Capítulo 117

Agonía den e hofi

ORA Jesús a caba di reza, e i su 11 fiel apóstol a canta cantica di alabanza pa Jehova. Anto nan a baha dje sala djariba, a sali den scuridad frescu djanochi, i a bolbe trabesa e Valle di Cedrón den direccion di Betania. Pero riba camina nan a para den un sitio favorito, e hofi di Getsemaní. Esei tabata situá riba e Ceru di Olijfi of cerca dje. Hopi bez Jesús a reuni cu su apóstolnan ei bao di mata di olijfi.

Lagando ocho apóstol—kizás cerca entrada dje hofi—el a bísanan: “Sínta aki mientras cu mi ta bai ayá i reza.” Anto el a hiba e otro tres—Pedro, Santiago, i Juan—i a bai mas leu den e hofi. Jesús a bira afligí i seriamente molestiá. El a bísanan: “Mi alma ta profundamente afligí, asta te na morto. Keda aki i sigi vigila cu mi.”

Jesús a bai un poco mas leu i a cai boca abao riba tera i a cuminza reza encarecidamente: “Mi Tata, si ta posibel, laga e copa aki pasámi forbij. Sin embargo, no manera mi kier sino manera bo kier.” Kico e kier men? Pakico e tabata “profundamente afligí, asta te na morto”? E tabata hala atrás for di su decision di muri i percura e rescate?

Di ningun manera! Jesús no a pidi di scapa for di morto. Asta e idea di evita un morto sacrificial, cu Pedro a sugeri un biaha, tabata repugnante pe. Mas bien, e tabata den agonía pasobra e manera cu e tabatin cu muri pronto—como un criminal despreciá—por trece reproche riba e nomber di su Tata. Awor el a sinti cu den poco ora mas lo e ser clabá ne staca como e persona di mas malu—un blasfemador contra Dios! Esei ta loke a molestié profundamente.

Despues di a reza hopi, Jesús a bolbe pa haya e tres apóstol na soño. Papiando cu Pedro, el a puntra: “Boso no por a vigila sikiera un ora cu mi? Sigi vigila i reza continuamente, pa boso no drenta den tentacion.” Sin embargo, reconociendo cu nan tabata bao di presion i cu e ora tabata laat, el a bisa: “E spiritu, naturalmente, ta ansioso, pero e carni ta swak.”

Anto Jesús a bai pe segunda bez i a pidi Dios kita e “copa” foi dje, es decir, e porcion, of boluntad, di Jehova foi dje. Ora el a bolbe, el a haya e tresnan drumí atrobé ora nan mester a reza pa nan no drenta den tentacion. Ora Jesús a papia cu nan, nan no tabata sa kico pa bisa pa contestá.

Finalmente, pe tercera bez, Jesús a bai, rond di un tirá di piedra, i cu rudía doblá, cu sclamacion fuerte i lágrima, el a pidi: “Tata, si bo kier, kita e copa aki foi mi.” Jesús a sinti intensamente dolor severo pa causa dje reproche cu su morto como un criminal por trece riba e nomber di su Tata. Sí, e tabata acusá como blasfemador—hende cu ta plega Dios—esei tabata casi mas cu e por a wanta!

No obstante, Jesús a sigi reza: “No loke mi kier, sino loke bo kier.” Den obedencia, Jesús a somete su boluntad ne boluntad di Dios. Anto, un angel di cielo a presenta i a fortalecé cu algun palabra animador. Probablemente, e angel a bisa Jesús cu e tabatin e aprobacion di su Tata.

Sin embargo, esei tabata ki un peso riba e scouder di Jesús! Su mes bida eterna i esun di tur e raza humano tabata den e wega. E presion emocional tabata enorme. Pues, Jesús a sigi reza mas encarecidamente, i su sodor a bira manera gota di sanger ora el a cai na suela. “Aunque esei ta un fenomeno mashá raro, sodor manera sanger . . . por sosode den un estado sumamente emocional,” segun The Journal of the American Medical Association.

Despues, Jesús a bolbe pe tercera bez cerca su apóstolnan, i una bez mas a háyanan drumí. Nan tabata completamente gastá di puro afliccion. Jesús a sclama: “Boso ta drumi na un ocasion manera esaki i ta sosega! Ta basta! E ora a yega! Mira! E Yiu di hende ta traicioná den man di hende pecador. Lanta, bam. Mira! Mi traidor a yega cerca.”

Durante cu e tabata papia ainda, Hudas Iscariote a yega cerca, den compañía di un multitud grandi hibando flambeo i lampi i arma. Mateo 26:30, 36-47; 16:21-23; Marco 14:26, 32-43; Lucas 22:39-47; Juan 18:1-3; Hebreo 5:7.

▪ Despues di a bandona e sala djariba, unda Jesús a hiba su apóstolnan, i kico el a haci ei?

▪ Durante e rezamento di Jesús, kico e apóstolnan tabata haci?

▪ Pakico Jesús tabata den agonía, i ki peticion el a haci na Dios?

▪ Kico tabata indicá ora e sodor di Jesús a bira manera gota di sanger?