Prosperando Meimei di Difikultat

Manera Beibel a profetisá, nos ta biba den “tempunan trabahoso.” (2 Timoteo 3:1) Bida di famia turbulento, problema di salú i tenshon ekonómiko ta djis algun di e opstákulonan ku kisas ta afligí bo. Podisé tin biaha bo ta sinti ku bo no por soportá mas. No opstante, bo por prosperá meimei di difikultat. Konsiderá e siguiente ilustrashon.

E violeta di Teide ta un mata ku ta krese na un haltura di kasi 3.700 meter riba e isla di Tenerife, dilanti di kosta di Nort Afrika. Pico de Teide, un seru volkániko ku ta duna e violeta su nòmber, ta e punto mas haltu i prominente di e isla suptropikal. Ta parse manera ku e parti ariba di e seru no tin niun vegetashon. Pero den lènte, sneu di wenter ku ta dirti ta perkurá nèt sufisiente awa pa rebibá e violetanan tenas aki i nan ta dòrna garganta di e volkan ku un krans di flor lila. Sí, e flor aki por parse frágil i delikado, pero e ta logra sobrebibí i asta bona den e ambiente desolá i hostil aki.

Meskos ku e violeta di Teide, abo tambe por perseverá meimei di sirkunstansianan desfaborabel. Beibel a yuda hopi Testigu di Yehova hasi esei asta durante e periodonan di mas difísil. Por ehèmpel, esnan ku tabata enkarselá den kamponan di konsentrashon di Alemania nazi a logra prosperá. Segun e periodista sueko Björn Hallström, “nan a ser tratá mas malu ku kualke otro grupo, pero, mediante nan kreensia den Dios, nan a logra sobrebibí mihó ku kualke otro.”

Sea kual sea e situashon ku bo ta den, Beibel por yuda bo prosperá meimei di difikultat. Tuma kontakto ku Testigunan di Yehova den bo komunidat, òf skirbi nan na e adrès menshoná na página 5 di e revista aki pa bo haña un studio di Beibel grátis na kas.