Laga Asuntu di Trabou Keda na Trabou

Den e era di teknologia aki, bo doño di trabou, bo koleganan òf bo klientenan ta ferwagt ku lo bo ta disponibel 24 ora pa dia, 7 dia pa siman. I esei ta pone ku ta bira difísil pa bo separá bo trabou for di bo bida privá. E separashon ei ta importante pa yuda bo duna prioridat na otro aspektonan di bo bida, inkluso bo matrimonio.

• Loke bo mester sa

• Algun tep pa balansá bo bida privá i bo trabou

• Loke otro pareha ta bisa

• Guia pa kòmbersashon

Loke bo mester sa

• Teknologia por stroba bo di distinguí ki ora bo mester dediká tempu na trabou i ki ora bo mester dediká tempu na bo matrimonio. Si ta asina, kada yamada, e-mail òf mensahe ku bo risibí den bo tempu liber por bira manera un problema ku bo tin ku atendé mesora.

  “E kustumber di yega kas despues di trabou i dediká tempu na bo famia, a bira kasi imposibel, pasobra matrimonio a ser poné un banda pa atendé e-mail i yamada di telefòn ku ta drenta.”—Jeanette

• Ta abo tin ku tuma inisiativa pa mantené un balansa entre bo trabou i bo bida privá. Si bo no plania adelantá, bo trabou por kuminsá hòrta tempu for di bo matrimonio.

  “Promé hende ku bo ta neglishá ta bo kasá pasobra bo ta pensa: ‘E ta komprondé pa mi. Lo e no tuma mi na malu. Lo mi pasa mas tempu kuné despues.’”—Holly

Algun tep pa balansá bo trabou i bo bida privá

• Duna bo matrimonio prioridat. Beibel ta bisa: “No laga ningun hende separá loke Dios a uni bou di un yugo.” (Mateo 19:6) Si bo no ke laga hende separá bo for di bo kasá, dikon lo bo laga bo trabou sí hasi esei?

  “Algun kliente ta pensa ku pasobra nan ta paga bo, bo mester ta alkansabel ki ora ku nan tin mester di bo. Mi matrimonio tin prioridat pa mi, p’esei mi ta bisa nan ku mi no ta disponibel riba mi dianan liber, pero ku lo mi yama nan mas pronto ku ta posibel.” —Mark.

  Puntra bo mes: ‘Loke mi ta hasi ta demostrá ku mi matrimonio ta mas importante ku mi trabou?’

• Bisa nò ora ta nesesario. Beibel ta bisa: “Ma sabiduria ta serka e humildenan.” (Proverbionan 11:2) Si bo ta humilde, òf modesto, lo bo mira ku ta sabí pa nenga òf delegá un parti di bo trabou.

  “Mi ta un pipefitter. Pues ora un hende mester di mi yudansa urgente, e ta bira anshá. Si mi no por yega serka dje na e momento ku e ke, mi ta konseh’é pa pidi un otro un hende yud’é.” —Christopher

  Puntra bo mes: ‘Mi ta dispuesto pa nenga trabou èkstra pa mi no laga mi kasá sintié neglishá? Kon mi kasa lo sintié?’

• Traha tempu pa boso ta huntu. Beibel ta bisa: “Tin un tempu stipulá pa tur kos.” (Eklesiástes 3:1) Ora bo tin hopi trabou tambe bo tin ku traha tempu òf saka tempu pa bo dediká na bo matrimonio.

  “Asta ora nos tin hopi trabou nos ta saka tempu pa pasa un ratu huntu, sea pa kome huntu òf pa kana kantu di laman.” —Deborah

  Puntra bo mes: mi ta apartá tempu spesífiko pa duna mi kasá atenshon sin interupshon? Kiko mi kasá lo kontestá?

• Paga boso telefòn. Beibel ta bisa: “Hasi sigur di e kosnan mas importante.” (Filipensenan 1:10) De bes en kuando bo por paga bo telefòn pa nada di trabou no distraé bo?

  “Mi ta hasi tur mi esfuerso pa mi stòp ku trabou na un ora stipulá. Anto na e momento ei, mi ta desaktivá e notifikashonnan riba mi telefòn.”—Jeremy

  Puntra bo mes: ‘Mi ta sinti mi obligá di keda alkansabel pa si akaso mi doño di trabou tin mester di mi? Kon mi kasá lo reakshoná?’

• Keda rasonabel. Beibel ta bisa: “Laga tur hende mira ki rasonabel boso ta” (Filipensenan 4:5) Ta di komprondé ku tin biaha bo mester hasi sierto kos pa trabou. Por ehèmpel, kisas e tipo di trabou ku bo kasá ta trahá ta pone ku e mester ta disponibel despues di ora di trabou. Pues no eksigí mas di bo kasa ku ta nesesario.

  “Mi kasá tin un kompania chikitu i hopi biaha e tin ku atendé emergensia ku ta surgi despues di ora di trabou. Tin biaha e kos ei ta iritá mi, pero tòg nos tin sufisiente tempu pa dediká na otro, pues mi ta keda kontentu.”—Beverly

  Puntra bo mes: ‘Mi ta rasonabel ku mi kasá i ta evitá di pidié mas tempu ku e por duna mi? Kiko mi kasá lo kontestá?’

Guia pa kòmbersashon.

Promé, purba di kontestá e preguntanan akí pa bo mes. Despues konsiderá e kontestanan huntu.

• Bo kasá a yega di reklamá ku bo ta sigui traha despues di ora di trabou? Si ta asina, bo ta di akuerdo?

• Den kua aspekto bo por mehorá pa haña un bon balansa entre bo bida privá i bo trabou?

• Bo a yega di ripará ku bo kasá no por laga asuntu di trabou keda na trabou? Kua kaso asina bo por kòrda?

• Kua kambionan bo ke pa bo kasá hasi pa e logra un bon balansa entre su trabou i su bida privá?