Yuda Hende Ku No Ta Kla pa Studia e Buki Beibel Ta Siña
1. Dikon no ta tur hende ta interesá na kuminsamentu den e buki Beibel Ta Siña?
1 Pa un hende por bira un sirbidó di Yehova, e tin ku haña sa kiko Beibel ta siña. Pero, tin hende ta pertenesé na un religion no kristian i no ta mira Beibel komo e Palabra di Dios. Otronan no ta kere den Dios mes i no ta mira Beibel komo un buki sagrado. Tin publikashon ku nos por usa pa yuda hende ku na promé instante no ke aseptá e buki Beibel Ta Siña? Wèl, e siguiente sugerensianan ta basá riba deklarashonnan ku nos a risibí di publikadónan for di 20 pais.
2. Kiko nos tin ku purba haña sa si un hende bisa nos ku e no ta kere den Dios, i dikon?
2 Hende Ku No Ta Kere den Dios: Si un hende bisa ku e no ta kere den Dios, lo ta bon pa haña sa e motibu. Ta den evolushon e ta kere? Ta e inhustisia ku tin den mundu òf e hipokresia ku tin den religion a pon’é stòp di kere den Dios? Ta di un pais kaminda hende no ta kere den Dios e ta? Kisas e no ta keda insistí ku Dios no ta eksistí, pero nunka e no a sinti e nesesidat pa kere den dje tampoko. Hopi publikadó ta haña ku si bo puntra e hende “Semper bo a pensa asina?” esaki ta habri kaminda p’e splika su mes. Skuch’é sin interumpié. Ta ora nos komprondé e motibu pakiko e no ta kere den Dios, nos lo sa kiko pa bis’é i ki publikashon pa ofres’é.—Pro. 18:13.
3. Kon nos por demostrá ku nos ta respetá hende i nan kreensianan?
3 Tene kuenta pa loke nos ta bisa no laga e hende sinti ku nos ta ataká su punto di bista. E siguiente sugerensia a bini for di e sukursal di Merka: “Ta masha importante pa respetá e libertat ku kada hende tin di skohe den kiko e ta kere. En bes di purba di gana pelea, ta mihó pa hasi e hende pregunta ku ta lag’é pensa i yega na su mes konklushon.” Un superintendente di sirkuito ta konta ku e tin e kustumber di laga e hende splika su mes miéntras ku e ta skucha. Despues di skucha e hende e ta puntr’é: “Bo a yega di pensa riba e siguiente posibilidat?”
4. Kon nos por yuda un budista?
4 E idea ku tin un Dios ta algu deskonosí pa hopi budista. Algun publikadó na Gran Bretaña ta gusta usa e foyeto Cómo hallar paz y felicidad duraderas ora nan ta prediká na e hendenan ei. Despues di trata e introdukshon, nan ta analisá e sekshon “¿Existe un Creador todopoderoso?” anto despues e sekshon “Una guía para toda la humanidad.” Ku tempu, nan por ofresé e buki Beibel Ta Siña i bisa e hende: “Asta si bo no ta kere den Dios, un estudio di Beibel lo ta bon pasobra e tin hopi konseho práktiko.” Un pionero na Merka ku ta sirbi den e kampo chines a bisa: “Hopi chines den nos teritorio ta gusta lesa. Pues hopi bes nan ta lesa henter e publikashon promé ku nos bai bèk serka nan. Pero kisas nan no ta komprondé e idea di un estudio di Beibel. P’esei, na e promé bishita mi ta preferá di ofresé e foyeto Bon Notisia, pasobra e ta skirbí na un manera ku ta animá hende pa kòmbersá.” Un superintendente di sirkuito na Merka ku ta sirbi den un sirkuito di e idioma chines ta bisa ku bo por introdusí e buki Beibel Ta Siña for di e promé bishita. Pero, en bes di kuminsá na kapítulo 1, ku ta papia tokante Dios, lo ta mihó pa kuminsá na kapítulo 2, pa laga e hende sera konosí ku Beibel.
5. Dikon nos mester tin pasenshi?
5 Pa un hende kuminsá kere den Dios, ta tuma tempu, pues tene pasenshi. Un hende lo no aseptá for di e promé kòmbersashon ku ta eksistí un Kreador. Pero ku tempu e por kuminsá rekonosé ku kisas esei ta posibel òf e por bisa ku awor e ta komprondé dikon hende por yega na e konklushon ei.
6. Dikon algun hende no ta interesá den Beibel?
6 Hende Ku No Ta Interesá òf Ku No Ta Kere den Beibel: Na algun okashon nos por haña un hende ku ta rekonosé ku tin un Dios pero ku no ta kere ku Beibel ta e Palabra di Dios. Podisé e ta biba den un pais no kristian i e ta konektá Beibel ku kristiandat. Òf kisas e ta biba den un pais supuestamente kristian kaminda hende ta hopi inkliná na kosnan mundano, i p’esei e no ta kere ku Beibel ta masha útil p’e. Kon nos por yuda un hende asina haña interes den Beibel i eventualmente aseptá un estudio den e buki Beibel Ta Siña?
7. Kon algun publikadó ta logra lanta interes di hende den Beibel?
7 E sukursal di Gresia a skirbi: “E mihó manera pa yuda hende ku no ta interesá den Beibel ta di djis habrié i mustra nan su kontenido. Hopi publikadó a nota ku e efekto ku e mensahe di Beibel tin riba kurason di un hende ta muchu mas poderoso ku kualke kos ku nan mes por bis’é. (Heb. 4:12) Ora nan mira e nòmber di Dios den Beibel, hopi di nan ke sa mas aleu kiko Beibel ta papia di dje.” E sukursal di India a skirbi: “E bèrdat tokante bida i morto i e promesa di Beibel ku lo tin un mundu sin diskriminashon ta atra’é hopi hindú.” Ora e publikadónan referí na problemanan di interes lokal, nan ta haña oportunidat pa mustra kiko Beibel ta bisa ku e Reino di Dios lo hasi pa drecha e situashon.
8. Kiko nos por bisa hende ku tin un punto di bista negativo tokante Beibel pa motibu di kristiandat?
8 Si un hende tin un punto di bista negativo tokante Beibel pa motibu di kristiandat, lag’é sa ku kristiandat a duna hende un konsepto robes tokante Beibel i su siñansanan. E sukursal di India a skirbi: ‘Tin biaha, nos tin ku yuda hende mira ku nèt e iglesianan di kristiandat no ta praktiká loke Beibel ta siña.’ Segun e informe di e sukursal, hindú sa keda impreshoná ku e sekshon 4 di e foyeto ¿Qué propósito tiene la vida? ¿Cómo descubrirlo?, ku ta splika kon iglesianan a purba kontaminá i destruí e Palabra di Dios. Un pionero na Brazil ta bisa hende: “Bo no ta haña ku ta bon pa abo mes haña sa kiko tin den Beibel? Hopi hende ta hasi esaki ku un mente habrí, sin kompromiso. Lo bo keda hopi sorprendí di loke bo lo siña.”
9. Dikon nos no mester entregá si na kuminsamentu un hende no ta interesá den kiko Beibel ta siña?
9 Yehova ta wak kurason di kada hende. (1 Sam. 16:7; Pro. 21:2) E ta hala tur ku tin e kondishon di kurason korekto pa sirbié. (Huan 6:44) Hopi di e hendenan akí nunka no a siña tokante Dios òf no sa kasi nada di Beibel. Nos trabou di prediká ta duna nan e chèns pa “ser salbá i yega na un konosementu eksakto di e bèrdat.” (1 Tim. 2:4) P’esei, si na kuminsamentu un hende no ta interesá den kiko Beibel ta siña, no entregá! Usa un di nos publikashonnan pa lanta su interes. Ku tempu, lo bo por pasa di e publikashon ei pa esun prinsipal: e buki Kiko Beibel Ta Siña Realmente?
[Kuadro na página 4]
Si un hende no ta kere den Dios, purba esaki:
• Pa haña sa kiko ta su motibu, puntr’é, “Semper bo a pensa asina?”
• Si e ta budista, usa página 9-12 di e foyeto Cómo hallar paz y felicidad duraderas.
• Si ta den evolushon e ta kere, e siguiente publikashonnan por ta útil:
E seri “¿Casualidad o diseño?” den ¡Despertad!
E DVD Las maravillas de la creación revelan la gloria de Dios
Parti 4 di e foyeto Cómo lograr una vida llena de satisfacción; e foyetonan Bida Ta Obra di un Kreador? i El origen de la vida. Cinco cuestiones dignas de análisis
• Si el a stòp di kere den Dios pa motibu di inhustisia i sufrimentu, e siguiente publikashonnan por ta útil:
Kapítulo 10 di e buki ¿Existe un Creador que se interese por nosotros?
Parti 6 di e foyeto Dios Realmente Ta Interesá Den Nos? i sekshon 6 di e foyeto ¿Qué propósito tiene la vida?
• Na momento ku e persona kuminsá aseptá e idea ku ta eksistí un Dios, kambia mesora pa e buki Beibel Ta Siña. Lo ta bon pa kuminsá na kapítulo 2 òf kualke otro tema ku ta apropiá p’e.
[Kuadro na página 5]
Purba esaki si un hende no ta kere den Beibel:
• Analisá kapítulo 17 i 18 di e buki La vida. . . ¿cómo se presentó aquí? ¿Por evolución, o por creación?
• Si e ta hindú, usa e foyeto ¿Por qué debemos adorar a Dios con amor y verdad?
• Si e ta hudiu, bai na página 3-11 di e foyeto Hamas Lo Yega di Tin un Mundu Sin Guera?
• Trata e benefisionan di e siguiente prinsipionan di Beibel. Algun publikashon ku bo por usa pa mustra un hende kon práktiko Beibel ta:
E seri “Ayuda para las familias”den ¡Despertad!
E DVD La Biblia: el poder que ejerce en su vida
Lès 9 i 11 di e foyeto Dios Tin Bon Notisia pa Nos!; página 22-26 di e foyeto Un Buki pa Tur Hende i parti 2 di e foyeto Cómo lograr una vida llena de satisfacción
Si e ta budista, bai na página 3-7 di e foyeto El camino de la paz y la felicidad
Si e ta mòslem, bai na sekshon 3 di e foyeto La fe verdadera, la puerta a una vida feliz
Si bo ta prediká den teritorio kaminda hende no ke tende di Beibel, lo ta mihó pa bo no menshoná di unda bo a haña e bon informashon ku bo ta kompartiendo ku nan, sino te despues di algun bishita.
• Splika kon profesianan di Beibel a kumpli. Publikashonnan ku bo por usa ta:
E DVD La Biblia: historia exacta, profecía confiable
Página 27-29 di e foyeto Un Buki pa Tur Hende
• Si e persona kuminsá puntra kiko Beibel ta siña tokante sierto tópiko, kambia mesora pa e buki Beibel Ta Siña.
[Komentario di e plachi na página 6]
Si un hende bisa: “Mi no ta kere den Dios,” bo por puntr’é:
• “Mi por splika bo brevemente kiko a konvensé ami pa kere den un Kreador?” Anto mustr’é algun punto for di e buki Rasonamentu, na spañó, página 87-89, òf hasi areglo pa trese un publikashon ku a yuda bo.
• “Pero si di bèrdat tin un Dios, ki klase di Dios lo bo a deseá p’e ta?” Hopi hende lo bisa ku nan lo sinti nan atraí na un Dios di amor, di hustisia i di miserikòrdia, i ku no ta hasi distinshon di persona. Mustr’é for di Beibel ku Dios tin e kualidatnan ei. (Kisas bo por asta usa kapítulo 1 for di e buki Beibel Ta Siña, kuminsando ku paragraf 6.)
Si un hende bisa: “Mi no ta kere den Beibel,” bo por bis’é:
• “Hopi hende ta pensa mesun kos. Algun tin e pensamentu ku Beibel no ta un buki sientífiko i ku su normanan no ta práktiko. Pero, abo a yega di lesa Beibel? [Permití e persona kontestá. Anto mustr’é e introdukshon na página 3 di e foyeto Un Buki pa Tur Hende i ofres’é e foyeto.] Hopi hende no ta kere den Beibel pasobra religion a duna Beibel un mal nòmber. Otro biaha lo mi kier a trata ku bo e ehèmpel ku tin na página 4 i 5.”
• “Hopi hende ta kompartí bo punto di bista. Mi por mustra bo algu ku a impreshoná ami di Beibel? [Lesa Yòb 26:7 òf Isaías 40:22, ku ta proba ku Beibel ta sientífikamente eksakto.] Pero Beibel tin konsehonan práktiko tambe pa yuda famianan. Un otro biaha lo mi ke mustra bo un par di ehèmpel.”
• “Danki pa bisa mi esei. Si Dios a skirbi un buki pa humanidat, kiko bo ta kere lo el a kontené?” Anto mustra e persona un ke otro teksto di Beibel ku ta kuadra ku loke el a bisa.