“Nan Tabata Ke pa Mi Mes Wak Kiko Beibel Ta Siña”

MI PASADO:

Mi a nase na Santo Domingo, Repúblika Dominikana, komo último yu di un famia di kuater yu. Mi mayornan tabata bon siñá i kier a lanta nan yunan den un ambiente sano. Kuater aña promé ku mi a nase, mi mayornan a bini den kontakto ku algun hóben misionero ku tabata mormon. Impreshoná pa nan bon aparensia i kortesia, den poko tempu mi mayornan a bira un di e promé famianan riba e isla ku a djòin e Iglesia di Hesukristu di e Santunan di e Último Dianan, òf Iglesia Mormon.

Komo mucha, mi tabata gusta e aktividatnan sosial di e iglesia i e importansia ku e mormonnan tabata duna na bida di famia i normanan moral. Mi tabata orguyoso di ta un mormon i a pone e meta di bira un misionero.

Tempu mi tabatin 18 aña di edat, mi famia a muda bai Merka pa mi por a bai un bon universidat. Despues di un aña, mi tanta ku su kasá, kendenan ta Testigunan di Yehova, a bini for di Flórida pa bishitá nos. Nan a invitá nos pa bai un kongreso religioso ku nan. Loke a impreshoná mi tabata ku tur hende rònt di mi tabata buska e tekstonan di Beibel ku e oradó tabata menshoná i tabata hasi nota. P’esei, mi a pidi nan un pèn i papel, i mi tambe a kuminsá hasi meskos.

Despues di e kongreso mi tanta ku su kasá a bisa mi ku ya ku mi tabata interesá pa bira misionero, nan por a yuda mi siña mas tokante Beibel. Mi a haña esei un bon idea, pasobra e tempu ei mi tabata sa muchu mas di e Buki di Mormon ku di Beibel.

BEIBEL A KAMBIA MI BIDA:

Durante nos kòmbersashonnan tokante Beibel via telefòn, mi tanta ku su kasá semper tabata animá mi pa kompará mi kreensianan ku e siñansanan di Beibel. Nan tabata ke pa mi mes wak kiko Beibel ta siña.

Tabatin hopi kos ku mi a aseptá di e siñansanan mormon, pero mi no tabatin sigur si esakinan a kuadra ku loke Beibel ta bisa. Mi tanta a manda mi e ¡Despertad! di 8 di novèmber 1995, publiká pa Testigunan di Yehova. Den dje tabatin algun artíkulo tokante e siñansanan mormon. Mi a keda sorprendí ku mi no tabata sa mes di hopi di nan siñansanan. P’esei, mi a disidí di bai riba e website ofisial di e mormonnan pa wak si loke mi a lesa den e ¡Despertad! tabata bèrdat. Esei tabata e kaso i mi a keda mas konvensí ainda ora mi a bishitá e museonan mormon na Utah.

Semper mi a kere ku e Buki di Mormon i Beibel ta komplementá otro. Pero ora mi a kuminsá lesa Beibel mas a fondo, mi a ripará ku e siñansanan mormon ta kontradisí e doktrinanan di Beibel. Por ehèmpel, Beibel ta bisa na Ezekiel 18:4 ku alma ta mortal. Sinembargo, e Buki di Mormon ta bisa na Alma 42:9: “E alma no por muri nunka.”

Fuera di e kontradikshonnan den siñansa di e mormonnan, nan ideanan nashonalista tambe a molestiá mi. Por ehèmpel, segun e mormonnan, e hòfi di Edén tabata situá na Jackson County, Missouri, Merka. I e lidernan di iglesia ta bisa ku ora “e Reino di Dios kuminsá goberná, bandera di Merka lo waya ku orguyo i sin mancha riba e palu di bandera di libertat i derechonan igual.”

Mi a puntra mi mes kiko esaki lo a nifiká pa mi pais natal i pa tur otro pais. Mi a menshoná e punto ei den un kòmbersashon telefóniko ku mi tabatin un anochi ku un hóben mormon ku tabata haña entrenamentu pa bira misionero. Mi a puntr’é frankamente si lo e tabata dispuesto pa bringa kontra mormon di un otro pais si su pais kuminsá un guera kontra e pais ei. Mi a keda babuká ora el a bisa sí! Mi a kuminsá analisá e siñansanan di mi iglesia mas a fondo i tambe puntra e lidernan prinsipal di Iglesia Mormon un ke otro. Nan a bisa mi ku kontesta riba mi preguntanan tin di haber ku misterionan ku un dia lo keda revelá segun ku e lus ta bira mas kla.

Desapuntá ku nan splikashon, mi a disidí di analisá mi mes mas aleu i tambe e motibu pakiko mi kier a bira un misionero mormon. Mi a realisá ku esei ta pasobra mi tabatin masha deseo di yuda hende. Un otro motibu tabata ku komo misionero hende lo a respetá mi. Pero, mi no tabata sa mashá tokante Dios. Aunke ántes mi tabata blader hopi biaha den Beibel, mi no a mira su balor. Mi no tabatin ningun idea di kiko ta Dios su propósito pa tera i pa humanidat.

E BENEFISIONAN:

Pa medio di mi estudio di Beibel ku Testigunan di Yehova, mi a siña entre otro kiko ta Dios su nòmber, kiko ta sosodé ku nos ora nos muri i kiko ta e papel di Hesus den kumplimentu di e propósito di Dios. Por fin mi a haña sa mas tokante e buki maravioso akí, i mi ta gusta kompartí e bèrdatnan ku mi a siña ku otro hende. Semper mi tabata sa ku Dios ta eksistí, pero awor mi por papia kuné den orashon komo mi mihó Amigu. Mi a batisá komo Testigu di Yehova dia 12 di yüli 2004, i seis luna despues mi a kuminsá sirbi fultaim den e trabou di prediká.

Mi a traha pa sinku aña na e sede mundial di Testigunan di Yehova na Brooklyn, New York. Mi tabatin e privilegio di yuda den produkshon di Beibel i literatura basá riba Beibel ku ta benefisiá miónes di hende rònt mundu. Mi a disfrutá mashá di esei, i te ainda mi ta gusta yuda otro hende siña tokante Dios.