Ilustrashon Basá Riba Situashonnan Konosí

NATURALMENTE ta importante pa e ilustrashonnan ku bo ta usa ta pas ku e tema ku bo ta trata. Pero pa nan ta mas efikas, ta importante tambe pa nan ta adekuá pa bo ouditorio.

Kon e tipo di ouditorio ku bo ta papia kuné por determiná ki ilustrashon bo ta skohe? Kiko Hesukristu a hasi? Sea ku e tabata papia ku un multitut òf ku su disipelnan, Hesus no a saka su ehèmpelnan for di kulturanan pafó di Israel, ya ku eseinan lo tabata deskonosí pa su ouditorio. Por ehèmpel, Hesus no a menshoná e estilo di bida di e famia real di Egipto ni e ritonan religioso di India. Mas bien, el a basa su ilustrashonnan riba aktividatnan ku ta komun pa hende di tur pais. El a papia di drecha paña, hasi negoshi, pèrdè un opheto balioso i asistí na fiesta di kasamentu. E tabata sa kon hende ta reakshoná bou di vários sirkunstansia, i el a hasi uso di e konosementu aki. (Mar. 2:21; Luk. 14:7-11; 15:8, 9; 19:15-23) Komo ku Hesus su predikashon públiko tabata dirigí partikularmente na e pueblo di Israel, su ilustrashonnan generalmente a trata di ophetonan i aktividatnan ku tabata parti di nan bida diario. P’esei el a referí na kosnan manera trabou di kunuku, e manera ku karné ta reakshoná riba nan wardadó i e uso di saku di kueru pa warda biña. (Mar. 2:22; 4:2-9; Huan 10:1-5) Tambe Hesus a sita ehèmpelnan históriko konosí, entre otro, e kreashon di e promé pareha humano, e Diluvio di tempu di Noe, e destrukshon di Sódoma i Gomora i e morto di Lòt su esposa. (Mat. 10:15; 19:4-6; 24:37-39; Luk. 17:32) Ora di skohe ilustrashon, bo tambe ta pensa kuidadosamente riba e aktividatnan ku bo ouditorio konosé i ku tin di haber ku nan kultura?

Awor kiko si bo no ta papia ku un grupo grandi, sino ku un persona so òf ku djis un par di hende? Hasi esfuerso pa skohe un ilustrashon ku ta adekuá pa nan. Ora Hesus a prediká na un muhé samaritano na un pos serka di Síkar, el a papia di “awa bibu,” di ‘no haña set nunka mas’ i di “un fuente di awa ku ta brota pa bida eterno,” usando asina ekspreshonnan figurativo ku tabata direktamente konektá ku e muhé su trabou. (Huan 4:7-15) I ora el a papia ku hòmbernan ku tabata laba nan redanan di piska, e ekspreshonnan figurativo ku el a skohe tabatin di haber ku piskamentu. (Luk. 5:2-11) Den ámbos kaso lo e por a referí na trabou di kunuku, siendo ku nan a biba den un área di agrikultura; sin embargo, dor di referí na nan aktividat personal el a pinta, na moda di papia, un kuadro mental hopi realístiko i efikas pa su oyentenan. Abo ta hasi esfuerso pa imit’é?

Distinto for di Hesus ku a dirigí atenshon na “e karnénan pèrdí di e kas di Israel,” apòstel Pablo a risibí e enkargo pa bai no solamente na Israel sino tambe na e nashonnan pagano. (Mat. 15:24; Echo. 9:15) Esaki a trese un kambio den e manera ku Pablo a papia? Sí. Ora el a skirbi e kristiannan na Korinto, el a menshoná kompetensia di korementu, e kustumber di kome karni den tèmpel di ídolo i e proseshonnan di triunfo, kosnan ku e nashonnan ei tabata konosé.—1 Kor. 8:1-10; 9:24, 25; 2 Kor. 2:14-16.

Bo ta skohe bo ilustrashonnan i ehèmpelnan ku e mesun kuidou ku Hesus i Pablo? Bo ta tene kuenta ku e ambiente i e aktividatnan diario di bo oyentenan? Klaru ku mundu a kambia hopi kompará ku promé siglo. Awendia televishon ta tene kantidat di hende al tantu di notisianan mundial, i hopi bes nan ta konosí ku asuntunan di paisnan leu. Si esei ta e kaso kaminda bo ta biba, sigur no tin nada malu pa basa bo ilustrashonnan riba e notisianan ei. No opstante, loke sa tin mas efekto riba hende ta loke ta toka nan propio bida: nan kas, nan famia, nan trabou, e kuminda ku nan ta kome i e klima di nan lugá.

Si un ilustrashon mester di demasiado splikashon, probablemente bo ta papiando di algu ku bo oyentenan no konosé i esei fásilmente por tapa e punto ku bo kier siña nan. Komo resultado bo ouditorio kisas ta kòrda bo ilustrashon, pero no e bèrdat bíbliko ku bo kier a transmití.

En bes di hasi komparashonnan kompliká, Hesus a usa asuntunan simpel i di bida diario. El a usa kosnan chikí pa splika kosnan grandi, i kosnan simpel pa aklará kosnan kompliká. E tabata konektá e bèrdatnan spiritual ku el a siña hende ku susesonan di bida diario, i asina el a hasi nan mas fásil pa komprondé i kòrda. Sin duda, el a laga un ehèmpel magnífiko pa nos.