MUNDU TA UN KÁOS

4 | No Pèrdè Speransa

DIKON ESEI TA IMPORTANTE?

E problemanan ku ta tuma lugá rònt mundu por kousa ansiedat ku ta afektá hende físikamente i emoshonalmente. Hopi hende ku a ser afektá pa e problemanan ei ta pensa ku kos nunka lo bira mihó. Kiko ta e resultado?

Algun hende no ke ni pensa tokante futuro.
Otro hende ta usa alkohòl òf droga pa asina nan no pensa riba nan problemanan.
Algun hende ta pensa ku no ta bale la pena pa sigui biba. Pues, nan ta kuminsá pensa tokante suisidio.

Loke Ta Bon pa Bo Sa

Algun di e problemanan ku bo ta enfrentá por ta temporal, i sin ku bo sa e situashon por mehorá.
Asta si bo situashon no kambia, tin kos ku bo por hasi pa yuda bo trata ku e problemanan ku bo tin.
Beibel ta duna berdadero speransa, un solushon permanente pa tur e problemanan di humanidat.

Loke Bo Por Hasi Awor

Beibel ta bisa: “No sea nunka anshá pa e dia di mañan, pasobra e dia di mañan lo tin su mes inkietutnan. Kada dia tin su mes problemanan.”—Mateo 6:34.

No preokupá awe pa e kosnan di mañan. No preokupá asina tantu tokante futuro ku bo no por hasi e kosnan ku bo tin ku hasi awe.

Si bo keda preokupá tokante e kosnan negativo ku kisas por tuma lugá, lo bo djis haña mas strès, i bo por kuminsá pèrdè speransa ku lo tin un mihó futuro.

KIKO BO POR HASI?—Algun Sugerensia Práktiko

TIN UN PUNTO DI BISTA POSITIVO

Beibel ta bisa: “Pa hende ku ta sufri, tur dia ta un mal dia, pero hende ku kurason alegre semper ta kontentu.” (Proverbionan 15:15) Un punto di bista negativo por stroba bo di mira kon bo por solushoná un problema. Na kontraste, un punto di bista positivo por yuda bo pensa riba diferente manera ku bo por solushoná un problema.

Pone un límite na e kantidat di tempu ku bo ta dediká na wak òf skucha notisia.
Na final di kada dia, pensa riba dos òf tres kos ku bo ta gradisidu p’e.
Traha un lista di solamente e kosnan ku bo tin ku hasi awe. Dividí tarea grandi den tarea mas chikitu pa bo por mira resultado di bo esfuerso na final di dia.

BUSKA YUDANSA

Beibel ta bisa: “Hende ku ta isolá nan mes . . . ta rechasá bon konseho.” (Proverbionan 18:1) Bo no por sali for di un buraku hundu riba bo mes, pero si bo haña yudansa, bo por logra.

Pidi miembronan di bo famia òf amigu pa yudansa.
Ademas, buska manera ku abo por yuda nan. Ora bo hasi kos pa yuda otro hende, esei lo yuda bo tin un punto di bista balansá di bo mes problemanan.
Si bo a pèrdè speransa i ta sinti ku no ta bale la pena pa sigui biba, kisas lo ta bon pa bo bai un dòkter. Ora nos ta sinti asina, esei por ta un indikashon ku nos tin un problema di salú, manera depreshon. Hopi hende a haña yudansa ora nan a buska tratamentu.a

a Spièrta! no ta rekomendá ningun tratamentu médiko en partikular.

Beibel Ta Duna Berdadero Speransa

Un salmista den tempu di Beibel a bisa den orashon na Dios: “Bo palabra nan ta un lampi ku ta guia mi pia i un lus ku ta iluminá mi kaminda.” (Salmo 119:105) Wak kon Beibel, Dios su Palabra, ta hasi eksaktamente esei.

Riba un anochi skur, un lampi por yuda nos sa unda pa kana. Di mes manera, Beibel tin sabiduria práktiko ku por yuda nos tuma bon desishon.

Un lus ta iluminá nos kaminda pa asina nos por wak kiko tin nos dilanti. Na un manera similar, Beibel por yuda nos mira e speransa pa un mihó futuro ku tin nos dilanti.

Beibel no ta djis un buki sagrado ku ta konta e historia di humanidat, pero tambe e ta duna berdadero speransa pa futuro. E ta kontestá e siguiente preguntanan:

Kon?

Kon sufrimentu a kuminsá? Beibel ta bisa: “Pa medio di ún hende piká a drenta mundu, i morto pa medio di piká, i asina morto a pasa pa tur hende pasobra nan tur a peka.”—Romanonan 5:12.

Dikon?

Dikon hende no a logra solushoná nos problemanan? Beibel ta bisa: “No ta keda na un persona pa e mes dirigí su pasonan.” (Yeremías 10:23) E problemanan ku nos ta mira rònt mundu awe ta mustra ku loke e teksto ei ta bisa ta bèrdat.

Kiko?

Kiko Dios lo hasi pa solushoná tur problema? Beibel ta bisa: “Lo e seka tur lágrima for di nan wowo, i lo no tin morto mas; ni tristesa ni sklamashon ni doló lo no tin mas.”—Revelashon 21:4.