Argumentunan Sólido

ORA bo hasi un deklarashon, bo oyentenan tin tur derecho di puntra nan mes: “Kon mi por sa si esei ta bèrdat? Ki pruebanan ta respaldá loke e ta bisa?” Komo maestro, bo ta obligá na sea kontestá e preguntanan ei òf yuda bo oyentenan haña e kontesta. Si e deklarashon ta un punto krusial den bo argumentu, no keda sin apoy’é ku motibunan di peso, pasobra asina lo bo duna bo presentashon un karakter konvinsente.

Apòstel Pablo a konvensé hende. Dor di usa argumentunan sólido, rasonamentu lógiko i apelashon sinsero el a purba kambia e mentalidat di e hendenan ku el a papia kuné. El a laga un bon ehèmpel pa nos. (Echo. 18:4; 19:8) Klaru ku tin algun oradó ku ta usa argumentunan i rasonamentu konvinsente pa gaña hende. (Mat. 27:20; Echo. 14:19; Kol. 2:4) Kisas nan ta basa loke nan ta bisa riba suposishonnan inkorekto, nan ta konfia fuentenan ku no ta imparsial, ta usa argumentunan superfisial, ta ignorá echonan ku ta kontrali na nan punto di bista personal òf nan ta traha mas riba hende su emoshon ku riba hende su lógika. Nos mester tene kuidou i evitá tur e tipo di métodonan ei.

Firmemente Basá Riba e Palabra di Dios. Loke nos ta siña hende no mester sali di nos mes. Nos ta hasi nos bèst pa kompartí loke nos a siña for di Beibel. Den esaki e publikashonnan di e esklabo fiel i prudente ta di gran yudansa, pasobra nan ta animá nos pa eksaminá e Skritura ku sumo atenshon. Anto nos, di nos parti, ta dirigí otro hende na Beibel, no ku e meta di mustra nan ku nos tin rason, sino ku e deseo humilde di laga nan mira pa nan mes kiko e ta bisa. Nos ta kompletamente di akuerdo ku loke Hesukristu a bisa su Tata den orashon: “Bo palabra ta bèrdat.” (Huan 17:17) Komo ku no tin un outoridat mas grandi ku esun di Yehova Dios, Kreadó di shelu i tera, nos argumentunan ta sólido ora nan ta basá riba su Palabra.

Podisé tin biaha bo ta papia ku hende ku no konosé Beibel òf ku no ta rekonos’é komo e Palabra di Dios. Bo mester por distinguí ki ora i kon pa introdusí tekstonan bíbliko, pero purba dirigí nan atenshon na e fuente konfiabel aki mas lihé posibel.

E echo ku bo a djis sita un teksto bíbliko importante kier men ku bo a presentá un argumentu sólido? No nesesariamente. Kisas bo tin ku dirigí atenshon na e konteksto pa mustra ku e teksto realmente ta respaldá loke bo ta bisando. Si bo kier saka solamente un prinsipio for di un versíkulo, i e konteksto no ta papia di e tema ei, anto lo bo mester bini ku mas prueba. Podisé bo tin ku usa otro tekstonan bíbliko ku ta relashoná ku e asuntu pa konvensé bo ouditorio ku loke bo ta bisando ta bon fundá riba e Skritura.

No eksagerá e pruebanan ku e teksto bíbliko ta presentá. Les’é bon. Maske un teksto ta trata e tema general ku bo ta papiando di dje, pa bo argumentu ta konvinsente, bo ouditorio mester por mira ku e teksto ta proba loke abo ta bisa.

Pruebanan Adishonal. Den algun kaso ta bon pa presentá prueba for di un otro fuente konfiabel ku no ta Beibel, pa yuda hende mira kon rasonabel e Skritura ta.

Por ehèmpel, lo bo por hala atenshon na e universo visibel komo prueba ku tin un Kreadó. Òf menshoná leinan di naturalesa, manera gravedat (zwaartekracht), i rasoná riba e echo ku e eksistensia di e leinan aki ta indiká ku mester tin un Dunadó di Lei. Bo argumentunan lo ta sólido si nan ta na armonia ku loke tin pará skirbí den e Palabra di Dios. (Jòb 38:31-33; Sal. 19:1; 104:24; Rom. 1:20) E pruebanan ei ta efikas pasobra nan ta demostrá ku loke Beibel ta bisa ta kuadra ku echonan ku hende por opservá.

Bo kier yuda un hende komprondé ku Beibel realmente ta e Palabra di Dios? Lo bo por sita ekspertonan ku ta afirmá esei, pero nan deklarashon ta un prueba real ku ta asina? E sitanan ei lo yuda solamente hende ku ta respetá e ekspertonan ei. Lo bo por usa siensia pa proba ku loke Beibel ta bisa ta bèrdat? Si bo ta basa bo evidensia riba e opinion di sientífikonan imperfekto, lo bo ta edifikando riba un base instabil. Di otro banda, bo argumentunan lo tin un base sólido si bo kuminsá ku e Palabra di Dios, anto despues señalá e deskubrimentunan sientífiko ku ta duna prueba adishonal di e eksaktitut di e Skritura.

Kiko ku bo kier proba, presentá sufisiente evidensia. E kantidat di evidensia ku bo mester ta dependé di bo ouditorio. Por ehèmpel, si bo ta papiando di e último dianan, manera 2 Timoteo 3:1-5 ta deskribí, lo bo por menshoná un notisia ampliamente publiká ku ta indiká ku hende ta “sin amor.” E solo ehèmpel ei lo por ta sufisiente pa proba ku nos ta mirando kumplimentu di e rasgo aki di e señal di e último dianan.

Hopi bes ta bon pa hasi un analogia, es desir un komparashon entre dos kos ku tin mesun elementonan importante. Riba nan mes, e komparashonnan ei no ta demostrá nada, pero loke Beibel ta bisa por konfirmá ku nan ta válido. Anto podisé e komparashonnan ei por yuda un persona mira kon rasonabel un idea ta. Por ehèmpel, nos lo por usa un analogia asina ora nos ta splika ku e Reino di Dios ta un gobièrnu. Lo bo por señalá ku meskos ku gobièrnunan humano, e Reino di Dios tin gobernante, suidadano, lei, un sistema hudisial i un sistema di edukashon.

Hopi bes nos por usa eksperensianan di bida real pa enfatisá e sabiduria di sigui e konsehonan di Beibel. Bo por usa tambe bo eksperensianan personal pa apoyá loke bo ta bisa. Por ehèmpel, pa mustra un persona e importansia di lesa i studia Beibel, lo bo por splika e bon efekto ku e kosnan ei tabatin riba bo bida. Pa animá su rumannan, apòstel Pedro a referí na e transfigurashon, un suseso ku e mes tabata testigu di dje. (2 Ped. 1:16-18) Pablo tambe a referí na su propio eksperensianan. (2 Kor. 1:8-10; 12:7-9) Di mes bo mester ta prudente den uso di eksperensianan personal pa bo no hala demasiado atenshon na bo mes.

Komo ku kada hende tin nan propio background i mentalidat, e pruebanan ku ta konvensé un persona, kisas no ta satisfasé un otro. P’esei, tene kuenta ku e opinion di bo oyentenan ora bo ta disidí kua ta e argumentunan ku lo bo usa i kon lo bo presentá nan. Proverbionan 16:23 (BPK) ta deklará: “For di un kurason sabí palabra sabí ta sali, un kurason sabí ta kambia pensamentu di hende fásilmente.”