Usa e Foyeto Kiko Nos Por Siña for di e Palabra di Dios? pa Kuminsá Kòmbersashon

1. Kua foyeto nobo nos tin pa yuda nos den sirbishi?

¹ Parti dilanti di e edishon revisá di e Tradukshon di Mundu Nobo, na ingles, tin un sekshon ku tin 20 pregunta. Nos a haña e sekshon akí na papiamentu den forma di e foyeto: Kiko Nos Por Siña for di e Palabra di Dios? Kon nos por usa e foyeto akí ora nos ta prepará presentashon pa sirbishi? Mirando ku e ta agrupá teksto di Beibel bou di vários tema, meskos ku e buki Rasonamentu, e foyeto por ta útil pa kuminsá kòmbersashon.

2. Kon nos por usa e foyeto Kiko Nos Por Siña den sirbishi?

² Por ehèmpel, si nos usa pregunta 8 nos por bisa: “Segun ku nos ta papia ku vários hende nos a ripará ku hopi ta puntra nan mes: ‘Ta Dios ta pone hende sufri?’ [Den algun teritorio ta mihó pa mustra e persona e pregunta.] Kiko abo ta pensa? [Permití e persona kontestá.] Beibel ta duna nos un kontesta satisfaktorio tokante esei.” For di Beibel lesa i trata un òf mas di e tekstonan sitá. Si e persona mustra interes bo por mustr’é e lista di e 20 preguntanan na e promé página i pidié skohe un di nan pa trata na e siguiente bishita. Òf bo por ofres’é un di nos publikashonnan di estudio ku tin mas informashon tokante e tema ku boso a trata.

3. Kon nos por usa e foyeto Kiko Nos Por Siña pa kuminsá kòmbersashon den teritorio di hende ku ta pertenesé na un religion no-kristian?

³ E preguntanan 4 i 13 te ku 17 por ta di gran yudansa ora nos ta prediká den teritorio di hende ku ta pertenesé na un religion no-kristian. Por ehèmpel, bo por usa e informashon relashoná ku pregunta 17 i bisa: “Awe nos bishita ta pa yuda famianan. Bo ta di akuerdo ku famia awendia ta enfrentá mas i mas problema? [Permití e persona kontestá.] Hopi pareha a haña ku e siguiente konseho a yuda nan bon: ‘E esposa mester tin rèspèt profundo pa su esposo.’ [No tin nodi di bisa ku e palabranan akí ta di Efesionan 5:33. Si ta ku un hende muhé bo ta papia bo por menshoná e palabranan di Efesionan 5:28.] Bo ta kere ku ta bale la pena pa parehanan apliká e konseho ei?”

4. Kiko bo por hasi na final di bo kòmbersashon ku un persona ku ta pertenesé na un religion no-kristian?

⁴ Na final di bo kòmbersashon, traha un afsprak pa sigui papia di e tema. Na e siguiente bishita kisas bo por papia tokante un di e otro tekstonan di Beibel ku tin bou di e pregunta ku bo a trata. Ora bo ta sinti ku ta apropiá, laga e persona sa ku e palabranan ku bo a kompartí kuné ta di Beibel. A base di bo kòmbersashonnan anterior i e manera ku e persona ta mira Beibel, ofres’é un publikashon ku bo ta pensa por interes’é.—Wak e suplemento den Nos Ministerio di Reino di desèmber 2013.