Kon pa Mantené un Bon Relashon ku Boso Famianan

Kasamentu ta komienso di un famia nobo. Maske semper lo bo keda stima i respetá bo mayornan, awor e persona di mas importante pa bo riba e mundu akí ta bo kasá. Podisé ta difísil pa algun di bo famianan aseptá esei. Pero Beibel por yuda bo trata ku e asuntu akí na un manera balansá. Ademas, e por yuda bo keda ku un bon relashon ku bo mayornan, suegronan i otro miembronan di boso famia segun ku bo ta traha duru pa fortalesé boso bida di famia nobo.

1 MIRA BOSO FAMIANAN FOR DI UN PUNTO DI BISTA KOREKTO

LOKE BEIBEL TA BISA: “Onra bo tata i bo mama.” (Efesionan 6:2) Maske kon grandi bo bira, semper bo mester onra i respetá bo mayornan. Pero kòrda ku bo kasá tambe ta yu. E tambe mester duna su mayornan atenshon. “Amor no ta yalurs,” pues nunka sinti ku e relashon ku bo kasá tin ku su mayornan ta un menasa pa bo.—1 Korintionan 13:4; Galationan 5:26.

LOKE BO POR HASI:

• Evitá di duna komentario eksagerá manera: “Semper bo famia ta rebahá mi” òf “Nada ku mi hasi bo mama no ta gusta”

• Pone bo mes den sapatu di bo kasá

2 ORA TA NESESARIO, SEA FIRME

LOKE BEIBEL TA BISA: “Un hòmber lo bandoná su tata i su mama i lo uni ku su esposa. I nan lo bira ún karni.” (Génesis 2:24) Asta despues ku boso kasa, boso mayornan kisas ta sigui sinti ku nan ta responsabel pa boso, i kisas nan ke tin muchu di bisa den boso matrimonio.

Ta abo ku bo kasá mester disidí te kon leu boso ke pa nan yega i splika nan esei na un manera nèchi. Sí, boso por ta habrí i franko sin tin nodi di papia malu ku hende. (Proverbionan 15:1) Humildat, suavedat i pasenshi lo yuda boso desaroyá un dushi relashon ku boso famianan i sigui ‘soportá nan den amor.’—Efesionan 4:2.

LOKE BO POR HASI:

• Si bo ta preokupá ku boso famianan ta mete den boso bida, papia e asuntu ku bo kasá un ora ku boso tur dos ta trankil

• Disidí huntu kon boso ta bai atendé e asuntu akí