1 | Orashon “Tira Tur Boso Inkietut Riba Dje”

BEIBEL TA BISA: “Tira tur boso inkietut riba [Dios], pasobra e ta interesá den boso.”—1 PEDRO 5:7.

Kiko Esei Ta Nifiká?

Yehova ta invitá nos pa papia kuné tokante kualke kos ku ta preokupá nos. (Salmo 55:22) Niun problema ta demasiado grandi òf demasiado chikitu pa hasi orashon tokante dje. Si e ta importante pa nos, e ta importante pa Yehova tambe. Un paso importante pa nos por haña pas mental ta di hasi orashon na Dios.—Filipensenan 4:6, 7.

Kon Esei Por Yuda?

Ora nos ta lucha ku problema di salú mental, nos por sinti ku nos ta nos so. No ta semper otro hende ta komprondé kompletamente loke nos ta pasando aden. (Proverbionan 14:10) Ora nos bisa Dios den orashon kon nos ta sinti, nos sa ku semper e ta skucha nos i ku e sí ta komprondé nos. Yehova ta mira nos, e sa kiko ta nos lucha i dolónan, i e ke pa nos hasi orashon na dje i bis’é kiko ta preokupá nos.—2 Krónikanan 6:29, 30.

Ora nos papia ku Yehova den orashon, esei ta fortalesé nos konfiansa ku e ta interesá den nos. Nos por sinti meskos ku e salmista ku a bisa den orashon: “Bo ta mira mi sufrimentu. Bo sa kon grandi mi problemanan ta.” (Salmo 31:7) E simpel echo di sa ku Yehova ta konsiente di loke nos ta pasando aden, por yuda nos trata ku situashon difísil. Pero e no ta djis konsiente di nos difikultatnan. E ta komprondé mihó ku kualke otro persona kiko nos ta pasando aden, i e ta yuda nos haña konsuelo i animashon for di Beibel.

Kon Beibel Ta Yudando Julian

Kon Ansiedat Ta Afektá Mi

“Mi ta lucha ku ansiedat i trastorno di komportashon opsesivo i kompulsivo (obsessive-compulsive disorder). Inesperá mi por haña mi ku ansiedat. Un ratu mi ta sinti mi bon, i despues mi ta sinti mi super anshá sin ningun motibu spesífiko. I loke ta hasi mi mas anshá ainda ta ora mi ta rònt di otro hende. Konstantemente mi ta preokupá tokante kiko nan ta pensa di mi.

Mi amigunan ku sa tokante mi ansiedat ta hasi nan bèst pa yuda mi. Mi tin ku atmití ku tin biaha loke nan ta bisa no ta loke mi a ferwagt di tende. Pero mi ta apresiá nan esfuerso pa purba di yuda mi.

Tin biaha, mi ansiedat i trastorno di komportashon opsesivo i kompulsivo ta hasié difísil pa mi hasi orashon. Ta tuma hopi esfuerso pa mi konsentrá i papia ku Yehova den orashon. Mi mente ta keda bai di un pensamentu pa otro, i esei ta hasié hopi difísil pa mi konsentrá. Ora mi no por kontrolá mi pensamentunan, ta difísil pa mi splika Yehova kiko mi ta pensa i sinti.”

Kon Beibel Ta Yuda Mi

“Mi a siña for di mi estudio di Beibel ku mi orashonnan no mester ta largu òf elokuente pa Yehova aseptá nan. Tin biaha ora mi no por ekspresá kon mi ta sinti, mi ta djis bisa: ‘Yehova, por fabor, yuda mi.’ Asta den situashon asina, mi ta sinti ku Yehova ta komprondé mi i ku e ta duna mi loke mi tin mester na e momento ei. Ademas di hasi orashon, mi a buska tratamentu médiko tambe. Mi ta kontentu pa bisa ku danki na e dos fuentenan akí di yudansa, mi ta sinti mi hopi mas mihó. Aunke ta tuma hopi esfuerso pa mi hasi orashon i pidi mi Tata selestial yuda mi, mi ta hasié pasobra mi ta sinti ku e ta stima mi i ku e ta yuda mi.”