A Ker el Doker er a Jesus

A rebetok el chedal a klechelid a omdasu el kmo a klechelid me a balatiks a kirel el dmak el oureor. Te oumera el kmo a klechelid a sebechel el sumechokl a mondai er a klechad. Engdi a rebebil a oumerang el kmo a klechelid me a balatiks a kmal diak el kirel el dmak el oureor. E kau, ngkuk uangera a uldesuem el kirel a ngerechelel a klechelid er a tekoi er a balatiks? Me a omomdasu, e aika el klisiich ngsebechel el dmak el oureor?

A REBEBIL a mesaod er a Jesus el kmo “ngkot el merael a chisel el chad el ngar er a reksi er a klechad.” Me ka molatk el leko kede oker er ngii er a ker el kmo, Omomdasu e a klechelid ngkirel el dmak el oureor ngii me a tekoi er a balatiks? Ngerang ngmo dmung? Sera lengar tia el chutem e ngulenger er sel ker el okiu a tekingel me a omerellel. El ua tiang, ngar sel Cheldechedechal er a Rois, e a Jesus a milsterir a rulebengkel a ulekrael el mle kirir el meruul er a chelsel a beluu el lekiliei er ngii. Me bo dosaod a bebil er a tekoi el ledilung el ngar sel cheldechedechal er a rois.

Melodech a Klengar er a Rebebil

A Jesus a milsaod er sel kirel el mo osengir a rulebengkel el bedul a beluulechad el kmo: “Kemiu a sar era belulechad; a lsekum a sar a mo diak a cherrecherel, e ngera de nguu loltii a cherrecherel? Ngmocha diak a blkul, ngdi mechoit er rikl e merderd rar chad. Kemiu a llomes ra belulechad. . . . Ma llemesiu le uaisei el dmiich er mederir ar chad, me lomes a ungil lomerelliu e lodengesii a Demmiu el ngara eanged.” (Matteus 5:13-​16) Ngera uchul me a Jesus a ulemekesiu er a rulebengkel er a sar me a llomes?

A Jesus a mle soal el meketeklii el kmo a ungil el omerellir a ngar er ngii a lerellii er a basio el lekiei er ngii. A sar a diak el sebechel el rullii a kall me lak el metemall a lak denguu el mrechemii er a kall. A olbidel a diak el sebechel el omekllomes er a milkolk el delmerab a lsekum me ke nguu el oridii er sel delmerab. Ngklou a ultutelel a domtab a belkul a tekingel a Jesus el kmo a rultirakl er ngii a di ua sar, el diak di lebo er a remekesai el chad e ngbai mo er a rebek el chad; te di ua llomes el diak di lebo er a remekesai el chad, e ngbai mo er tirke el rokui el mera el sorir el mo medengelii a Dios. A Jesus a dimlak lorrimel er a ruleltirakl er ngii el mo kiei el cheroid er a rechad me a lechub e te mo kiei el ileakl er a selers el basio el blil a omengull. Ngbai mle kirir el mo ua sar el mo urrachem er a kall me a llomes el mo omekllomes er a milkolk. Me a rechad sel lomes a ungil el omerellir a Rekristiano e tia ngosuterir el mo melodech a klengar er tir.

“Te Diak le Klalo ra Belulechad”

A ulekrael el Jesus a dilu er a ruleltirakl er ngii el mle kirir el meruul el mo er a rechad a mlo uchul e ngdilubech a klou a ultutelel el ker el kirel a osengir a Rekristiano el bedul a tekoi er a balatiks. E ngera uchul? Telkib el taem er a uchei er a kodellel a Jesus, e ngmiluluuch el mo er a Dios el kirir a rulebengkel el kmo: “Ngak el olengit a diak le kirel mongeroid er tir ra belulechad, e ke bai mengkar er tir er ngikel mekngit. Te diak le klalo ra belulechad, el ua ngak el diak kklalo ra belulechad.” (Johanes 17:15, 16) Me a leuaisei, e te mekerang a Rekristiano e mo diak el chedal tia el beluulechad e osisiu el taem e te kiei el teloi er a rechad er ngii? Uchei er a donger er tia el ker, e me bo dosoad aika el eru el ker:

• Ngmle uangerang a osengel a Jesus el kirel a tekoi er a balatiks?

• Ngkirir a Rekristiano el meruul a ngerang er chelechang?