Ora Bo Beibi Ta Yora sin Stòp
DI UN ESKRITOR DI SPIÈRTA! NA CANADA
E DÒKTER a konfirmá loke e mama tabata sospechá kaba. Su beibi tabatin e kaso típiko di kóliko, ku ta un doló fuerte den barika. Segun un korant di Canada, Globe and Mail, e malesa aki ta afektá “un di kada kuater mucha.” Un di e síntomanan di kóliko ta ku e beibi ta yora por lo ménos tres bes pa siman pa vários ora largu sin ke stòp. Kiko un mayor preokupá por hasi? Segun dòkternan di mucha den hopi kaso tantu e mayornan komo e yu tin ku spera te ora ku e kóliko kita. Pero pa kuantu tempu?
Un estudio resien ku nan a hasi na Canada—di mamanan ku tin yu ku kóliko—ta revelá ku den mas ku 85 porshento di e kasonan e kóliko a kita ora e beibinan tabatin tres luna. E investigashon, inisiá dor di Dr. Tammy Clifford, direktora di e departamentu di epidemiologia na Instituto di Investigashon di e Hospital di Mucha di Ost Ontario, a revelá tambe ku e echo ku un mama tin un yu ku a haña kóliko no tin un efekto permanente riba e mama su salú mental. Segun Dr. Clifford, “rònt di seis luna despues ku e yu a nase, e mama ta bira meskos ku e Maminan ku sí no tabatin yu ku kóliko. Ta parse komo si fuera nan ta lubidá tur kos, asina ku e yoramentu stòp.”
Segun Globe, e investigashon resien aki, publiká dor di Dr. Clifford i su koleganan, “ta agregá detayenan importante na e konosementu sientífiko tokante kóliko. Pasobra e ta mustra ku tin tres klase di beibi ku kóliko: esnan ku ta haña e malesa i kura di dje durante e promé tres lunanan di nan bida; esnan ku tin kóliko persistente ku ta dura vários luna sin stòp; i un grupo chikitu ku ta haña kóliko relativamente lat, esta, un par di luna despues ku nan a nase.” Nan ta hasiendo un otro estudio pa sigui e desaroyo di muchanan ku kóliko segun ku nan ta krese, i ta e di tres grupo ta esun ku nan ta haña spesialmente interesante.
Nan ta kere ku ta e yoramentu sin stòp ta un dje kosnan ku ta pone ku beibinan ta wòrdu sagudí i dor di esei ta sufri daño. Manera Globe, ta informá, “e yoramentu mes no ta hasi e mucha daño. Pero si bo sagudí un beibi na un manera violento, asta si ta pa un lapso di tempu kòrtiku, e por kousa daño na su sistema nervioso i asta su morto.”
Di otro banda, e yoramentu di un yu—asta si e ta yora sin stòp—por tin un bentaha. “Investigashon a mustra ku, en realidat, beibinan ku ta yora hopi ta haña mas atenshon di esnan ku ta kuida nan,” segun Globe. “Nan ta mishi ku nan mas tantu, smail ku nan mas tantu, papia ku nan mas tantu i brasanan mas tantu.”