Bo Ta Balorá Bo Herensia Spiritual?

1. Ki aktitut hopi hende sa desplegá relashoná ku loke nan tin?

BO A yega di tende hende bisa: ‘Bo no sa kiko bo tin te ora bo pèrd’é’? Esei a yega di pasa ku bo? Hopi hende, foral esnan ku semper a haña tur kos, tin e tendensia di no balorá loke nan tin. Por ehèmpel, un persona ku lanta den un famia riku kisas ta mira e echo ku e tin hopi kos komo algu masha normal. Esaki por ta e kaso ku hóbennan, ku debí na falta di eksperensia, no por diserní kiko ta e kosnan ku tin berdadero balor den bida.

2, 3. (a) Ki aktitut hóbennan kristian mester evitá? (b) Kiko por yuda nos balorá nos herensia spiritual?

² Bo ta un tiner òf un hóben di 20 piku aña di edat? Kiko ta importante pa bo? Pa hopi hende den e mundu akí, loke ta mas importante den bida ta kos material, por ehèmpel un bon salario, un bunita kas òf e último aparatonan elektróniko. Si ta esakinan ta e úniko kosnan ku bo ta interesá den dje, bo ta falta e kos di mas importante den bida: rikesa spiritual. Lamentablemente, miónes di hende awe no ta interesá den kosnan spiritual. Pues, si bo a lanta den e bèrdat, balorá e herensia spiritual ku bo a risibí di bo mayornan; e ta algu masha balioso. (Mat. 5:3) Falta di apresio pa kosnan spiritual por tin konsekuensianan tristu ku por afektá bo pa e restu di bo bida.

³ Pero esei no tin nodi di pasa ku bo. Kiko por yuda bo balorá bo herensia spiritual? Laga nos trata algun ehèmpel bíbliko ku por yuda nos mira dikon ta sabí pa balorá nos herensia spiritual. E análisis akí ta benefisiá nos tur, tantu hóben komo adulto.

NAN NO A BALORÁ NAN HERENSIA SPIRITUAL

4. Kiko 1 Samuel 8:1-5 ta revelá tokante e yu hòmbernan di Samuel?

⁴ Den Beibel, tin ehèmpel di algun persona ku no a balorá e inmenso herensia spiritual ku nan a risibí. Esei tabata e kaso ku e yunan di profeta Samuel. Samuel a sirbi Yehova for di chikitu i semper e tabatin un bon relashon ku Yehova. (1 Sam. 12:1-5) El a pone un bon ehèmpel pa su yunan Yoël i Abías. Pero nan no a balorá esaki i tabata hasi loke ta malu. Beibel ta bisa ku, kontrali na nan tata, nan a “pervertí hustisia.”—Lesa 1 Samuel 8:1-5.

5, 6. Kiko a sosodé ku e yu hòmbernan i e nietu di Yosías?

⁵ Esei tabata e kaso tambe ku e yu hòmbernan di Rei Yosías. Yosías tabata un rei ehemplar ku a sirbi Yehova fielmente. Ora a haña e buki di Lei di Dios i a les’é p’e, mesora el a hasi esfuerso sinsero pa sigui e instrukshonnan di Yehova. Sí, el a eliminá tur rastro di idolatria i spiritismo for di e pais i a animá e pueblo pa obedesé Yehova. (2 Rei. 22:8; 23:2, 3, 12-15, 24, 25) No tin duda, el a laga un herensia spiritual balioso pa su yu hòmbernan! Ku tempu, tres di su yu hòmbernan i un di su nietunan a bira rei, pero nan no a balorá e herensia spiritual ku nan a risibí.

⁶ Despues ku Yoakaz, yu hòmber di Yosías, a bira rei, el a kuminsá hasi “malu den bista di SEÑOR.” E tabatin tres luna so ta goberná ora ku un Fárao egipsio a laga enkarsel’é. Yoakas a muri den prizòn. (2 Rei. 23:31-34) Despues di Yoakas, su ruman hòmber Yoakim a bira rei i a goberná Herúsalèm 11 aña largu. E tampoko no a balorá e herensia spiritual ku el a risibí for di su tata. Yoakim tabata hasi asina tantu maldat ku Yeremías a bisa di antemano ku “lo [e] wòrdu derá, manera ta dera buriku.” (Yer. 22:17-19) E otro susesornan di Yosías, esta su yu hòmber Zedekias i su nietu Yoakin, tampoko no a hasi mihó. Ningun di nan no a sigui e bon ehèmpel ku Yosías a pone.—2 Rei. 24:8, 9, 18, 19.

7, 8. (a) Kon Sálomon a desperdisiá su herensia spiritual? (b) Ki lès nos por siña for di e hendenan den tempu bíbliko ku no a balorá nan herensia spiritual?

⁷ Rei Sálomon tambe a haña un herensia spiritual masha balioso serka su tata David, kende a siñ’é stima Yehova. Tòg ku tempu, Sálomon a stòp di balorá loke el a risibí. “Ora Sálomon a bira bieu, su esposanan a hasi su kurason desviá pa sigui tras di otro diosnan; i su kurason no tabata kompletamente dediká na SEÑOR su Dios, manera kurason di su tata David tabata.” (1 Rei. 11:4) Konsekuentemente, Sálomon a pèrdè aprobashon di Yehova.

⁸ Tur e hòmbernan akí a haña oportunidat di siña konosé Yehova i hasi loke tabata korekto. Pero nan no a probechá di e oportunidat! Di otro banda, tabatin hóbennan ku sí a balorá nan herensia spiritual. Laga nos papia awor di algun di e hóbennan akí ku a pone bon ehèmpel pa nos hóbennan djawe.

NAN SÍ A BALORÁ NAN HERENSIA SPIRITUAL

9. Ki ekselente ehèmpel e yunan di Noe a pone? (Wak e promé plachi.)

⁹ Noe su yunan a pone un ekselente ehèmpel. Nan tata a haña e mandato pa konstruí un arka pa hende por sobrebibí e Diluvio. Noe su yunan sigur a mira e importansia di hasi e boluntat di Yehova i a kooperá ku nan tata. Huntu, nan a konstruí e arka i a bai den dje promé ku e Diluvio a bini. (Gén. 7:1, 7) Kiko tabata e resultado? Génesis 7:3 ta mustra ku tur “sorto [di bestia a keda] na bida riba superfisie di henter tera” debí ku nan a hinka nan den e arka. E rasa humano tambe a ser preservá. Debí ku e yunan di Noe a balorá nan herensia spiritual, nan tabatin e privilegio di yuda salba e rasa humano i restablesé adorashon berdadero riba tera.—Gén. 8:20; 9:18, 19.

10. Kon kuater hóben hebreo a demostrá ku nan a balorá nan herensia spiritual?

¹⁰ Siglonan despues, kuater hóben hebreo tambe a demostrá ku nan tabata sa kiko tabata realmente importante den bida. Nan ta Ananías, Misael, Azarias i Daniel, kendenan na aña 617 promé ku Kristu a ser kapturá i hibá na Babilonia. E hóbennan akí tabata inteligente i nan tabatin bunita aparensia. Fásilmente nan por a logra éksito na Babilonia, pero nan no a buska esei. Nan no a lubidá ken nan tabata; nan a balorá nan herensia spiritual, esta, e bèrdatnan tokante Yehova ku nan a siña for di chikitu. P’esei, Yehova a bendishoná nan rikamente.—Lesa Daniel 1:8, 11-15, 20.

11. Kon otro hende por a benefisiá di loke Hesus a siña for di su Tata?

¹¹ Pero e lista di persona ku a pone un bon ehèmpel lo no ta kompleto si e no inkluí Hesus, e Yu di Dios. Hesus a siña hopi kos for di su tata i a balorá tur loke el a siña. Su palabranan a reflehá esei bon kla. El a bisa: “Loke e Tata a siña mi, mi ta papia.” (Huan 8:28) I Hesus tabata ke pa otro hende tambe benefisiá di su herensia spiritual. El a bisa e hendenan: “Mi tin ku deklará e bon notisia di e Reino di Dios na e otro statnan tambe, pasobra ta pa esaki Dios a manda mi.” (Luk. 4:18, 43) El a yuda su oyentenan mira e importansia di “no ta parti di mundu,” pasobra mundu en general no ta balorá kosnan spiritual.—Huan 15:19.

ABO TA BALORÁ BO HERENSIA SPIRITUAL?

12. (a) Dikon 2 Timoteo 3:14-17 ta apliká na hopi hóben awe? (b) Ki preguntanan hóbennan kristian mester hasi nan mes?

¹² Meskos ku e hóbennan ku nos a kaba di papia di dje, kisas abo tambe a lanta den e bèrdat. Si ta asina, kisas loke Beibel ta bisa tokante Timoteo ta apliká na bo tambe. (Lesa 2 Timoteo 3:14-17.) Bo mayornan a siña bo tokante e Dios berdadero i kon pa agrad’é. Podisé ta for di infansia nan a kuminsá siña bo e kosnan ei. Esei sigur a yuda bo haña e sabiduria nesesario pa bo por ser salbá “mediante fe den Kristu Hesus.” Ademas, loke nan a siña bo a yuda bo bira “kompletamente prepará” pa sirbi Dios. Pero awor e pregunta ta: Abo ta balorá bo herensia spiritual? Kisas un análisis propio por yuda bo kontestá e pregunta ei. Ta bon pa bo hasi bo mes e siguiente preguntanan: ‘Kon e echo ku mi por ta parti di e multitut di fiel sirbidó di Yehova ta laga mi sinti? Mi ta orguyoso di ta un Testigu di Yehova, un di e poko hendenan ku Dios konosé? Mi ta konsiente ku e echo ku mi konosé e bèrdat ta un magnífiko privilegio?’

13, 14. (a) Ki tentashon algun hóben kristian sa haña nan kuné? (b) Dikon ta bale la pena pa resistí e tentashonnan ei? Duna un ehèmpel.

¹³ Kisas tin algun hóben ku a lanta den e bèrdat ku no ta mira e diferensia grandi ku tin entre nos paradeis spiritual i Satanas su mundu skur. Algun di nan tin asta gana di bai wak kiko e mundu eifó tin di ofresé. Pero, abo lo bula dilanti di un outo djis pa sa kuantu doló esei por kousa bo òf si lo e por kousa bo morto? Klaru ku nò! Di mes manera, nos no tin nodi di anda den “bagamunderia” di e mundu akí djis pa haña sa kuantu doló esei por kousa nos.—1 Ped. 4:4.

¹⁴ Gener, un yònkuman na Asia ku a lanta den e bèrdat, a batisá ku 12 aña di edat. Pero despues, mundu a kuminsá atra’é. El a bisa: “Mi tabata ke tin e ‘libertat’ ku mundu ta ofresé.” Gener a kuminsá hiba un bida dòbel i, ora e tabatin 15 aña di edat, ya e tabata hasi hopi di e kosnan robes ku su mal amigunan tabata hasi. E tambe tabata bebe i papia palabra malu. Hopi biaha, e tabata yega kas lat despues di a hunga weganan violento riba kòmpiuter ku su amigunan. Pero ku tempu, el a bin realisá ku e mundu akí no ta duna berdadero satisfakshon. El a sinti ku su bida tabata bashí. Awor ku el a bini bèk den kongregashon, el a bisa: “Ainda mi tin ku lucha ku algun tentashon di e mundu akí, pero e bendishonnan ku mi ta risibí sirbiendo Yehova ta bal muchu mas.”

15. Riba kiko hóbennan ku no a lanta den e bèrdat por reflekshoná?

¹⁵ Klaru ku den kongregashon tin hóbennan tambe ku no a lanta den e bèrdat. Si esei ta bo kaso, pensa riba e privilegio maravioso ku bo tin awor di por konosé i sirbi e Kreador. Di tur e míles di miónes di hende ku ta biba riba tera, solamente un promedio di 1 di kada 1.000 persona tin konosementu eksakto di e bèrdat, i abo ta ún di nan. Sí, ta un gran bendishon di por forma parti di e multitut di hende ku Yehova a hala serka dje i na kendenan e ta revelá su bèrdatnan bíbliko. (Huan 6:44, 45) Esei no mester laga nos sinti nos bon, sea kual sea e manera ku nos a haña e bèrdat? (Lesa 1 Korintionan 2:12.) Gener a bisa: “Mi kurpa ta kue rel ora mi pensa riba esei. Ken mi ta ku Yehova, e Doño di universo, konosé mi?” (Sal. 8:4) Un ruman muhé ku ta biba den e mesun área ku Gener a bisa: “Un studiante ta sintié masha orguyoso si su maestro konos’é. Nos no ta sinti nos muchu mas orguyoso ku Yehova, e Magnífiko Instruktor, konosé nos?”

KIKO ABO LO HASI?

16. Ki desishon sabí hóbennan kristian por tuma awe?

¹⁶ Pensa riba bo maravioso privilegio di por sirbi Yehova. Lo bo no ke sigui hasi tur bo esfuerso pa keda entre e poko hendenan ku a skohe e mihó kaminda den bida? Di e manera ei, bo nòmber tambe por ta riba e lista largu di Yehova su sirbidónan fiel. Esei sigur ta e desishon di mas sabí ku bo por tuma; no sigui mayoria di hóben awe, ku ta tirando nan bida afó i ku no tin ningun futuro.—2 Kor. 4:3, 4.

17-19. Kiko por yuda bo tin un punto di bista balansá enkuanto ser diferente?

¹⁷ Ta bèrdat ku no tur ora ta fásil pa nos ta diferente for di e mundu. Pero si nos ta sabí, semper nos ta hasi esfuerso pa ta diferente. Pensa riba un atleta ku a kualifiká pa bai Olimpiada. Pa por a yega e nivel ei, sin duda e mester tabata diferente for di su pareunan. Probablemente, e mester a hasi hopi sakrifisio pa e por a dediká tempu i atenshon na entrenamentu. Ademas, su deseo pa ta diferente for di otro atleta a motiv’é pa train mas i mas pa alkansá su meta.

¹⁸ Mayoria di hende awe no ta pensa riba e mal konsekuensianan ku nan por haña nan kuné debí na nan echonan. Pero sirbidónan di Yehova ta diferente. Nos ta evitá mundu su aktividatnan ku por perhudiká nos tantu moralmente komo spiritualmente i daña nos relashon ku Yehova. Di e manera ei, nos por keda ku “un gara firme riba loke realmente ta bida.” (1 Tim. 6:19) E ruman muhé ku nos a menshoná anteriormente a bisa: ‘Si bo ta un persona ku ta para pa loke bo ta kere, na final di kuenta lo bo sinti bo bon. Ademas, di e manera ei, bo ta demostrá ku bo tin e forsa pa bai kontra e koriente di e mundu di Satanas. Ta komo si fuera bo ta mira Yehova Dios smail ku bo pasobra e ta orguyoso di bo. I bo ta sinti bo bon ku bo ta diferente!’

¹⁹ Un persona ku ta biba djis pa disfrutá di e kosnan ku bida ta ofresé aworakí ta tirando su bida afó. (Ekl. 9:2, 10) Si bo ta un hóben i bo ta reflekshoná seriamente riba e berdadero propósito di bida i tokante e privilegio ku Yehova ta duna nos di por biba pa semper, lo bo realisá ku ta sabí pa bo evitá di ‘kana manera e nashonnan’ ta kana. Pues, skohe pa sirbi Yehova, i lo bo disfrutá di un bida ku berdadero propósito.—Efe. 4:17; Mal. 3:18.

20, 21. Kon nos lo benefisiá si nos ta tuma bon desishon, i kiko Yehova ta spera di nos?

²⁰ Si nos ta hende ku ta tuma bon desishon, nos por tin un bida felis for di awor i bida eterno den Dios su mundu nobo. Nos no por ni imaginá e bendishonnan maravioso ku ta spera nos. (Mat. 5:5; 19:29; 25:34) Pero e bendishonnan ei no ta bini outomátikamente. Nos mester ta obediente na Dios pa nos por risibí nan. (Lesa 1 Huan 5:3, 4.) Ta bale la pena hasi esfuerso pa sirbi Yehova fielmente.

²¹ Nos no tin palabra pa deskribí kuantu kos nos a risibí di Dios! Nos a haña konosementu eksakto di su Palabra i bon komprondementu di e bèrdat tokante Yehova i su propósitonan. Nos tin e privilegio di por karga su nòmber i di ta su Testigu. Ademas, Dios ta primintí di ta na nos banda. (Sal. 118:7) Laga nos tur, sea ku nos ta hóben òf di edat, sigui demostrá ku nos ta balorá nos herensia spiritual i ku nos ta deseá di duna Yehova “gloria pa semper.”—Rom. 11:33-36; Sal. 33:12.