Bo Por Sali den Sirbishi Djadumingu?

1. Kiko nos por siña for di loke Pablo i su kompañeronan a hasi na Filipos?

¹ Tabata un sabat, e dia ku mayoria di hudiu na Filipos a sosegá. Pablo i su kompañeronan tabata di bishita na e stat durante ún di nan biahenan komo misionero. Niun hende lo no a kritiká nan si nan tambe a sosegá di nan sirbishi riba e dia ei. Nan tabata sa ku e hudiunan tabata reuní pafó di e stat pa hasi orashon, i p’esei nan a hasi bon uso di e oportunidat pa prediká na nan. Pablo i su kompañeronan lo mester a keda masha kontentu ora ku Lidia a skucha nan i ora ku tur e hendenan di su kas a batisá. (Echo. 16:​13-⁠15) Siendo ku hopi hende ta sosegá riba djadumingu, pakiko no usa parti di e dia akí pa prediká na nan?

2. Ki problema e pueblo di Yehova mester a vense pa nan por a prediká riba djadumingu?

² E Lucha pa Por Prediká Riba Djadumingu: Durante 1927, e pueblo di Yehova a haña e animashon pa usa un parti di kada djadumingu pa prediká. Mesora, nan a haña resistensia. Na Merka hopi ruman a ser arestá. A akusá nan di a violá e lei di deskanso riba djadumingu, di a kousa disturbio i di bende sin pèrmit. Pero e pueblo di Yehova no a entregá. Durante e dékada di 1930, nan a organisá “un kampaña di gruponan grandi.” Publikadónan di diferente kongregashon den e área a bini huntu pa traha den un teritorio. Na un okashon ku outoridatnan a bin pa arestá e publikadónan, nan tabata asina hopi ku e outoridatnan no por a hasi nada. Bo ta apresiá e sakrifisio ku e rumannan ei a hasi pa nos por prediká sin problema riba djadumingu?

3. Dikon djadumingu ta un ekselente dia pa prediká?

³ Un Dia Ekselente pa Prediká: Hopi hende no tin ku traha riba djadumingu. Mayoria di biaha nan ta mas relahá tambe. I tin persona religioso ku kisas ta mas dispuesto pa papia tokante Dios riba e dia akí. Si nos tin reunion riba djadumingu, nos ta bistí pa sirbishi kaba. Pues, pakiko no plania pa bai sirbishi promé òf despues di reunion? Si ta nesesario, bo por bini ku algu di kome.

4. Ki goso nos por eksperensiá si nos usa un parti di djadumingu pa prediká?

⁴ Si nos usa un parti di djadumingu pa prediká, ainda nos lo sobra tempu pa nos sosegá. I nos lo sinti nos satisfecho ku nos a partisipá den sirbishi sagrado. (Pro. 19:⁠23) Nos lo por asta eksperensiá e goso di haña un hende manera Lidia!