Esfuerso pa Yega na Kurason

FUERA di duna hende un testimonio, bo tin ku hasi esfuerso pa yega na nan kurason. Beibel hopi bes ta hasi un kontraste entre loke tin den kurason ku loke un persona ta aparentá di ta. E kurason simbóliko ta representá loke e hende ta di paden: loke e ta sinti, loke e ta pensa, dikon e ta pensa riba esei i kon e pensamentunan ei ta influensiá su echonan. Ta den e kurason simbóliko aki nos ta sembra e simia di e bèrdat. (Mat. 13:19) I ta di kurason hende mester obedesé Dios.—Pro. 3:1; Rom. 6:17.

Pa bo siñansa por yega te na e kurason dje hende, bo tin ku konsentrá riba e siguiente metanan: (1) Determiná kiko a forma e kurason di bo oyente kaba. (2) Inkulká bon kualidatnan, manera amor i temor di Dios den dje. (3) Animá bo oyente pa analisá su motibunan íntimo, pa asina e por agradá Yehova plenamente.

Usa Disernimentu. Tin vários motibu pakiko algun hende ainda no a aseptá e bèrdat. Tin biaha ora bo ta studia Beibel ku un persona, lo bo tin ku vense su prehuisio i presentá echonan ku ta kontrarestá su ideanan robes; den otro kasonan kisas ta sufisiente si bo trese pruebanan dilanti. Puntra bo mes: ‘E persona aki sa ku komo ser humano e tin nesesidatnan spiritual? Kiko ta e kosnan ku e ta kere kaba? Kiko e no ta kere? Dikon el a yega na e konklushonnan ei? E tin mester di yudansa pa vense deseonan ku lo por strob’é di aseptá e responsabilidatnan ku un konosementu di e bèrdat ta trese kuné?’

No ta semper fásil pa haña sa dikon hende ta kere sierto kosnan. Proverbionan 20:5 ta bisa: “Un plan den kurason di un hende ta manera awa hundu, ma un hende di komprondementu [“disernimentu,” NW] ta saka esaki afó.” Disernimentu ta e kapasidat di kapta loke no ta bisto mesora. Pa desplegá esei nos mester ta un bon opservadó i alabes komprensivo.

No ta tur kos hende ta komuniká ku boka. Un sierto tópiko por pone e kara òf tono di bos di un studiante kambia. Si bo ta un tata òf mama, sin duda bo sa ku ora e komportashon di bo yu kambia, esei por ta un indikashon ku e ta reakshonando riba un influensia nobo den su bida. No ignorá e señalnan aki. Nan ta permití bo haña un bista di loke tin den e persona su kurason.

Preguntanan bon pensá por yuda bo saka afó kiko ta biba den un hende su kurason. Lo bo por puntra: “Kiko bo ta pensa di . . . ?” “Kiko a konvensé bo ku . . . ?” “Kiko lo bo hasi si . . . ?” Sin embargo, tene kuidou pa bo no bombardiá e persona ku demasiado pregunta. Lo bo por usa takto i introdusí bo preguntanan ku: “Mi tin mag di hasi bo un pregunta?” Bo tin ku hasi basta esfuerso pa saka afó kiko ta biba den kurason di un hende; no ta kos ku bo ta logra di un dia pa otro. Den mayoria kaso bo tin ku gana e persona su konfiansa promé, pa asina e por ta dispuesto pa revelá su sintimentunan di mas íntimo, i esaki ta tuma tempu. I asina mes bo tin ku tene kuidou pa no laga e studiante sinti ku bo ta metiendo den su bida personal.—1 Ped. 4:15.

Tambe bo mester tin disernimentu pa kontrolá kon bo ta reakshoná riba loke bo tende. Kòrda ku bo meta ta pa komprondé hende pa asina bo por determiná ki informashon bíbliko probablemente lo motivá nan. No sea muchu hanshá pa mustra nan mesora kua ta e puntonan di bista robes ku nan tin. Mas bien, sea atento pa kapta e sintimentu tras di nan palabranan. E ora ei lo bo sa kon bo tin ku reakshoná; i komo ku bo studiante lo sinti ku bo ta komprond’é, tin mas chèns ku lo e pensa seriamente riba loke bo ta bisa.—Pro. 16:23.

Asta ora di papia ku un grupo grandi ta posibel pa, te na sierto grado, bo motivá personanan individual. Si bo tin bon kontakto visual ku bo ouditorio, i ta atento pa wak nan ekspreshonnan di kara i ta hasi preguntanan ku ta duna nan kos pa pensa ariba, lo no ta difísil pa bo haña un idea di kiko nan ta opiná di loke bo ta bisando. Si bo konosé bo ouditorio bon, tuma nan sirkunstansianan na konsiderashon. Kòrda tambe riba e aktitut general di e kongregashon ora bo ta rasoná ku nan for di e Palabra di Dios.—Gal. 6:18.

Stimulá Sintimentunan Positivo den Bo Oyente. Unabes bo ta komprondé kiko e persona ta kere i kiko nò, i tambe e motibunan pa esei, lo bo por edifiká riba e base ei. Despues di su resurekshon, Hesus a yega na kurason di su disipelnan dor di ‘splika nan e Skrituranan’ relashoná ku e susesonan ku a kaba di tuma lugá. (Luk. 24:32) Abo tambe mester purba konektá loke e persona a yega di pasa aden i loke e ta deseá, ku loke e ta mira den e Palabra di Dios. Anto ora e studiante realisá bon kla den su mes, “Esaki ta E BÈRDAT!,” bo a yega na su kurason.

Ora bo ta enfatisá Yehova su bondat, su amor, su miserikòrdia i e hustisia di su kamindanan, bo ta yuda e personanan ku bo ta siña haña mas amor pa Dios. Ora bo dediká tempu na mustra bo oyentenan e bon kualidatnan ku Dios ta mira den nan komo persona, bo ta duna nan motibu pa kere ku nan por tin un relashon personal kuné. Un manera pa logra esaki ta dor di invitá nan pa reflekshoná riba tekstonan manera Salmo 139:1-3, Lukas 21:1-4 i Huan 6:44. Tambe bo por mustra nan kuantu kariño Yehova tin pa su siguidónan fiel. (Rom. 8:38, 39) Splika nan ku Yehova ta wak mas ayá di e foutnan ku nos ta hasi i ta mira henter e kurso di nos bida, nos selo pa adorashon puru i nos amor pa su nòmber. (2 Kró. 19:2, 3; Heb. 6:10) E ta kòrda e detaye di mas chikí di nos ser, i den un manera ekstraordinario, lo e resusitá “tur ku ta den graf.” (Huan 5:28, 29; Luk. 12:6, 7) Komo ku Dios a traha hende den su imágen i semehansa, ta fásil pa un kòmbersashon tokante e kualidatnan di Dios stimulá un reakshon faborabel i sinsero di parti di e persona.—Gén. 1:27.

Nos por konmové un hende su kurason tambe ora e persona siña mira otro hende manera Yehova ta mira nan. Ta lógiko ku si Dios ta trata nos kada un ku ternura, e ta mustra e mesun konsiderashon ei pa otro hende, sin importá nan background, nashonalidat òf rasa. (Echo. 10:34, 35) Unabes un studiante komprondé esei, lo e tin un base bíbliko firme pa saka odio i prehuisio for di su kurason, i esaki lo permitié disfrutá di relashonnan pasífiko ku otro hende segun ku e ta sigui siña pa kumpli ku e boluntat divino.

Temor di Dios ta un otro sintimentu ku bo mester purba yuda hende kultivá. (Sal. 111:10; Rev. 14:6, 7) Temor di Dios, es desir, un rèspèt profundo pa Dios, por motivá un persona pa logra kosnan ku lo no ta posibel riba su mes forsa. Si bo papia ku hende tokante e kosnan impreshonante ku Yehova a hasi i tokante su bondat ekstraordinario, lo bo por yuda nan kultivá un temor sano, e temor di desagrad’é.—Sal. 66:5; Yer. 32:40.

Hasi sigur ku bo oyentenan ta komprondé ku nan komportashon ta importante pa Yehova. E tin sintimentu, i e manera ku nos ta reakshoná riba su mandamentunan por hasié tristu òf kontentu. (Sal. 78:40-42) Mustra hende ku nos komportashon ta hunga un papel importante den kontestá e desafio i reproche ku Satanas a lansa kontra Dios.—Pro. 27:11.

Yuda bo ouditorio mira ku ta pa nan mes bon nan ta kumpli ku e rekisitonan di Dios. (Isa. 48:17) Un manera ku bo por hasi esaki ta dor di mustra riba e konsekuensianan físiko i emoshonal di rechasá e sabiduria di Dios maske ta pa un momentu so. Splika nan ku piká ta alehá nos for di Dios, ta stroba otro hende di siña e bèrdat for di nos i tambe ta trapa nan derechonan. (1 Tes. 4:6) Yuda bo ouditorio mira e balor di e bendishonnan ku nan ta disfrutá di dje kaba dor ku nan ta kumpli ku e leinan di Dios. Stimulá nan apresio pa e echo ku e kamindanan di Yehova ta spar esnan ku ta kana den nan di hopi difikultat. Unabes ku un persona tin fe ku e kamindanan di Dios ta e rumbo sabí pa sigui, lo e sinti asko pa tur proseder ku ta kontrario na nan. (Sal. 119:104) En bes di mira obedensia komo un karga, lo e mir’é komo un manera pa ekspresá su amor i deboshon na Yehova.

Yuda Bo Próhimo Analisá Su Mes. Pa hende por sigui krese den sentido spiritual, nan mester ser motivá pa loke tin den nan kurason. Splika nan kon Beibel por yuda nan hasi esaki.

Yuda bo oyentenan komprondé ku Beibel no ta djis un buki di mandamentu, konseho, suseso históriko i profesia, sino ku tambe e ta revelá e pensamentunan di Dios. Na Santiago 1:22-25, e Palabra di Dios ta ser kompará ku un spil. E mensahe bíbliko ta saka na kla kiko tin den nos kurason mediante nos reakshon riba su siñansa i riba e manera ku Yehova ta kumpli ku su propósito. Kier men ku e ta indiká tambe kon Dios, Esun ku ta sondia òf eksaminá kurason, ta mira nos. (Pro. 17:3) Animá e hendenan ku ta skucha bo pa no lubidá esei. Stimulá nan pa reflekshoná riba loke Dios a konserbá pa nos den Beibel i tambe riba e kambionan ku nan tin ku hasi den nan bida pa por agrad’é mas. Yuda nan komprondé ku lesamentu di Beibel ta un manera pa haña sa kon Yehova ta mira nos “pensamentunan i intenshonnan di kurason,” ya asina nan por koperá ku Dios pa hasi e ahustenan nesesario.—Heb. 4:12; Rom. 15:4.

Algun studiante di Beibel kier pone na práktika loke nan ta siña; pero nan ta preokupá ku kiko otro hende lo pensa di nan. Kisas nan ta lucha ku deseonan karnal fuerte òf nan ta purba haña un manera di sirbi Dios sin bandoná e práktikanan di mundu. Mustra nan riba e peliger di ta indesiso asina. (1 Rei. 18:21) Animá nan mashá pa resa pidi Dios eksaminá nan kurason i refin’é.—Sal. 26:2; 139:23, 24.

Mustra nan ku Yehova ta komprondé e lucha ku nan tin i ku Beibel ta splika loke ta tumando lugá ku nan. (Rom. 7:22, 23) Spièrta nan pa nan no laga e inklinashonnan di nan kurason imperfekto dominá nan.—Pro. 3:5, 6; 28:26; Yer. 17:9, 10.

Animá kada studiante pa analisá e motibunan pakiko e ta hasi algu. Siñ’é puntra su mes: ‘Dikon mi kier hasi esaki? Esei lo mustra Yehova ku di bèrdat mi ta apresiá tur loke el a hasi pa mi?’ Yuda nan haña e konvikshon firme ku un bon relashon ku Yehova ta e poseshon mas balioso ku un hende por tin.

Yuda bo ouditorio kapta kiko ta nifiká sirbi Yehova ku ‘henter nan kurason.’ (Luk. 10:27) Esaki ta nifiká ku nan tin ku ahustá tur nan sintimentunan, nan deseonan i nan motivashonnan di akuerdo ku e kamindanan di Yehova. Pues, bo tin ku siña nan pa no solamente analisá kiko nan ta hasi, sino tambe kiko nan ta sinti pa e rekisitonan di Dios i ku ki motibu nan ta sirbié. (Sal. 37:4) Segun ku bo studiantenan ta deskubrí áreanan ku nan mester mehorá, animá nan pa roga Yehova: “Uni mi kurason pa teme bo nòmber.”—Sal. 86:11.

Ora un studiante kultivá un relashon personal ku Yehova, lo e no obedesé Dios pasobra abo ta push’é, sino ku lo e hasié debí na su fe. E ora ei, riba su mes lo e hasi sigur di “loke ta agradabel na Señor.” (Efe. 5:10; Fil. 2:12) Yehova ta keda kontentu ku tal obedensia di kurason.—Pro. 23:15.

No lubidá ku Yehova ta esun ku ta evaluá kurason i ta atraé hende pa disfrutá di un relashon kuné. (Pro. 21:2; Huan 6:44) Nos papel ta di kolaborá ku Yehova. (1 Kor. 3:9) Ta komo si fuera ‘Dios ta usa nos pa hasi su apelashon na hende.’ (2 Kor. 5:20; Echo. 16:14) Yehova no ta fòrsa ningun hende aseptá e bèrdat, pero segun ku nos ta usa e Skritura, e por laga nos oyentenan komprondé ku nan ta skuchando e kontesta riba nan preguntanan òf riba nan orashonnan. Tene esaki semper na mente ora bo ta bai siña un hende, i pidi Yehova sinseramente pa duna bo su guia i yudansa.—1 Kró. 29:18, 19; Efe. 1:16-18.