Parti 4

Dios Ta Informa Nos Encuanto Su Propositonan

1, 2. Con nos sa cu Dios ta percurá contesta pa esnan cu ta puntra sinceramente?

UN DIOS amoroso en berdad ta revelá su propósitonan na esnan sincero cu ta busk’é. Pa hende cu ta investigá e ta percurá contesta pa preguntanan tal como pakico el a permití sufrimentu.

² E Bijbel ta declará: “Si bo busca [Dios], lo e lagá bo hañ’é.” “Ta existí un Dios den cielu cu ta un Revelador di secreto.” “E Soberano Señor Jehova lo no haci un solo cos aménos cu el a revelá su asuntu confidencial na su sirbidornan e profetanan.”​—1 Crónica 28:9; Daniel 2:28; Amós 3:7.

Unda e Contestanan Ta?

3. Unda nos por haña sa pakico Dios ta permití sufrimentu?

³ E contestanan na preguntanan tal como pakico Dios ta permití sufrimentu i kico lo e haci encuanto esei ta ser hañá den e registro cu el a inspirá pa nos beneficio. E registro ei ta su Palabra, e Bijbel Santu. “Tur Scritura ta inspirá di Dios i ta probechoso pa siña, pa reprendé, pa rectificá cosnan, pa disipliná den husticia, pa e hende di Dios por ta henteramente competente, completamente ekipá pa tur bon obra.”​—2 Timoteo 3:​16, 17.

4, 5. Kico ta haci e Bijbel un buki único?

⁴ E Bijbel berdaderamente ta un buki único. E ta contené e registro mas exacto di historia humano i asta ta bai bek mas ayá di creacion di hende. E ta al dia tambe, pasobra su profecianan tin di haber cu sucesonan di nos tempu i dje futuro cercano tambe.

⁵ Ningun otro buki tin tal credencial pa exactitud histórico. Por ehempel, solamente un par di manuscrito di escritornan clásico di antigua ta existí. Pero hopi manuscrito, algun di nan en parte i algun di nan completo, ta existí dje Bijbel: rond di 6.000 dje Scritura Hebreo (e 39 bukinan dje “Testament Bieu”) i rond di 13.000 dje Scritura Griego Cristian (e 27 bukinan dje “Testament Nobo”).

6. Pakico nos por ta sigur cu e Bijbel awe ta básicamente mescos cu tempu Dios a inspir’é?

⁶ Dios Todopoderoso, kende a inspirá e Bijbel, a soru pa e integridad dje texto ser preservá den e copianan di manuscrito ei. Pues nos Bijbelnan awe ta esencialmente igual cu e skirbimentunan original inspirá. Un otro factor cu ta yuda nos concluí esaki ta cu algun copia di manuscrito dje Scritura Griego Cristian ta fechá ménos di cien aña dje tempu di e skirbimentu original. E poco copianan di manuscrito di escritornan seglar di antigua cu ainda ta existí rara bes ta data ménos cu asta varios siglo desde tempu dje autornan original.

Dios su Regalo

7. Con plamá e Bijbel ta?

⁷ E Bijbel ta e buki mas plamá den historia. Rond di tres biyon copia a ser imprimí. Ningun otro buki ta yega cerca di e cifra ei. I e Bijbel of parti di dje a ser traducí den rond di 2.000 idioma. Pues, ta ser calculá cu 98% dje poblacion di nos planeta lo por tin acceso n’e Bijbel.

8-10. Cua ta algun motibu pakico e Bijbel ta digno di nos examinacion?

⁸ Siguramente un buki cu ta pretendé di bini for di Dios i cu tin tur e evidencianan externo i interno di autenticidad ta digno di nos examinacion.a E ta splica e propósito di bida, e nificacion di condicionnan mundial i loke e futuro ta contené. Ningun otro buki por haci esei.

⁹ Sí, e Bijbel ta Dios su comunicacion na e famia humano. El a dirigí e skirbimentu di dje dor di su forsa activo, of spiritu, cu rond di 40 hende haciendo e skirbimentu. Pues Dios ta papia cu nos mediante su Palabra, e Bijbel Santu. Apostel Pablo a skirbi: “Ora boso a ricibí e palabra di Dios, cu boso a tende for di nos, boso a acept’é, no como e palabra di hende, sino, net manera e berdaderamente ta, como e palabra di Dios.”​—1 Tesalonicense 2:13.

¹⁰ Abraham Lincoln, e di 16 presidente di Merca, a yama e Bijbel “e mihor regalo cu Dios hamas a duna hende . . . Si no tabata pa [Bijbel] nos lo no tabata sa bon for di malu.” Pues anto, kico e regalo superlativo aki ta conta nos encuanto con sufrimentu a cuminsá, pakico Dios a permiti’é i kico lo e haci encuanto di dje?

[Nota]

[Plachi na página 10]

E Bijbel, inspirá di Dios, ta su comunicacion na e famia humano