Kon Nos Por Yuda un Ruman Divorsiá?

Un hende muhé ta konsolá un ruman muhé divorsiá

Kasi sigur bo konosé un òf mas hende divorsiá, pasobra divorsio a bira algu hopi komun. Por ehèmpel, un estudio ku nan a hasi na Polonia a revelá ku hende ku tin rònt di 30 aña di edat i ku tin entre tres pa seis aña kasá ta esnan ku tin mas chèns di divorsiá. Pero no ta hende di e edatnan ei so ta divorsiá.

De echo, na Kòrsou, segun Ofisina Sentral di Estadístika, den e último sinku añanan, komo promedio, pa kada 100 matrimonio ku a tuma lugá tabatin 50 divorsio. I meskos ta tumando lugá den hopi otro pais.

UN OLA DI EMOSHON NEGATIVO

Kiko un divorsio ta trese kuné? Un konsehero vèrsá riba tereno di matrimonio na Ost Europa a bisa: “Divorsio ta ofisialisá loke a tuma lugá kaba: kiebro di un relashon i e separashon ku esei ta trese kuné, algu ku ta kousa hopi doló emoshonal.” El a agregá: “Hopi biaha e ta lanta un ola di emoshon fuerte manera rabia, duele, desepshon, desesperashon i bèrgwensa.” Asta e por pone e hendenan afektá pensa di kometé suisidio. “Na momento ku hues duna e veredikto di divorsio, e siguiente fase ta kuminsá. Ora un persona divorsiá sinti un bashí den su bida i sintimentunan di soledat dal e, e por kuminsá puntra su mes: ‘Awor ku mi a divorsiá, ken mi ta realmente? Kiko mi ta buska den bida?’”

Ewaa ta kòrda kon el a sinti su mes algun aña pasá: “Despues di mi divorsio, mi a sinti masha bèrgwensa ora mi bisiña- i koleganan di trabou a yama mi ‘un muhé divorsiá.’ Mi tabata kushi di rabia. Komo ku mi a keda mi so ku dos yu chikí, mi mes tabata mama i tata a la bes.” Adam, kende tabata un ansiano respetá di kongregashon pa 12 aña largu, a bisa: “Mi a pèrdè asina tantu rèspèt propio ku tin biaha mi ta yena di rabia i ta haña gana di alehá mi mes for di tur hende.”

E LUCHA PA REKOBRÁ EKILIBRIO EMOSHONAL

Preokupá tokante futuro, algun hende ta lucha pa rekobrá nan ekilibrio emoshonal, asta añanan despues di nan divorsio. Tal bes nan ta pensa ku niun otro hende no ta interesá den nan. Ademas, manera un periodista spesialisá riba e tereno di divorsio a bisa, awor nan tin ku “kambia nan kustumbernan i siña kon pa trata ku nan problemanan nan so.”

Stanisław ta kòrda lo siguiente: “Ora nos a divorsiá, mi èks esposa no tabata ke pa mi wak mi dos yu muhénan chikí. Esei a pone mi kuminsá sinti ku niun hende no tabata interesá mas den mi i ku asta Yehova a bandoná mi. Mi a pèrdè tur gana di biba. Ku tempu mi a realisá kon kiboká mi tabata.” Un ruman divorsiá ku yama Wanda tambe a sinti su mes insigur pa ku su futuro. El a bisa: “Mi tabata konvensí ku lo yega e dia ku niun otro hende, ni mi rumannan kristian, lo no a mustra interes mas den mi òf den mi yunan. Sinembargo, awor mi ta mira kuantu e rumannan a yuda nos i apoyá ami den mi esfuersonan pa lanta mi yunan den e bèrdat.”

E komentarionan akí ta mustra anto ku algun hende divorsiá ta keda afektá pa un ola di emoshon negativo. Kisas nan ta pèrdè nan balor propio i pensa ku nan no meresé atenshon di otro hende. Ademas, nan por kuminsá enfoká muchu riba fout di otro hende. Komo resultado, nan por pensa ku e rumannan di nan kongregashon no ta interesá den nan i ku nan ta indiferente. No opstante, eksperensianan manera di Stanisław i Wanda ta mustra ku personanan divorsiá ku tempu ta realisá ku nan rumannan den fe realmente ta interesá den nan. En realidat, den hopi kaso e rumannan a resultá di ta un gran yudansa, aunke esei no tabata bisto na prinsipio.

SINTIMENTU DI SOLEDAT I RECHASO

Maske kuantu nos hasi nos bèst, nos tin ku kòrda ku tempu tempu soledat por dal un ruman kristian divorsiá. Spesialmente ruman muhénan divorsiá por kere ku kasi niun ruman no ta interesá den nan. Alicja ta atmití: “Ya mi tin ocho aña divorsiá. Pero te ainda mi ta sinti tin biaha ku mi no ta bal nada. Na momentonan asina mi ta haña gana di isolá mi mes i sinta yora den un huki.”

Aunke e sintimentunan akí ta normal pa un persona divorsiá, Beibel ta konsehá nos pa no isolá nos mes. Si nos bai kontra e konseho akí, nos lo ta rechasando “sabiduria [práktiko].” (Pro. 18:1) Sinembargo, ken ku ta sinti soledat mester komprondé sí ku no ta sabí pa buska kada biaha konseho òf konsuelo serka un persona di e sekso opuesto. Si e hasi esei, sintimentunan romántiko inapropiá por kuminsá desaroyá entre nan dos.

Nos rumannan divorsiá por haña nan ku un laman di emoshon negativo, manera miedu pa ku futuro, sintimentu di soledat òf asta rechaso. En bista ku e sintimentunan akí ta normal i na mes momento difísil pa superá, laga nos imitá Yehova i duna e rumannan akí tur nos sosten. (Sal. 55:22; 1 Ped. 5:6, 7) Nos por ta sigur ku nan lo apresiá masha kualke yudansa ku nos por duna nan. Nan lo mira ku den e kongregashon nan por konta ku berdadero amigu!—Pro. 17:17; 18:24.

a A kambia algun nòmber.

KON BO POR YUDA?

Kiko bo por hasi pa yuda un ruman ku tin e sintimentunan manera esnan menshoná mas promé den e artíkulo akí? Wèl, wak kiko Beibel ta bisa i mira kon kristiannan leal a duna yudansa práktiko.

Skucha ku atenshon. (Pro. 16:20, 23)

Nos mester komprondé ku kisas un ruman lo no tin masha gana di papia di e detayenan ku a hiba na su divorsio. I te na ora un hende saka tur su frustrashon, esei kisas lo no aliviá su ansiedat ni yud’é ku nada tampoko. (Pro. 12:25; Rom. 12:15) Michał, kende a duna Adam sosten, menshoná anteriormente, ta di akuerdo ku bo por skucha ku kompashon i disernimentu sin tin nodi di sa tur detaye. El a bisa: “Mi a purba yuda Adam komprondé ku den un momento di debilidat, dominá pa su emoshonnan negativo, kisas lo e por bisa mi algu, sin ku e tabata ke, ku despues e por lamentá.” Asina Michał a laga Adam mira ku e no tabata buska pa sa tur detaye. Tòg el a skucha komo un berdadero amigu. Algu ku por yuda un ruman divorsiá hopi ta ora nos bis’é sea promé òf despues di un reunion kristian algu simpel manera: “Kon ta bayendo ku bo? Mi ta imaginá ku no ta fásil. Bo por konta ku mi.”

Mustra interes. (Flp. 2:4)

Mirosław ta bisa: “Ami ku mi esposa a disidí pa dediká tempu pa yuda un ruman muhé divorsiá. Por ehèmpel, nos a drecha slòt di su porta i tambe nos a hib’é dòkter.” Ta kosnan ku por parse chikí, pero nan tabata práktiko i di gran yudansa. Poko poko pero sigur e ruman muhé, ku yudansa di e pareha akí, a rekobrá su ekilibrio emoshonal. Es mas, despues el a kuminsá traha pionero i su yu muhé di 11 aña a batisá.

Sigur’é ku Yehova ta komprondé su situashon.

Si un hende ta sinti ku e no ta bal nada, bo por sigur’é ku pa Dios tur su sirbidónan ta presioso. Sin duda, nos ta “bal mas ku hopi mòfi”; den su bista, nos ta úniko i di gran balor. (Mat. 10:29-31) Yehova “ta sondia kurason” i por komprondé pa rumannan divorsiá. Lo e no bira lomba pa niun di su fiel sirbidónan. (Pro. 17:3; Sal. 145:18; Heb. 13:5) P’esei ora bo ta mustra interes den bo ruman, lag’é komprondé ku Dios ta apresiá su amor pa e bèrdat i su esfuersonan pa apoyá adorashon berdadero.—Flp. 2:29.

Anim’é p’e pega na e kongregashon.

Algun ruman ta sinti nan mes inkómodo pa asistí na reunion ora ku emoshonnan negativo ta asotá nan. Pero ta nèt e reunionnan akí ta “edifiká” nan i ta sirbi pa fortalesé i animá nan. (1 Kor. 14:26; Sal. 122:1) P’esei ta masha importante pa e ansianonan ta pendiente di e rumannan akí. Wanda, menshoná anteriormente, ta bisa: “Ainda nos ta kòrda e kariño ku nan tabatin pa nos.”

Anim’é p’e fortalesé su relashon ku Dios mediante orashon, estudio personal i meditashon. (Sant. 4:8)

Aunke Yehova ta todopoderoso i ta biba den shelu, e ta presta atenshon na hende ‘ku ta humilde i ku tin un spiritu kibrá,’ i ku ta mustra rèspèt pa su palabra. Kòrda e ruman divorsiá di e gran bèrdat akí i enfatisá kon kada un di nos ta haña yudansa ora nos hala mas serka Dios mediante orashon i estudio personal.—Isa. 66:2.

Invit’é pa sali ku bo den sirbishi di vèlt òf pa prepará huntu pa e reunionnan.

Esaki lo yuda e ruman divorsiá haña mas konfiansa segun ku e ta sigui padilanti den bida. Marta, kende a yuda un ruman muhé fiel ku a keda kibrá despues di su divorsio, a bisa: “Nos ta traha huntu regularmente den sirbishi. Ora nos logra nos metanan, nos ta sinti nos kontentu. Tin biaha nos ta prepará huntu pa reunion i despues kushiná algu dushi pa kome.”