Kon pa Hasi Investigashon

REI SÁLOMON a “studia, a skrudiñá, i a komponé hopi proverbio.” Pakiko? Pasobra e tabata interesá den skirbi “palabranan di bèrdat na manera korekto.” (Ekl. 12:9, 10) Lukas “a investigá tur kos kuidadosamente for di prinsipio” pa por a konta e susesonan di Kristu su bida den un forma ordená. (Luk. 1:3) Tur e dos sirbidónan aki di Dios a hasi investigashon.

Kiko ta investigashon? Esei ta un búskeda kuidadoso di informashon riba un sierto asuntu. Pa hasi esei bo mester lesa, sigui e mesun métodonan i téknikanan di studiamentu, i kisas puntra otro hende.

Ki ora bo tin ku hasi investigashon? At’akí un par di ehèmpel: durante bo studio personal òf lesamentu di Beibel ta surgi preguntanan ku ta importante pa bo; un persona ku bo ta prediká na dje kisas ta hasi un pregunta ku bo kier kontestá ku informashon spesífiko, òf kisas bo a haña un asignashon pa duna un diskurso.

Laga nos kuminsá ku e asignashon pa duna un diskurso. E informashon ku bo mester trata kisas ta parse hopi general. Kon bo por aplik’é na e sirkunstansianan lokal? Dor di hasi investigashon pa enrikesé e diskurso. Un punto ku kisas ta parse masha opvio ta bira práktiko òf asta por motivá bo ouditorio ora bo apoy’é ku un par di dato estadístiko òf ku un ehèmpel adekuá ku ta interesá e hendenan den bo ouditorio. Kisas e publikashon for di kua bo ta trahando bo parti a ser prepará pa lektornan rònt mundu, pero ta abo tin ku ampli’é, ilustr’é i aplik’é na un solo kongregashon òf persona. Kon bo ta hasi esei?

Promé ku bo kuminsá ku bo investigashon, pensa riba bo ouditorio. Kiko nan sa kaba? Kiko nan lo tin ku haña sa ainda? Anto identifiká kiko ta bo meta. Bo kier splika, konvensé, refutá òf motivá? Splika ta nifiká duna mas informashon pa klarifiká un asuntu. Aunke kisas bo ouditorio ta komprondé e echonan básiko, kisas bo tin ku mustra ki ora òf kon mester hasi loke ta ser bisá. Pa konvensé, bo tin ku duna motibunan ku ta deskribí pakiko un kos ta asina, i ta abo mester presentá evidensia. Pa refutá (es desir, mustra ku no ta asina), bo mester tin un konosementu eksakto di tur dos banda di un kuestion, i hasi un análisis kuidadoso di e evidensia disponibel. Klaru ku nos no ta djis purba usa argumentunan di peso, sino tambe nos kier presentá echonan den un forma bondadoso. Motivá ta enserá yega na kurason di hende. E ta nifiká duna bo ouditorio un insentivo i stimulá nan pa aktua riba loke ta ser konsiderá. Ehèmpelnan di bida real di hende ku a tuma tal akshon, asta ora nan a enfrentá difikultat, por yuda bo yega na kurason di hende.

Awor sí bo ta kla pa kuminsá investigá? Nò, ainda nò. Puntra bo mes kuantu informashon bo tin mester. Kisas tempu ta un faktor importante ku mester tene kuenta kuné. Si bo ta bai presentá e informashon na otro hende, kuantu tempu lo bo tin pa hasi esei? Sinku minüt? Kuarentisinku minüt? E tempu ta fihá kaba, manera na un reunion di kongregashon, òf e ta mas fleksibel, manera na un studio di Beibel òf un bishita di pastoreo?

Por último, ki fuentenan di informashon bo tin na bo alkanse? Fuera di esnan ku bo tin na kas, tin mas den e biblioteka di bo Salòn di Reino? Rumannan ku tin hopi aña ta sirbi Yehova lo ta dispuesto pa laga bo konsultá nan fuentenan di informashon? Tin un biblioteka públiko ku tin bukinan di referensia ku bo por konsultá?

Usando Nos Fuente Prinsipal di Informashon: Beibel

Si bo kier investigá e nifikashon di un teksto bíbliko, kuminsá ku Beibel mes.

Eksaminá e Konteksto. Puntra bo mes: ‘Na ken e teksto aki tabata dirigí? Segun e versíkulonan promé i despues di dje, ta kua sirkunstansianan a hiba n’e deklarashon aki, òf ki aktitut e hendenan enbolbí tabatin?’ Hopi bes, ta e detayenan ei por yuda nos komprondé un teksto bíbliko, i tambe ta nan ta hasi un diskurso interesante.

Por ehèmpel, Hebreonan 4:12 ta ser sitá hopi bes pa mustra e poder ku e Palabra di Dios tin pa toka kurason i influensiá bida di hende. E konteksto ta yuda nos komprondé esaki mihó, ya ku e ta trata tokante e eksperensianan di Israel durante e 40 añanan den desierto promé ku nan a drenta e tera ku Yehova a primintí Abraham. (Heb. 3:7–4:13) “E palabra di Dios,” esta, su promesa di hiba nan na un lugá di sosiegu na armonia ku su pakto ku Abraham, no tabata morto; e tabata bibu-bibu i serka di kumpli. E israelitanan tabatin tur motibu pa mustra fe den dje. Sin embargo, bes tras bes nan a demostrá falta di fe ora Yehova tabata dirigí nan for di Egipto pa Seru Sínai i despues pa e Tera Primintí. Pues, nan reakshon riba e manera ku Dios a kumpli ku su palabra, a revelá loke tabatin den nan kurason. Den un manera similar awe, e promesanan di e palabra di Dios ta revelá kiko tin den kurason di hende.

Buska e Referensianan den Márgen. Algun Beibel tin referensia den márgen. Di bo tin? Si ta asina, esakinan por yuda bo. Tuma nota di un ehèmpel for di e Tradukshon di Mundu Nobo di e Santu Skritura. Promé Pedro 3:6 ta mustra ku Sara ta un bon ehèmpel pa esposanan kristian imitá. E referensia den márgen na Génesis 18:12 ta apoyá esei dor di mustra ku Sara “den su mes” a yama Abraham “señor.” Pues, su sumishon tabata sinsero. Fuera di klara tekstonan bíbliko, referensia den márgen por dirigí bo na versíkulonan ku ta mustra e kumplimentu di un profesia bíbliko òf e patronchi di un pakto di Lei. Pero tene kuenta ku tin algun referensia den márgen ku no t’ei pa duna tal splikashon. Podisé nan ta referí simplemente na pensamentunan paresido òf na informashon biográfiko òf geográfiko.

Hasi Uso di Konkordansia Bíbliko. Un konkordansia bíbliko ta un lista alfabétiko di palabranan usá den Beibel. E por yuda bo lokalisá versíkulonan ku tin di haber ku e tema ku bo ta investigando. Segun ku bo ta analisá e tekstonan ei lo bo por haña mas detaye útil, i lo bo mira evidensia di “e ehèmpel” òf patronchi di e bèrdat presentá den e Palabra di Dios. (2 Tim. 1:13) E Tradukshon di Mundu Nobo ta kontené un lista básiko di “Indèks di Palabranan Bíbliko.” E Gran Konkordansia, disponibel na vários idioma, ta hopi mas kompleto, pasobra e ta dirigí bo na tur versíkulo ku ta kontené e palabranan prinsipal den Beibel.

Siña Usa Otro Fuentenan di Informashon

E kuadro na página 33 ta menshoná vários otro fuente di informashon ku “e esklabo fiel i prudente” a perkurá. (Mat. 24:45-47) Hopi di nan tin un página di kontenido, i vários di nan tin riba e último páginanan un lista di palabra pa yuda bo lokalisá informashon spesífiko. Na fin di kada aña ta publiká den tantu E Toren di Vigilansia komo Spièrta! un indèks di e artíkulonan ku a sali durante e aña ei.

Si bo sa ki tipo di informashon kada un di e publikashonnan aki tin, e proseso di investigashon lo kosta bo ménos tempu. Por ehèmpel, laga nos bisa ku bo kier sa algu tokante profesia, doktrina, kondukta kristian òf kon pa apliká prinsipionan bíbliko. E Toren di Vigilansia probablemente lo tin loke bo ta buska. Spièrta! ta trata susesonan aktual, problemanan di nos tempu, religion, siensia i pueblo di vários pais. Den e buki E homber mas importante cu hamás a biba bo ta haña komentario riba kada relato den e Evangelionan den órden kronológiko. Bo ta haña un análisis versíkulo pa versíkulo di bukinan kompleto di Beibel den publikashonnan manera Revelacion—su gran culminacion ta cerca!, Presta Atencion na e Profecia di Daniel! i e dos volúmennan di E Profesia di Isaías—Lus pa Henter Humanidat. Den e buki Rasonamentu for di e Skritura, lo bo haña kontesta satisfaktorio pa sientos di pregunta bíbliko ku sa surgi tur ora den sirbishi di vèlt. Pa un komprondementu mas kla di otro religionnan, nan siñansanan, orígen i desaroyo, wak e buki Hende en Buska di Dios. Bo ta haña un relato detayá di e historia moderno di Testigunan di Yehova den e buki Testigunan di Yehova—Proklamadónan di e Reino di Dios. Pa un informe riba e desaroyonan aktual di e predikashon mundial di e bon nobo, chèk e último Anuario di Testigunan di Yehova. E buki Perspikasia pa Komprondé e Skritura ta un ensiklopedia i atlas bíbliko. E ta un ekselente fuente di informashon si bo mester di detayenan tokante hende-, lugá-, opheto-, idioma- òf susesonan históriko konektá ku Beibel.

“Indèks di Publikashonnan Watch Tower.” E buki aki, publiká den mas ku 20 idioma, lo dirigí bo na informashon ku tin den un variedat amplio di nos publikashonnan. E ta partí den un indèks di tópiko i un indèks di teksto bíbliko. Pa usa e indèks di tópiko, bo tin ku buska un palabra ku ta representá e tópiko ku bo kier investigá. Pa usa e indèks di teksto bíbliko, bo tin ku lokalisá den e lista e teksto ku bo kier komprondé mihó. Si den bo idioma a publiká algu riba e tópiko òf e teksto bíbliko ei durante e añanan ku e Indèks ta kubri, lo bo haña un lista di referensia ku bo por konsultá. Riba e promé páginanan di e Indèks tin un lista pa indiká na kua publikashon e abreviashon ta referí. (Por ehèmpel, ku e lista ei lo bo komprondé ku w99 1/3 15 ta referí na E Toren di Vigilansia di 1 di mart 1999, página 15. Si bo haña “E” tras di un referensia, esei ta nifiká ku e ta disponibel na ingles, “O” ta disponibel na hulandes, “PA” na papiamentu, “S” na spañó.) Enkabesamentunan prinsipal manera “Eksperensianan di Sirbishi di Vèlt” i “Biografia di Testigunan di Yehova” por ta útil ora di prepará diskursonan pa motivá e kongregashon.

Investigashon por ta algu hopi fasinante, p’esei tene kuidou pa bo no desviá. Konsentrá riba bo meta i buska solamente loke bo tin mester. Si e Indèks ta mandá bo na un sierto fuente, bai na e página(nan) menshoná, anto usa e suptemanan i promé frasenan di e paragrafnan pa haña e informashon ku ta kuadra ku loke bo mester. Si bo ta buskando e nifikashon di un sierto versíkulo bíbliko, lokalisá e teksto promé riba e página indiká, anto kaba eksaminá e komentarionan promé i despues di dje.

“Watchtower Library” Riba CD-ROM. Si bo tin un kòmpiuter, lo bo por usa Watchtower Library riba CD-ROM ku ta kontené un gran kantidat di nos publikashonnan. Ku e programa aki pa buska informashon ta fásil pa haña un palabra, un kombinashon di palabra òf un teksto bíbliko den kualkier publikashon den e Watchtower Library. Asta si e fuente di informashon aki no ta disponibel den bo idioma, lo bo por benefisiá di dje den un di e idiomanan internashonal ampliamente usá ku bo ta dominá.

Otro Bibliotekanan Teokrátiko

Den su segundo karta inspirá na e hóben Timoteo, Pablo a pidié bini Roma ku “e bukinan, spesialmente e pèrkamèntnan.” (2 Tim. 4:13) Pablo a konsiderá sierto obranan skirbí balioso i a warda nan, i abo tambe por hasi meskos. Bo ta warda bo ehemplarnan personal di E Toren di Vigilansia, Spièrta! i Nos Ministerio di Reino asta despues ku a studia nan na reunionnan di kongregashon? Si ta asina, lo bo tin nan na bo disposishon komo fuente di informashon, huntu ku e otro publikashonnan kristian ku bo tin. Mayoria kongregashon tin un biblioteka teokrátiko den Salòn di Reino. Tur hende den kongregashon por us’é ora nan asistí na reunion na e Salòn di Reino.

Tene un Fail Personal

Paga tinu pa artíkulonan interesante ku bo por usa ora di duna diskurso òf siña hende. Si den korant òf un revista bo haña un artíkulo, un estadístika òf ehèmpel ku bo por usa den sirbishi di vèlt, kòrt’é afó òf kopi’é. Pone e fecha, e nòmber di e korant òf revista i kisas e outor òf editor. Na reunionnan di kongregashon hasi anotashon di puntonan i ilustrashonnan ku lo bo por usa pa splika e bèrdat na otro hende. Bo a yega di pensa riba un bon ilustrashon pero no a haña un oportunidat di us’é mesora? Skirbié, i ward’é den un fail. Despues ku bo tin algun tempu den e Skol di Ministerio Teokrátiko, lo bo a prepará vários presentashon. No tira bo notanan di e partinan aki afó. Warda nan, pasobra un dia lo bo por hasi bon uso di e investigashon ku bo a hasi.

Papia ku Hende

Hende ta un fuente balioso di informashon. Ora Lukas tabata kompilá su relato di Evangelio, aparentemente el a akumulá hopi informashon dor di entrevistá testigunan ku tabata presente. (Luk. 1:1-4) Podisé un kompañero kristian por klarifiká un asuntu ku bo a purba investigá. Segun Efesionan 4:8, 11-16, Kristu ta usa ‘donnan den hende’ pa yuda nos krese den “e konosementu di e Yu di Dios.” Sirbidónan di Dios ku tin eksperensia por duna nos ideanan útil. Dor di kòmbersá ku otro hende tambe bo por haña sa kiko nan ta pensa, i esaki por yuda bo prepará informashon ku ta realmente práktiko.

Evaluá Bo Resultadonan

Promé ku bo kome un pinda, bo tin ku kask’é. Ta meskos ku e fruta di bo investigashon. Promé ku bo por us’é, bo tin ku separá loke ta balioso for di loke ta innesesario.

Si bo ta bai usa e informashon den un diskurso, puntra bo mes: ‘E punto aki ku mi kier usa realmente ta kontribuí na algu balioso den mi presentashon? Òf, ounke e informashon ta interesante, lo e por desviá atenshon for di e tema?’ Si bo tin pensá di usa susesonan aktual òf informashon for di e kampo di siensia òf medisina, hasi sigur ku e informashon ta al dia. Tin hopi kambio riba e terenonan ei. Tene kuenta tambe ku a aktualisá algun punto ku tin den nos publikashonnan mas bieu, pues konsiderá loke a ser publiká resientemente riba e asuntu en kuestion.

Si bo disidí di kompilá informashon for di fuentenan di mundu bo mester ta èkstra kouteloso. No lubidá nunka ku e Palabra di Dios ta e bèrdat. (Huan 17:17) Komo ku Hesus ta okupá e papel klave den kumplimentu di e propósito di Dios, Kolosensenan 2:3 ta deklará: “Den [dje] tur e tesoronan di sabiduria i konosementu ta skondí.” Evaluá e resultadonan di bo investigashon for di e ángulo ei. Pa loke ta trata informashon ku bo haña den bukinan di mundu, puntra bo mes lo siguiente: ‘E informashon aki ta eksagerá? E ta basá riba spekulashon òf ta reflehá un punto di bista limitá? E ta skirbí ku un motibu egoista òf komersial? Otro fuentenan ofisial ta di akuerdo kuné? I mas ku tur kos, e ta na armonia ku e bèrdat di Beibel?’

Proverbionan 2:1-5 ta animá nos pa sigui buska konosementu, komprondementu i disernimentu “manera plata, i rondi’é manera tesoro skondí.” Esaki ta nifiká trabou duru pero tambe hopi rekompensa. Investigashon ta eksigí esfuerso, pero si bo hasié lo e yuda bo averiguá kiko Dios ta pensa di sierto asuntunan, korigí ideanan robes i duna bo un mihó komprondementu di e bèrdat. Tambe esei lo duna bo presentashonnan mas bida i hasi nan mas práktiko, i nan lo ta un fuente di plaser pa bo i pa bo ouditorio.