Dos Mensahe di Dios

Bon mirá, nos por konsiderá Beibel kompleto komo un mensahe di Dios. Nos Tata selestial a perkurá esaki pa nos instrukshon. Pero, laga nos analisá dos mensahe spesial ku a ser entregá kasi 2.000 aña pasá. E persona ku a entregá nan tabata un angel ku yama Gabriel, kende semper ta “dilanti di Dios.” (Lukas 1:19) Awor, bou di ki sirkunstansia e angel a entregá e mensahenan importante akí?

Na ken el a entregá e promé mensahe? Wèl, tabata alrededor di aña 3 promé ku Kristu. Tabatin un saserdote di Yehova ku tabata yama Zakarías, kende tabata biba den e serunan di Hudea, probablemente no muchu leu for di Herúsalèm. E ku su kasá, Elisabèt, tabata di edat avansá i nan no tabatin yu. Tabata Zakarías su turno pa sirbi komo saserdote den e tèmpel di Dios na Herúsalèm. Ora Zakarías tabata den e tèmpel, diripiente Gabriel a aparesé banda di e altar di ofresé sensia.

Ta di komprondé ku Zakarías a spanta. Pero Gabriel a trankilis’é, bisando: “No tene miedu, Zakarías, pasobra Dios a tende bo súplika, i bo esposa, Elisabèt, lo duna lus na un yu hòmber, i bo tin ku yam’é Huan.” Anto Gabriel a bis’é ku Huan lo “ta grandi den bista di Yehova” i ku Huan lo a “prepará un pueblo pa Yehova.”—Lukas 1:13-17.

Pero komo ku Zakarías i Elisabèt tabata grandi kaba, Zakarías no por a kere e angel. P’esei, Gabriel a bis’é: “Lo bo keda muda, sin por papia, te dia ku e kosnan akí sosodé, pasobra bo no a kere mi palabranan.”—Lukas 1:20.

Mientrastantu, e hendenan pafó tabata puntra nan mes dikon Zakarías a tarda asina tantu. Finalmente el a bini pafó, pero e no por a papia; ta seña so e por a hasi ku su mannan. Tabata bisto anto ku el a mira algu sobrenatural ora e tabata den e tèmpel.

Despues ku Zakarías a kumpli ku su sirbishi den tèmpel, el a bai kas. I no a dura mashá ku Elisabèt a sali na estado! Durante sinku luna di su embaraso, Elisabèt no a sali for di kas.

Despues, Gabriel a aparesé pa di dos biaha. Na ken? Na un mucha muhé soltero ku tabata yama Maria, kende tabata biba na Názarèt, den e region di Galilea ku tabata keda nort di Herúsalèm. Kiko e angel a bisa Maria? El a bis’é: “Bo a haña aprobashon di Dios. I lo bo sali na estado i duna lus na un yu hòmber, i bo tin ku yam’é Hesus. Lo e ta grandi i lo ser yamá Yu di e Haltísimo, . . . i lo e reina komo Rei pa semper riba e kas di Yakòb, i lo no tin fin na su Reino.”—Lukas 1:30-33.

Bo por imaginá bo kon privilegiá angel Gabriel lo a sintié debí ku e por a entregá e dos mensahenan ei? Segun ku nos ta lesa mas tokante Huan i Hesus, nos lo mira dikon e mensahenan akí ku a bini for di shelu tabata asina importante.