Aike el Bla Leruul a Dios el Kirem

Tia el bades er a Biblia a kot el merael a chisel me a rebetok el chad a sebechir el melekoi er ngii. Ngmla medung el kirel el kmo ngdiak a kuk ta er a bades el sebechel “el meketeklii sel deleuill er a Dios el obengterir a rechad me sel rolel a osobel.” Sei a uchul me ngar er a bebil el beluu e tia el bades me a lechub a llechukl el “Johanes 3:​16” a blechoel el mocholt el ngar er aike el ongdibel er a buai, e bereked er a mlai, e llechukl er a kboub er aike el basio er a buai er a ngii di el ker er a chelsel a beluu.

Nguaisei, tirke el olecholt er tia el bades a oumerang el kmo a bltikerreng er a Dios a oterekeklii a osobelir el kirel a diak a ulebengelel el klengar. E kau a mekerang? Ngua ngera uldesuem el kirel a bltikerreng er a Dios? Omomdasu e ngera el tekoi a bla lerellii a Dios el meketeklii a bltkil a rengul el kirem?

“ELE DIOS A KMAL MLE BETIK A RENGUL ER A BELUULCHAD”

A rebetok el chad a kongei el kmo a Dios a milebii a eanged me a chutem, lukel a klengar, me a rechad el dirrek. A rokui el dellomel me a charm a kmal ungil el ulebeob me ngkmal kirel el ngar er ngii a mellomes a rengul el chad el ulemeob. A rebetok el chad a mereng a sulel a Dios er a bek el sils el kirel tia el ungil sengk er a klengar. Te dirrek el medengei el kmo te kmal ultuil er a Dios el kirel a rokui el tekoi el dousbech el kirel a klengar, el ua eolt, ralm, kall me a usbechel a kleald me a kelekolt el meliuekl er a beluulechad, me bo el sebechir el melemolem el ngar e loldeu a rengrir er aike el loruul.

Me ngkmal kired el mereng a sulel a Dios el kirel aika el rokui el tekoi, e le ngii a Ulemeob er kid e Uchul a klengar. (Psalm 104:10-28; 145:15, 16; Rellir 4:24) Me kede medengelii a bltikerreng er a Dios el kired sel dolatk aike el rokui el ungil el tekoi el bla leruul el kired. A apostol el Paulus a kmo: “[A Dios] a omesterir a re bek el chad a klengar, ma telrir, ma bek el tekoi. Ngii a uchul e kede outeliil, e mengitengtik e ngar ngii a klengar er kid.”​—Rellir 17:25, 28.

Engdi a Dios a diak di loubltikerreng el mei er kid el oeak sel lomeskid aike el dousbech. Ngdirrek el milengididai er kid el kuk mo ngarbab er a charm er a lebeskid a duch el mo medengei a tekingel e ngosukid el mo meduch el ousbech er ngii el mo uchul a klungioled. (Mateus 5:3) Ngokiu tiaikid el rolel, e a rebekongesenges el chad a ngar er ngii a omeltkir el mo teloi er a telungalek er a Dios, el “re ngelekel.”​—Rom 8:19-21.

A Johanes 3:16 a kmo, a Dios a ulechotii a bltikerreng el kired er a loderchii a Ngelekel, el Jesus el mo er a chutem el mo olisechakl er kid el kirel a Dios er ngii e Demal, e dirrek el mo mad el kired. Engdi a rebetok a mo kongei el kmo ngdiak lodengelii a uchul me a Jesus a mlad el kirel a klechad me a rolel e a kodellel a Jesus a olechotel a bltikerreng er a Dios el kired. Me bo desa rolel a Biblia a losaod er a uchul a kodellel a Jesus me sel kerresel a kodellel.

“NG MILSA DI TAL NGELEKEL”

A rokui el chad a mo mad, e le te chederedall er a secher, cheluodel, me a kodall. Ngdi tiang a dimlak el moktek er a Jehovah el Dios er a kot el uchul. Ngmilsterir tirke el kot el chad a omelatk el mo kiei el diak a ulebengelel el ngar er a paradis el chutem. Engdi tia mle ultuil er a ta el tekoi: Ngmle kirir el mo olengesenges er ngii. A Dios a dilu el kmo a lsekum te ngiltii el diak lolengesenges, e te mo mad. (Genesis 2:17) A kot el chad a mera el ulemtok er a omerredelel a Dios, me ngmlo uchul a kodellel ngii me a rengelekel. A Paulus a mesaod el kmo, “A klengit a siliseb er a beluulchad el okiu a tal chad, ma kodall a ulekiu a klengit el mei, ma kodall a ulemerk el mor a re chad el rokui, ele rokui a mlor a klengit.”​—Rom 5:12.

Engdi a Dios “a betik a rengul er a melemalt.” (Psalm 37:28) Me alta e ngdiak el sebechel el mengemikr er sel mekngit el omerellel ngike el kot el chad el ble ledurengul el meruul er ngii, engdi a Dios a dimlak lolebeakl er a rokui el chad el mo chuarm e mad el diak a ulebengelel e le ngta el chad el dimlak lolengesenges a uchul. Ngbai uleltaut er sel omellach el kmo a “klengar el kirel a klengar,” misei a uchul e ngrirellii a tabesul el tekoi el kirel a llemalt me ngmilsterir a techellir a rebekongesenges el chad el mo nguu a diak a ulebengelel el klengar. (Exodus 21:23) Engdi a ker a kmo, Ngmekerang e a cherrungel el klengar er a chad el lurridii a Adam e sebechel el lmuut el mo er ngii? A nger a kmo, Ngkirel a chad el mo odersii me a lechub e ngtongetengii a klengar el di ua kerresel sel klengar er a Adam, el cherrungel el klengar er a chad.

Nguaisei, ngdiak a ta er a rediak el cherrungel el ngelekel a Adam el sebechel el odersii a chouaisei el cheral a klengar, engdi a Jesus a mle sebechel. (Psalm 49:6-9) A Jesus a milechell el dimlak el chederedall er a telemellel a klengit, e ngbai mle cherrungel el ua Adam el mle cherrungel. Me sera letengetengii a klengar er ngii, e a Jesus a ngilebetii a klechad er a klsibai el mo er a klengit. Sera loruul el uaisei, e nguldersii el mo er a ruldidellel a rsechir tirke el teru el obekel a techall el mo oldeu a rengrir er a cherrungel el klengar el lulebang a Adam me a Eva. (Rom 3:23, 24; 6:23) Ngar er ngii a tekoi el kired el rullii me bo dengai a klungioled er a chouaisei el klou el olechotel a bltikerreng?

“TIRKEL ROKUI EL MO OUMERA ER A NGELEKEL A DIOS”

Ngar er a Johanes 3:16 e kede menguiu aika el tekoi el kmo “me tirkel rokui el mo oumera er a [Jesus] a diak le mad e bai mo ngar el diak a ulebengelel.” Tia belkul a kmo a bo denguu a sengk er a diak a ulebengelel el klengar e ngar er ngii a tekoi el kired el rullii. Me a lsekum e kede “mo ngar el diak a ulebengelel” e ngkired el mo oumerang er a Jesus e olengesenges er ngii.

Ke locha mo omdasu el kmo, ‘ngmekerang a dolengesenges a uldimukl er ngii? A Jesus ngdimlak lolekoi el kmo, “me tirkel rokui el mo oumera er” ngii a mo ngar el diak a ulebengelel?’ Choi, a klaumerang a klou a ultutelel. Engdi ngklou a ultutelel a dolatk el kmo a di doumerang el kmo ngar er ngii a Jesus a diak di el seikid e lungiang. Me a bo el sebechel a chad el nguu a kengei er a Dios, e ngousbech er a lmuut el klou er a di lomdasu el kmo a Jesus a ngike el Osobel. Ngike el oumerang a kirel el melasem el oltaut a osisecheklel a Jesus. A lsekum e ngdiak a omerellel, e a ngii di el olechotel a klaumerang a diak a ultutelel. A Biblia a kmo: “Kede ua bedengel a chad el ulekoad, a doumerang e lak a ngeral de rellii el olechotel.” (Jakobus 2:26) Me ngike el oumerang a kirel el olecholt a klaumerang er ngii er a Jesus, el belkul a kmo ngkirel el kiei el blekerdelel a klengar er ngii a oltirakl er sel klaumerang er ngii.

A Paulus a mesaod er tia el tekoi el kmo: “Ele bltkil a rengul a Kristus el kired a mengedereder er kemam, e le ki ungil el medengei el kmo a tal chad a mlad el kirir a rokui el chad . . . Me ng mlad el kirir a rokui el chad, me ng uchul e tirkel oltirakl er ngii a mo diak di le ngar el kirel a ungil er tir, e bai kirel a Kristus el mlad el kirir e mokiis el lmuut el me ngar.” (2 Korinth 5:14, 15) A klou el omereng el saul el kirel a tengetengel a Jesus a rullid el mo ngodechii a blekerdelel a klengar er kid, el diak dekiei el di kired e bai mo kiei el kirel a Jesus, el ngii a mlad el kired. Tiang a belkul a kmo a otutel a osisecheklel a Jesus a kirel el mo kot er a klengar er kid. A chouaika el omelodech a ngar er ngii a bo lerellii er aike el tekoi er a klengar er kid, me aike el tekoi el dolilt, me a rokui el tekoi el doruul. Ngera el nguked a mo er tirke el oumerang a osisecheklel a Jesus?

“DIAK LE MAD E BAI MO NGAR EL DIAK A ULEBENGELEL”

A ulebengelel a Johanes 3:16 a ouchais er a telbilel a Dios el mo er tirke el olecholt a klaumerang er tir er sel sengk er a olubet e kiei el oltirakl a llechul a Dios. Me a Dios a soal tirke el blak a rengrir el chad a lak “le mad e bai mo ngar el diak a ulebengelel.” Nguaisei, engdi a kakerous el omelatk el kirel a ngar medad el taem a mo er a derta chad, el tir a mo ngmai a klungiolir er a bltikerreng er a Dios.

A Jesus a tilbir a diak a ulebengelel el klengar el ngar er a eanged el mo er a ta el cheldebechel er a rechad. Ngmle bleketakl el melekoi er tirke el blak a rengrir el disaiplo er ngii el kmo ngmo mengetmokl er a basio el kirir me bo longedereder el obengkel el ngar er a klebkellel. (Johanes 14:2, 3; Filipi 3:20, 21) Tirke el mo mekiis el mo kiei er a eanged a “mo prist er a Dios ma Kristus, e mo mengedereder el obengkel el 1,000 el rak.”​—Ocholt 20:6.

Ngdi kesai el ildois er tirke el oltirakl er a Jesus a mo nguu tia el techall. A Jesus a dilu el kmo: “Kekerel delebechel, lak kom medakt, ele ng ungil er a rengul a Demmiu el meskemiu a Rengedel.” (Lukas 12:32) Ngua ngerang a ildisel sel “kekerel delebechel”? A Ocholt 14:1, 4 a kmo: “E sola e ak ulemes, e milsa Ngelekel a Sib el dechor er a Rois Sion; te mlar ngii a re 144,000 el chad el ulebengkel el mle llechukl a ngklel a Demal er a medal a bderrir. . . . Te mla mengubet e tuobed er a chelsir a rokui el chad er a beluulchad e tir ia kot el mo modars el mor a Dios ma Ngelekel a Sib.” Me a domekesiu er a diak el mochur el ildois er a rechad el mla kiei, e a 144,000 el chad a di “kekerel delebechel.” Tirkang a losaod el kirir el kmo te king, me te mo mengedereder er a rua techang?

A Jesus a millekoi el kirel sel ongeru el cheldebechel er a reblak a rengrir el chad el mo ngmai a klungiolir er a Rengedel a Dios el ngar er a eanged. A Jesus a milsaod el ngar er a Johanes 10:16 el kmo: “Ng ngar ngii a kuk bebil er a chermek el sib el diak le ngar tial blil a sib er chelechang. Ng dirrek el kirek el mo ngmai el mei; me ng mo orrenges er a ngerek, me ng di mo tal delebechel el obengkel a tal mengkerengel a sib.” Tirka el “sib” a omes el bedul a klengar el diak a ulebengelel el ngar er a chutem, e tiang a osisiu el omelatk el lulebang a Adam me a Eva. Kede mekerang e medengei el kmo a ngar mederir el klebesei a ngar er a chutem?

Ngbetok el taem e a Biblia a mesaod el kirel a Paradis el mo er ngii el ngar er a chutem. Me a lsoam el merriter er tiang, e mnguu a Biblia er kau e monguiu aika el bades: Psalm 37:9-11; 46:8, 9; 72:7, 8, 16; Isaia 35:5, 6; 65:21-23; Mateus 5:5; Johanes 5:28, 29; Ocholt 21:4. Aike el bades a omlaoch el kirel a ulebengelel a mekemad, bosech, secher, me a kodall. Ngmesaod el kirel a taem el tirke el ungil el chad a mo oldeu a rengrir el di tir el meleketek a blirir, oureor er a sersir, e omekeroul er a rengelekir el ngar er a budech el basio.a Kau ke semeriar er chouaitia el omelatk? Ngar er ngii a ungil el uchul e kede oumerang el kmo aika el telbiil a kmedu el mo tmaut.

A DIOS A MLA REMUUL A BETOK

A lsekum e ke mo omdasu el kirel a rokui el tekoi el bla leruul a Dios el kirem me a dirrek el kirel a klechad, e ngbleketakl el kmo ngmla remuul a betok el tekoi. Ngmla meskid a klengar, llomeserreng, ungil el klisichel a bedenged, me a rokui el tekoi el dousbech el melemolem el ngar. Me a lmuut el tang, a sengk er a Dios el olubet el tengetengel a Jesus, el ngii a mlad el kired a uchul a betok el klengeltengat el bla desuub er a Johanes 3:16.

A diak a ulebengelel el klengar el ngar er a chelsel a budech el ungil el blekeradel, el diak a secher, mekemad, bosech, me a lechub a kodall er ngii, a ulterekokl el mo uchul a diak a ulebengelel el deurreng me a klengeltengat. Me ngkmal di mo ultuil er kau el kmo ke mo ngmai aika el klengeltengat me a lechub e ngdiak. A di medechel el ker a kmo, ngera ke meruul er ngii el kirel a Dios?