashon ta bisa. Ora nos ta sòru pa ta eksakto asta den asuntunan chikitu, nos oyentenan ta sinti ku nan por konfia e aspektonan mas importante di nos mensahe.

Den Sirbishi di Vèlt. Vários ta esnan ku ta vasilá pa kuminsá prediká pasobra nan ta haña ku nan tin hopi di siña ainda. Sin embargo, no ta dura hopi ku nan ta ripará ku nan por duna un testimonio efikas maske nan tin solamente un konosementu básiko di e bèrdat. Kon nan por hasi esei? E faktor desisivo ta preparashon.

Promé ku bo sali den sirbishi di vèlt, pensa riba e tema ku bo ta bai papia di dje. Purba antisipá e posibel preguntanan ku e hendenan por hasi bo i buska kontestanan satisfaktorio basá riba Beibel. Asina lo bo ta mas prepará pa kontestá nan ku eksaktitut i na un manera relahá. Bo ta bai kondusí un studio di Beibel? Repasá e informashon bon i hasi sigur ku bo mes ta komprondé e base bíbliko di e kontestanan riba e preguntanan di e paragraf.

Awor, kiko si un doño di kas òf un kolega di trabou hasi bo un pregunta ku bo no ta prepará pa kontestá? Si bo no ta sigur di e echonan, no rei e kontesta. “Kurason di e hustu ta studia bon kon pa kontestá.” (Pro. 15:28) Kisas bo por haña e informashon ku bo mester den e buki Rasonamentu for di e Skritura òf den “Temanan Bíbliko pa Kòmbersashon,” si bo tin nan disponibel. Si bo no tin niun di nan dos huntu ku bo, ofresé e persona pa bini bèk despues ku bo investigá e asuntu. Si esun ku a hasi e pregunta ta sinsero, lo e no tin nada kontra pa warda riba e kontesta korekto. Es mas, e por asta keda ku un bon impreshon di bo proseder humilde.

Prediká huntu ku publikadónan eksperensiá por yuda bo bira ábil den manehá e Palabra di Dios na un manera korekto. Wak kua ta e tekstonan bíbliko ku nan ta usa i kon nan ta rasoná riba nan. Aseptá humildemente tur sugerensia òf korekshon ku nan duna bo. Apólos tabata un disipel yen di selo ku a benefisiá di e yudansa ku el a risibí di otro hende. Lukas a kalifik’é komo un hòmber “elokuente,” ku “tabatin hopi bon konosementu” i “ferviente den spiritu,” kende tabata “papia i siña eksaktamente e kosnan tokante di Hesus.” Tòg e tabata falta sierto konosementu. Ora Prisila i Akila a ripará esaki, nan “a hal’é un banda i a splik’é e kaminda di Dios na un manera mas eksakto.”—Echo. 18:24-28.

“Tene Firme na e Palabra Fiel.” Nos partinan na reunion mester reflehá profundo rèspèt pa e echo ku e kongregashon ta “e pilar i sosten di e bèrdat.” (1 Tim. 3:15) Pa nos por defendé e bèrdat, ta importante pa nos kapta e sentido di e tekstonan bíbliko ku nos tin pensá di usa den nos diskursonan. Mester tene kuenta ku nan konteksto i ku ki intenshon a skirbi nan.

E chèns ta grandi ku loke bo bisa na un reunion di kongregashon lo ser ripití despues na otro personanan. Klaru ku “nos tur ta trompeká na hopi manera.” (Sant. 3:2) Pero lo ta bon pa bo mes si bo kultivá kustumbernan ku ta yuda bo hasi deklarashonnan eksakto. Vários ruman hòmber inskribí den e Skol di Ministerio Teokrátiko ku tempu ta bira ansiano. Ora konfia nan ku tal responsabilidat, “muchu mas” lo ser eksigí di nan. (Luk. 12:48) Si un ansiano pa deskuido duna konseho robes ku ta resultá den problema serio pa miembronan di e kongregashon, lo e por pèrdè Dios su aprobashon. (Mat. 12:36, 37) Pues, un ruman ku ta yena e rekisitonan pa bira ansiano mester ta konosí komo un kristian “ku ta tene firme na e palabra fiel ku ta segun e siñansa.”—Tito 1:9.

Wak pa e konklushonnan ku bo ta saka ta na armonia ku “e ehèmpel di palabranan sano” ku ta bisto den e totalidat di bèrdatnan bíbliko. (2 Tim. 1:13) Esaki no tin nodi spanta bo. Kisas ainda bo no a kaba di lesa e Beibel kompletu; wèl sigui traha riba esei. Pero miéntras tantu apliká e siguiente sugerensianan ku por yuda bo analisá informashon ku bo kier usa ora di siña hende.

Na promé lugá, puntra bo mes: ‘E informashon aki ta kuadra ku e konosementu bíbliko ku mi tin kaba? Lo e atraé mi oyentenan na Yehova, òf e ta pone e sabiduria di mundu riba un pedestal i ta animá hende pa laga esei dirigí nan?’ Hesus a bisa: “Bo palabra ta bèrdat.” (Huan 17:17; Deu. 13:1-5; 1 Kor. 1:19-21) Despues, hasi bon uso di e instrumentonan pa studia ku e esklabo fiel i prudente a perkurá, ya ku nan no solamente lo yuda bo komprondé e tekstonan bíbliko korektamente, sino tambe ta mustra kon pa apliká nan na un manera balansá i rasonabel. Si bo basa bo diskursonan riba “e ehèmpel di palabranan sano,” i dependé riba Yehova su kanal di komunikashon ora di splika i apliká e tekstonan, bo deklarashonnan lo ta eksakto.

Kontrolá si e Informashon Ta Eksakto. Susesonan aktual, palabranan sitá i eksperensianan por ta útil pa ilustrá sierto punto òf pa mustra kon por pone nan na práktika. Kon bo por hasi sigur ku nan ta eksakto? Un manera ta dor di saka tal datonan for di fuentenan konfiabel. Kòrda kontrolá si e informashon ta al dia. Por ehèmpel, estadístikanan ta kambia kada tantu tempu, deskubrimentunan sientífiko mas resien ta revelá kosnan nobo i segun ku hende ta haña mas komprondementu di historia i di idiomanan antiguo, nan mester revisá konklushonnan basá riba e kosnan ei. Tene masha kuidou ora bo tin pensá di usa informashon di korant, televishon, radio, E-mail òf Internet. Proverbionan 14:15 ta konsehá: “E hende simpel [“sin eksperensia,” NW] ta kere tur kos, ma e hòmber prudente ta wak bon unda e ta bai.” Puntra bo mes: ‘E fuente aki tin e reputashon di ta eksakto? Tin un otro manera pa mi kontrolá si e informashon ta bèrdat?’ Si bo ta duda ku e ta bèrdat, no us’é.

Fuera di kontrolá si e fuentenan ta konfiabel, pensa bon kon bo ta bai usa e informashon. Hasi sigur ku e manera ku bo ta bai usa e palabranan sitá i estadístikanan ta kuadra ku e konteksto for di kua bo a saka nan. Den bo afan pa duna forsa na bo palabranan, tene kuidou pa bo no eksagerá ni kambia e ekspreshonnan “algun hende” pa “mayoria hende,” ni “hopi hende” pa “tur hende,” ni kambia “algun kaso” pa “semper.” Un hende ku ta eksagerá sifra, alkanse òf gravedat di un asuntu ta pèrdè kredibilidat.

Ora ku semper bo palabranan ta eksakto, lo bo haña e reputashon di ta un persona ku ta respetá e bèrdat. Esaki ta duna un bon impreshon di Testigunan di Yehova komo grupo i, mas importante ainda, ta onra Yehova, e “Dios di fieldat.”—Sal. 31:5.