Noticia na Television—Cuantu di dje Ta Egt Noticia?

Despues di a analisá 102 noticiero local di television di 52 stad grandi na Merca riba nan contenido i presentacion, un grupo cu ta vigilá medionan di comunicacion a descubrí cu solamente 41,3 porciento dje programanan a contené noticia. Di kico e resto dje noticiero ta consistí?

Como promedio, 30,4 porciento dje tempu di transmision di noticianan local na television ta consistí di propaganda. De echo, algun canal cu nan a analisá a dedicá mas tempu na propaganda cu na noticia. Ademas, segun e raport cu a resumí e descubrimentunan dje estudio, hopi bes nan ta yena ora di noticia cu ‘fluff’ [informacion irelevante].a Bou dje subtema “Fluff,” e raport ta clasificá “e total di tempu den aire cu ta bai na combersacion entre e presentadónan, na promocion i na avance di noticianan cu ta bai sigui, na noticianan sentimental of di payasada i noticianan tocante personanan famoso.” Un muestra di algun noticia ‘fluff’: “Contest di Tenornan Cu Ta Canta Malu,” “Reportero Ta Tuma un Careda ‘Impresionante, Increibel i Asombroso’ den Montaña Ruso,” i “Mas Hende Ta Cumpra ‘Sandwich Spread’ na Supermarket.”

Di kico e noticia mes ta consistí? Noticianan di crímen ta dominá television, consistiendo di 26,9 porciento dje tempu di transmision di noticia. “‘Si tin sanger, e ta titular di noticia’ ta un berdad obvio ainda den noticianan local di television . . . Por ta berdad cu índice di crímen a baha na tur parti di Merca durante e último añanan, pero no den noticia local di television.” Di con? Segun e autornan dje estudio, “sucesonan di crímen ta dramático i ta acapará atencion di hende.”

Despues di crímen ta bin cobertura di desaster, manera candela, dalmentu di auto, inundacion i explosionnan (12,2 porciento di noticia), siguí pa noticianan di deporte (11,4 porciento). Anto caba ta bini noticianan di salú (10,1 porciento), di gobiernu (8,7 porciento) i di economia (8,5 porciento). Tópiconan manera educacion, medio ambiente, arte i ciencia ta ricibí poco atencion (entre 1,3 pa 3,6 porciento). Di otro banda, informenan di weer ta forma como promedio 10 porciento di tur noticiero. E investigadónan a comentá: “Tur hende ta gusta papia di weer i noticia di television no ta un excepcion.” Nan ta agregá: “Cualkier tipo di weer, bon of malu, cayente of friu, muhá of secu, por haña cobertura extenso di noticia di television.”

Riba un nota positivo, e raport ta declará cu un creciente cantidad di periodista i televidente ta mira cu mester bini un cambio. Sin embargo, e estudio ta admití cu tal cambio lo no bini fácil pasobra “kisas forsanan di mercado i golosidad semper ta keda menasá e calidad di periodismo.”

[Nota]