Bo Tabata Sa?

Dikon e israelitanan tabata paga plaka-di-brùit, òf preis di brùit?

DEN tempu di Beibel, ora un pareha tabata bai kasa, e brùidehòm òf su famia tabata paga plaka-di-brùit na e brùit su famia. Por a paga esei ku kualke kos di balor, animal, plaka i tin biaha asta ku trabou. Por ehèmpel, pa Yakòb por a kasa ku Rakel, el a traha shete aña pa su suegro. (Gén. 29:17, 18, 20) Pero, dikon e israelitanan tabatin e kustumber ei?

Carol Meyers, un analista di Beibel a bisa: “Plaka-di-brùit tabata un sorto di kompensashon ku tabata duna na e famia di e brùit pasobra nan lo a pèrdè e yudansa ku e yu muhé tabata duna na kas, lokual tabata algu hopi importante pa un famia di kunukero.” Tambe e por a yuda uni e dos famianan mas tantu i hasi nan amistatnan mas fuerte. Anto e amistat entre famia ei tabata masha importante durante tempunan difísil. Ademas, pago di e plaka-di-brùit a proba ku e mucha muhé tabata komprometí i ku pronto ta su esposo lo kuid’é i proteh’é, i no su tata.

Pago di plaka-di-brùit no a nifiká ku a kumpra òf bende e brùit komo si fuera ta un opheto e ta. Ancient Israel—Its Life and Institutions a bisa: “Pagamentu di e plaka-di-brùit por duna un hende ku no ta israelita e impreshon ku ta kumpra tabata kumpra e brùit. Pero, plaka-di-brùit no tabata pago pa e mucha muhé, pero mas bien un kompensashon ku tabata duna famia di e brùit.”

Awe, hende na algun pais ainda tin e kustumber di paga plaka-di-brùit, òf preis di brùit. Ora mayornan Testigu di Yehova no pidi plaka-di-brùit demasiado haltu, nan ta “laga tur hende mira ki rasonabel [nan] ta.” (Flp. 4:5; 1 Kor. 10:32, 33) Di e manera ei, nan ta demostrá ku nan no ta “stima plaka” ni ta materialista. (2 Tim. 3:2) Si nan pidi plaka-di-brùit ku ta demasiado haltu, kisas e futuro esposo lo tin ku posponé e kasamentu te ora ku e por gana sufisiente sèn pa paga e preis di brùit. Òf si e ta pionero, lo e no hañ’é obligá di stòp ku su asignashon i bai traha fultaim pa paga e inmenso preis di brùit.

Den algun pais tin lei ta regulá pago di plaka-di-brùit. Mayornan kristian ku ta biba na e paisnan ei ta obedesé e leinan ei. Dikon? Pasobra Beibel ta bisa ku kristiannan mester ta “sumiso na outoridatnan superior” i obedesé leinan ku no ta bai kontra Dios su leinan.—Rom. 13:1; Echo. 5:29.