A Jesus Ngmera el Milekiis er a Kodall?

A HERODOTUS, el chad er a reksi er a Grik el kiliei er a 2,500 el rak er a mla me mong, a milsaod el kirir a rechad er a Ekipten er a taem er ngii el kmo: “Sel lengar er ngii a mur er a remerau el chad, e a uriul er a blsoil e a ta el chad a merael el meliuekl el oba kahol el seluk a delasech el dilukai er a chelsel, el 18 el ints me a lechub e ng edei el fit a klemengetel. Ngolecholt er ngii el mo er a rebek el chad e melekoi el kmo, ‘Molim e bo el deu a rengum, e le lsekum e ke mad e ke di mo uai tiang.’”

A chouaisei el uldasu el kirel a klengar me a kodall a dimlak di el uldesuir a rechad er a Ekipten. Ngar er a betok el beluu er chelecha el sils, e a rechad a melekoi el kmo, “Mongang, e molim, e bo el deu a rengum.” A lsekum a kodall a ulebengelel a rokui el tekoi, e ngera me ngdiak moldeu a rengum er chelecha el dirk el sebechem? Ngera uchul me ngkmal kirem el di meruul a melemalt el tekoi? A lsekum a kodall a ulebengelel a rokui el tekoi, e ngkired el di kiei el kirel chelechang. A apostol el Paulus a millekoi a osisiu el tekoi. Ngmilsaod er a blekerdelir a rechad el dimlak loumerang er a okiis el kmo: “A lsekum ng diak a okiis er a kodall, e bochu doltirakl er sel omelekoi el kmo, ‘Di dongang e dolim ele kede mad er a klukuk.’”​—1 Korinth 15:32.

Nguaisei, engdi a Paulus a dimlak loumerang el kmo ngdiak a omelatk el kirir a rulekoad. Ngmle ulterekokl a rengul el kmo a rulekoad a lmuut el me ngar el diak lluut el mo mad. A klaumerang er ngii a mlengai a uchetemel er a klou a ultutelel el tekoi el dilubech, el ngii a okisela a Kristus Jesus. Tia el okiis a mle klou a ultutelel el tekoi el millisiich er a klaumerang er a rekot el disaiplo.

Me ngera belkul a okisel a Jesus el kired? Kede mekerang e medengei el kmo ngmera el dilubech? Ka me bo desa rolel a Paulus a losaod aika el tekoi er sera loluches el mo er a Rekristiano el kiliei er a Korinth.

E KUK MEKERANG A LSEKUM A KRISTUS A DIMLAK LEMOKIIS?

A rebebil el Kristiano er a Korinth a mle rrau a rengrir er tia el tekoi, e a rekuk bebil a dimlak loumerang er a okiis. Ngar er a kot el babilengel el mo er a Rekristiano er isei, e a apostol a milsaod a telemellel a lak a okiis. Ngmilluches el kmo: “A lsekum ng diak okiis er a kodall, e a Dios a dimlak lokisii a Kristus; e a lsekum a Dios a dimlak lokisii a Kristus er a kodall, e a tekoi el kim omerk er ngii me kemiu oumera er ngii a diak a belkul. E lmuut kung me kemam a mocha chemolt el cheleuid osisecheklam el kirel a Dios, . . . E a cho moumera er ngii a diak a belkul, me kemiu a dirk rrengodel er a kngtmiu. Ng dirrek el belkul a kmo tirkel uluumera er a Kristus e mla mad a dimlak bo le sobel.”​—1 Korinth 15:13-18.

A Paulus a ulemuchel a tekingel el oba tekoi el diak el sebeched el omtok er ngii: A lsekum a rulekoad a diak bo lebekiis er a kodall, e a Kristus el ngii a mlad a dimlak lebekiis er a kodall. E a lsekum e nguaisei, e tiang mo uchul a ngerang? Seikid e a berkel a ungil chais a mo diak a belkul, e mo ua lecheleblad el tekoi. A okisel a Kristus a ta er a klou a ultutelel el telengtengil a klaumerang er a Rekristiano, el ngar er ngii a lerellii er a bebil el osisechakl er a Biblia el kirel a llemeltel a Dios el mengedereder me a ngklel me a Rengedel me a osebeled. Me a lsekum e ngdimlak a okiis, e a klumech el lulemerk er ngii a Paulus me a rebebil el apostol a di mo diak a ultutelel.

Ngdirrek el ngar er ngii a bebil el telemellel tia el tekoi. A lsekum a Kristus a dimlak lebekiis er a kodall, e a klaumerang er a Rekristiano a di mo diak a ultutelel el ua lecheleblad el tekoi. A Paulus me a rebebil a mo ua lulemulak el kirel a okisel a Jesus. Te dirrek el mo ua lulemulak el kirel a Jehovah el Dios, el ngii a ulekisii a Jesus. Me a lmuut el tang, sel tekoi el kmo a Kristus a “mlad el kirel a kngtid” a mo blulak e le lsekum a Osebeled a dimlak bo el sobel er a kodall, e ngdiak el sebechel el olsobel er a rebebil. (1 Korinth 15:3) Me tiang a belkul a kmo a Rekristiano el mlad, el bebil er tir a mlad el kirel a klaumerang er tir, a di mlad el oba klsuul el omelatk el kmo te mo mekiis er a kodall.

Me a ulebongel el tekingel a Paulus a kmo: “Ma lsekum kede oumera er a Kristus el di kirel tial beluulchad e merekong, e kede kot el chebuul er a re chad el rokui.” (1 Korinth 15:​19) A Paulus a di ua rebebil el Kristiano el urriid a betok el tekoi, e mlodechelakl, e uluutekangel a ringel, e mlad e le ngii el uluumerang er a okiis me a rokui el tekoi el uldimukl er ngii. Ngdi mo diak a ultutelel aikang a lsekum a okiis a dimlak lemera el tekoi.

A UCHUL ME NGKIREM EL OUMERANG

A Paulus a dimlak loumerang el kmo aike el tekoi el luluumerang a Rekristiano a mle blulak. Ngmle medengei el kmo a Jesus a mlokiis er a kodall, e milsaod a olechotel el mo er a rechad er a Korinth el kmo, “a Kristus a mlad el kirel a kngtid el di ua ikel ngar a Chedaol Llechukl, e meldakl, e a ongedei er a sils e a Dios a ulekisii er a kodall el ua ikel ngar a Chedaol Llechukl, e sola e ng mlo duum er a Sefas, e a uriul er tiang e ng mlo duum er a re truich ma terung.”b A Paulus a dilechelii el kmo: “E dirrek el kuk uriul er itiang e ng di mle ta e mo duum er a re betok er a 500 er a rubengkel, el oumesingd er tir a dirk kiei, e ngdi re bebil er tir a mla mad. E sola e ng kuk mlo duum er a Jakobus, e mo duum er a re apostol el rokui. E sel kmal mlo uriul er ngii, e ng mle duum er ngak.”​—1 Korinth 15:3-8.

A Paulus a ulemuchel a tekingel el kmo a Kristus a mlad el kirel a kngtid, e meldakl e mlokiis er a kodall. Ngera uchul me ngkmal mle ulterekokl a rengul el kirel tiang? A ta el uchul a kmo te betok el chad a milsa tia el tekoi el duubech. A mlokiis el Jesus a mlo duum er a rederta el chad (el uldimukl er a Paulus), mekekerei el cheldellir a rechad, me a seked el mle 500 a ildisir, el oumesingd er tir a uluumededenger er a lerenges el kmo a Jesus a mlokiis. (Lukas 24:1-11) A rebetok er tirkang a dirk mle chad er a lekiei a Paulus e mle sebechir a rechad el oker er tir el kirel aike el tekoi el dilubech. (1 Korinth 15:6) A di ble letang me a lechub e te teru el chad e ngsebeched el di chemoit a tekingir, engdi ngdiak el sebeched el mengoit a tekingir a rebetok er a 500 el chad.

Ka momtab el kmo a Paulus a mle eru el taem el lolekoi el kmo a Jesus a mlad e mildakl e mlokiis el “ua ikel ngar a Chedaol Llechukl.” Aika el tekoi a olterekokl el kmo aike el ulaoch el ngar er aike el bades er a Biblia el tekoi er a Hebru el kirel a Messias a tilaut, el ochotii el kmo a Jesus a ngike el miltib el Messias.

Me alta te mla er ngii a rechad el ulemes a tekoi el dilubech me a dirrek el Bades a ouchais er kid el kirel, engdi ngdirk mla er ngii a rechad er sel taem me chelechang el oumededenger el kmo a Jesus a mlokiis. A rebebil a melekoi el kmo a redisaiplo er ngii a rirecherechii a bedengel e sola e melekoi el kmo te milsang a mlokiis el Jesus. Engdi a redisaiplo er ngii a dimlak a klisichir el mo mesisiich er tirke el milengkar er a debull. A rekuk bebil a melekoi el kmo aike el taem el blo leduum a mlokiis el Jesus a di mle berrous el diak el mera el tekoi. Engdi a chouaisei el tekoi a diak el klemerang e le Jesus a mlo duum er a rebetok el chad er a kakerous el taem er a uriul er a lemokiis.

Engdi rekuk bebil a melekoi el kmo tia el okiis a di mle cheleblad el tekoi el lullibech er ngii a redisaiplo. Engdi ngera mo klungiolel a loruul el uaisei? Sera louchais er a rechad el kmo a Jesus a mlokiis e ngmlo uchul e te mlotuub e mlukringel e mlo okodall. Te dirrek el ulemuchel el ouchais er tia el tekoi er a Jerusalem er a mederir tirke el ulemtok, el tir a ulelsiik a techall el mo oltelechakl er tir. Ngera uchul me te mo kongei el chobangel a chouaisei el omeruul el kirel a blulak el tekoi?

A okiis a milsterir a redisaiplo a blekeu el mo ouchais el kirel a Jesus alta te chillebangel a kmal meringel el odechelakl. A tekoi er a okiis a mlo klou a ultutelel el telengtengil a klaumerang er a Rekristiano. A rekot el Kristiano a dimlak el kengei el mo mad el di kirel a mellomes a rengul el sensei el mlokoad. Te bai kilengei el mo mad el ouchais er a okisel a Jesus e le ngulechotii el kmo ngii a Kristus, el Ngelekel a Dios, el mesisiich el chad el millisiich e ulemekrael er tir. A okisel a mlo uchul e ngsebechir el dirrek el mo mekiis er a kodall. Nguaisei, a lsekum a Jesus a dimlak lemokiis er a kodall, e ngdiak a Klekristiano. A lsekum e ngdimlak lemokiis, e ngdimlak bo dodengelii.

Engdi ngera belkul a okisel a Kristus el kired er chelechang?