Capítulo 91

Ora Lázaro tabata resusitá

AWOR Jesús hunto cu hende cu a compañé, a yega ne graf memorial di Lázaro. Realmente, esei tabata un cueba cu un piedra tapando su entrada. Jesus a bisa, “Kita e piedra.”

Marta a keha, pasobra e no a comprende ainda loke Jesús tabatin intencion di haci. El a bisa, “Señor, e mester hole malu caba, pasobra ta haci cuater dia.”

Pero Jesús a puntra: “Mi no a bisábo cu si bo kere lo bo mira e gloria di Dios?”

Pues, nan a kita e piedra. Anto Jesús a hiza su wowo i a reza: “Tata, mi ta gradicíbo cu bo a tendémi. Berdad, mi sa cu bo semper ta tendémi; ma pa causa dje multitud cu ta para rond, mi ta papia, pa nan kere cu bo a mandámi.” Jesús a haci oracion na público pa hende sa cu loke e tabata cla pa haci a ser hací cu poder cu el a recibi di Dios. Anto el a sclama cu boz fuerte: “Lázaro, sali numa!”

Cu esei, Lázaro a sali. Su man i pia tabata mará ainda cu paña di entierro, i su cara tabata tapá cu un paña. Jesús a bisa, “Losé i lagué bai.”

Ora nan a mira e milagro, hopi hudío cu a bini pa condoler María i Marta a pone fe den Jesús. Sin embargo, otronan a bai i a bisa fariseo loke a sosode. Nan i sacerdote principal a haci arreglo un bez pa un reunion cu e corte halto hudío, e Sanedrín.

E Sanedrín a inclui e sumosacerdote actual, Caifás, i també fariseo i saduceo, sacerdote principal, i sumosacerdote di antes. Eseinan a lamenta: “Kico nos tin cu haci, pasobra e homber ei ta haci hopi siñal? Si nos lagué asina, nan tur lo pone fe den dje, i romano lo bini i kita tanto nos lugar como nos nacion.”

Aunque guía religioso a admiti cu Jesús “ta haci hopi siñal,” nan único interés tabata nan mes puesto i autoridad. E resureccion di Lázaro tabata specialmente un golpi duro pa saduceo, siendo cu nan no a kere den e resureccion.

Caifás, cu kizás tabata un saduceo, a papia awor, bisando: “Boso no sa nada mes, ni boso no ta razona cu ta di probecho pa boso pa un solo hende muri den interés di pueblo i no pe nacion henter ser destruí.”

Dios a influenciá Caifás pa bisa esei, pasobra apóstol Juan a skirbi despues: “Pero, e no a bisa esei di su mes origen.” Loke Caifás realmente kier men ta cu Jesús mester ta matá pa prevenié di saboteá mas nan puesto di autoridad i poder. Pero, segun Juan, ‘Caifás a profetiza cu Jesús tabata destiná pa muri no pe nacion so, sino pe yiunan di Dios ser reuní hunto.’ I, en berdad, tabata e propósito di Dios pa su Yiu muri como rescate pa tur.

Awor Caifás a logra domina e Sanedrín pe traha plan pa mata Jesús. Pero Jesús, posiblemente tendiendo di tal plan foi Nicodemo, un miembro dje Sanedrín cu tabata amistoso cuné, a bai djei. Juan 11:38-54.

▪ Pakico Jesús a haci oracion na público promé cu el a resusita Lázaro?

▪ Con hende cu a mira e resureccion a reacciona na dje?

▪ Kico a revela e malicia di miembro dje Sanedrín?

▪ Ki intencion Caifás tabatin, pero Dios a usé pa profetiza kico?