PREGUNTA DI LEKTOR

Ta apropiá pa mayornan kristian sinta banda di nan yu ekspulsá durante reunionnan di kongregashon?

Nos no tin nodi di preokupá demasiado tokante unda un persona ekspulsá ta sinta den Salòn di Reino. Nos publikashonnan a hasi hopi esfuerso pa animá mayornan pa duna nan yu ekspulsá ku ainda ta biba na kas yudansa spiritual si nan ta haña esei apropiá. Manera E Toren di Vigilansia di 1 di òktober 2001, página 16-18, ta indiká, mayornan por asta studia Beibel ku un yu ekspulsá ku ta menor di edat i ku ta biba na kas. Asina e yu lo por haña e animashon ku e mester pa korigí su komportashon.

Ta rasonabel pa un yu menor di edat ku ta ekspulsá sinta diskretamente banda di su mayornan den Salòn di Reino. Un persona ekspulsá no ta obligá di sinta te patras den Salòn di Reino. Pues, lo no tin nada kontra si un yu ekspulsá sinta banda di su mayornan, unda ku esei por ta den Salòn. Ya ku e mayornan ta hasi esfuerso pa yuda nan yu spiritualmente, lógikamente nan lo ke hasi sigur ku e ta saka pleno benefisio di e reunionnan. P’esei lo ta bon pa e yu sinta banda di nan, en bes di lag’é bai sinta su so sin supervishon.

Pero kiko si e yu ekspulsá no ta biba na kas? Esei ta nifiká ku e no por sinta banda di su mayornan? Den pasado, nos publikashonnan a splika bon kla ki aktitut un kristian mester tin den e asuntu di anda òf asosiá ku un miembro di famia ekspulsá ku no ta biba na kas.a Ma ora un persona ekspulsá ta sinta diskretamente banda di su famia durante reunion, esei no ta nifiká outomátikamente ku su famia ta buskando manera pa asosiá kuné sin ku ta na nodi. Si e miembronan di famia ku a keda fiel tin e aktitut korekto pa ku esun ekspulsá i nan ta hasi nan bèst pa sigui e konseho bíbliko tokante kon pa anda kuné, no tin motibu pa preokupashon.​—1 Kor. 5:11, 13; 2 Huan 11.

Pues, si un persona ekspulsá sinta banda di un miembro di su famia òf kualke otro miembro di e kongregashon, esei no mester ta motibu pa preokupashon tanten ku e persona ekspulsá ta komportá su mes bon. Si kuminsá pone regla unda un hende tin mag di sinta den Salòn di Reino, esei lo por kousa vários problema. Si tur hende presente, inkluso e miembronan di famia ku a keda fiel, hasi nan bèst pa apliká e prinsipionan bíbliko ku tin di haber ku ekspulshon, i si kaminda un persona ekspulsá ta sinta no ta pone e rumannan trompeká, no ta nesesario pa preokupá unda un persona ku bini reunion ta sinta.b