Hesus A Primintí e Malechor Ku Lo E Bai Shelu?

E pregunta ei a lanta pasobra Hesus a primintí e malechor ku tabata kologá banda di dje ku lo e haña bida den un paradeis den futuro. Hesus a bis’é: “Di bèrdat mi ta bisa bo awe: Lo bo ta ku mi den Paradeis.” (Lukas 23:43) Ripará ku Hesus no a bis’é na unda e paradeis ei lo ta situá. Akaso Hesus tabata ke men ku e malechor lo bai shelu huntu kuné?

Laga nos wak promé si e malechor akí a bini na remarke pa haña bida den shelu. Hende ku tin e speransa di bai shelu tin ku batisá den awa i despues den spiritu santu pa nan por bira disipel di Hesus, engendrá pa spiritu santu. (Huan 3:3, 5) Tambe nan tin ku biba na armonia ku Dios su normanan moral i manifestá kualidatnan manera onrades, integridat i kompashon. (1 Korintionan 6:9-11) A la bes nan mester keda fiel na Dios i na Kristu te na fin di nan bida akí riba tera. (Lukas 22:28-30; 2 Timoteo 2:12) Ta solamente ora nan kumpli ku e rekisitonan akí nan por bini na remarke pa haña resurekshon i karga e responsabilidat di peso ku ta spera nan den shelu, esta, di sirbi komo saserdote i rei huntu ku Kristu pa mil aña riba humanidat.—Revelashon 20:6.

Pero, e malechor kologá banda di Hesus a biba komo kriminal i a muri komo kriminal. (Lukas 23:32, 39-41) Ta bèrdat ku el a mustra rèspèt pa Hesus ora el a bisa: “Hesus, kòrda riba mi ora bo drenta bo Reino.” (Lukas 23:42) Pero, e no a bira un disipel batisá di Hesus, engendrá ku spiritu santu, ni e no a demostrá ku el a hiba un bida hustu i rekto. Ta rasonabel anto ku Hesus lo a primintí e hòmber akí ku lo e reina den shelu huntu ku Su siguidónan ku sí a keda fiel te na morto?—Romanonan 2:6, 7.

Pa ilustrá esaki, si un hòmber pidi bo pordon pa motibu ku el a hòrta bo plaka, kisas bo no ta bai denunsi’é. Pero lo bo lag’é na enkargo di bo negoshi òf pidié perkurá pa bo famia? Ta hende di bo konfiansa so lo bo enkargá ku e responsabilidat ei. Meskos tambe, e hendenan ku lo haña bida den shelu tin ku demostrá ku nan ta konfiabel i ku nan lo pega firmemente na Dios su normanan hustu ora nan ta goberná riba humanidat. (Revelashon 2:10) P’esei, maske e malechor por tabata sinsero na último momento ora el a hasi un súplika na Hesus, tòg e no a bini na remarke pa haña bida den shelu.

Pero Hesus no a bisa e malechor ku lo e ta huntu kuné den shelu riba e mesun dia ei? Nò, pasobra Hesus mes no a subi na shelu riba e dia ei. Mas bien, e tabata tres dia i tres anochi den “barika di tera,” esta, den graf. (Mateo 12:40; Marko 10:34) I despues di su resurekshon, ainda el a keda 40 dia riba tera promé ku el a subi na shelu. (Echonan 1:3, 9) P’esei, e malechor no por tabata huntu ku Hesus den shelu riba e dia ei.

Ta den kua paradeis e malechor lo bai anto? Despues di resurekshon lo e biba den e paradeis akí riba tera bou di gobernashon di Hesus. (Echonan 24:15; Revelashon 21:3, 4) Si bo ke sa mas tokante e paradeis ei i kiko ta Dios su rekisitonan, papia ku kualke Testigu di Yehova.