Ngmo Dmeu a Rengud a Doureor el Obengkel a Dios

1. Alta e a Jehovah a ngike el Kot el Ngarbab el Dios, engdi ngera el techall a bla lebesterir a rechad?

A JEHOVAH ngike el Kot el Ngarbab el Dios el mileob a rokui el tekoi e diak a telkelel a llemesel a rengul me a klisichel. Me a uriul er a lengesuir a Job el mo mtebengii tiang, e a Job a dilu el kmo: “RUBAK, ak medengei el kmo kau olab a bek el klisiich; ma ikel bek el soam a sebechem el remuul.” (Job 42:2) Me a Jehovah a di sebechel el remuul a rokui el soal, el diak lousbech er a chad el olengeseu er ngii. Engdi ngokiu a bltkil a rengul e ngomekedong er tir el mo oureor el obengkel el kutmokl a moktek er ngii.

2. Ngera el klou a ultutelel el ureor a mle soal a Jehovah a loruul er ngii a Jesus?

² A Dios a ulemuchel el mebii a Ngelekel el Jesus, e a uriul e ngkilengei me ngolengeseu er ngii el omeob a rokui el tekoi. (Jn. 1:1-3, 18) A apostol el Paulus a milluches el kirel a Jesus el kmo: “Ele Dios a ulekiu ngii el meob a ikel rokui el ngar a eanged ma chutem, el moues ma diak le moues, el uldimukl er ngii tirkel kor a chelid el ngar a kingellel a ilteet, ma re telechull a dui, ma rulab a derreder, ma rulab a klisiich. Ma Dios a milebii a eanged ma chutem el rokir el ulekiu ngii el kirel ingii.” (Kol. 1:15-17) Me a Jehovah a dimlak di lebsa Ngelekel a kot el ngarbab el ureor, e ngdirrek el uluuchais er a rechad el kirel. Me tiang a kmal ileakl el techall!

3. A Jehovah, ngmilsang a Adam a ngera el ureor, e ngera uchul?

³ A Jehovah a dirrek el mle soal a rechad a bo loureor el obengkel. Me ngmilsang a urerel a Adam el mo omngakl a rokui el charm. (Gen. 2:19, 20) Ka di molatk er a deuil a rengul a Adam el mirruul er a urerel! Ngmle kerekikl el omtab aika el charm me a omerellel er a uchei er a lolibech a ngklel. Me a Jehovah a mileob a rokui el charm e mle sebechel el di ngii el omngakl el rokui. Engdi ng ngiluu tia el ureor el msa Adam el olechotel a klou el bltkil a rengul el mo er ngii. Ngdirrek el milsang a lmuut el ta er a urerel el mo meruul er tia el beluulechad el mo baradis. (Gen. 1:27, 28) Engdi ngklengiterreng, e le Adam a ngileltii el mo diak loureor el obengkel a Dios, el uchul me ngkmal mlo chuarm ngii me a rokui el ngelekel.​—Gen. 3:17-19, 23.

4. Te milekerang a rebebil el uluureor el meruul a soal a Dios?

⁴ A uriul e a Dios a ulemekedong er a rebebil el mo oureor el obengkel. A Noah a tileketekii a arhe me ngsilobel er a Ieleb ngii me a telungalek er ngii. A Moses a ultebedeterir a rechad er a Israel er a klsibai er a Ekipten. A Josua a milengetakl er a rechad er a Israel el mo soiseb er a Beluu er a Nglat. A Salomon a tileketekii a templo er a Jerusalem. E a Maria a mlo delal a Jesus. Me tirka el rokui el mle blak a rengrir el chad me a relmuut el bebil a uluureor el obengkel a Jehovah el meruul a soal.

5. Ngsebeched el teloi er a ngera el ureor? E a Jehovah ngmera el ousbech er kid el meruul er tia el ureor? (Momes er a siasing er a uchelel a suobel.)

⁵ Me a Jehovah a omekedong er kid el rokui el mo er a tkurrebab el sebeched el olengeseu er a ureor er a Renged. E ngar er ngii a kmal betok el rolel a omesiou el mo er a Dios. Me alta e ngdiak el kid el rokui a sebeched el meruul a osisiu el rolel a omesiou, engdi ngsebeched el rokui el omerk er a ungil chais el kirel a Renged. A Jehovah a sebechel el di ngii el meruul er tia el ureor, el sebechel el di ngar er a eanged e mengedecheduch er a rechad el ngar er a chutem. Me a Jesus a dilu el kmo a Jehovah a sebechel el remuul a bad el mo ouchais el kirel a mo King er a Rengedel. (Lk. 19:37-40) Me nguaisei, engdi a Jehovah a kongei er kid me kede mo “kldemel a Dios er a ureor.” (1 Ko. 3:9) A apostol el Paulus a milluches el kmo: “Maki oureor el obengkel a Dios, e kmal olengit er kemiu el mla nguu a krasia er a Dios me lak mrellii el mo diak a ultutelel.” (2 Ko. 6:1) Me tiang a kmal ileakl el techall el dobang. Mada me bo dosaod a bebil el uchul me tia el ureor a mo uchul a deurreng er kid.

NGMO DMEU A RENGUD A DOUREOR EL OBENGKEL A DIOS

6. Ngmle ua ngera uldesuel a Ngelekel a Dios er sera loureor el obengkel a Demal?

⁶ Tirke el oureor el obengkel a Dios a blechoel el mo dmeu a rengrir. Me a uchei er a lemei er a chutem a Ngelekel a Dios e ngdilu el kmo: “A RUBAK a milebak er uchei er a rokui el tekoi . . . Ak mlar bita er ngii el di ua chad er omelib el blai, ak mle uchul a deuil a rengul a Dios er a bek el sils, el blechoel el dmeu a renguk el ngar medal.” (Osi. 8:22, 30) Me a Jesus er sera loureor el obengkel a Demal e ngkmal mle dmeu a rengul e le ngriruul a betok el tekoi e dirrek el mle medengei el kmo a Jehovah a betik a rengul er ngii. E kid a kuk mekerang?

7. Ngera me a ureor er a berkel a klumech a uchul a deuil a rengud?

⁷ A Jesus a dilu el kmo ngmo dmeu a rengud sel dorous me sel dolai. (Rel. 20:35) Ngmlo uchul a deuil a rengud er sera bo dodengelii a klemerang. E ngera me ngmo dmeu a rengud sel douchais er tia el klemerang el mo er a rechad? E le ngsebeched el mesang a deurreng er tir el mukeroul sel bo lodengei aike el tekoi el lolisechakl a Biblia e lokurulii a deleuill er tir me a Dios. Ngdirrek el kmal mo ungil a rengud el mesterir el melodech a uldesuir me a rolel a klengar er tir. Me tiang a kot el klou a ultutelel e kot el ungil el ureor el kired el meruul er ngii. Ngmesterir a techellir tirke el mo sechelil a Dios a diak a ulebengelel el klengar.​—2 Ko. 5:20.

8. Ngera te dmung a rebebil el kirel a deuil a rengrir sel loureor el obengkel a Jehovah?

⁸ Sel dengesuterir a rechad el mo medengelii a Jehovah, e kede medengei el kmo kede odeuir a rengul, e ngii a omes er a urered el mekreos. E tiang a uchul a deuil a rengud. (Monguiu er a 1 Korinth 15:58.) A Marco el kiei er a Italy a dilu el kmo: “Ngkmal diak lemochar a deuil a renguk sel kudengei el kmo ak mesiou er a Jehovah er a tkurrebab el sebechek, e ngii a diak leua redi chad el di mereched el obes a tekoi el kriruul.” Me a Franco el dirrek el kiei er a Italy a dilu el kmo: “Ngokiu a Tekingel a Jehovah me aike el rokui el lomeskid, e ngbek el sils el omeklatk er kid el kmo ngbetik a rengul er kid e omes a rokui el doruul el meklou a ultutelel, alta e kede omdasu el kmo ngdiak a ngera lerellii aika el tekoi el doruul. Me sel kuureor el obengkel e ngmo dmeu a renguk e mo er ngii a belkul a klengar er ngak.”

SEL DOUREOR EL OBENGKEL A DIOS E KEDE MO KMEED ER NGII ME A REBEBIL

9. Ngmle ua ngera deleuill er a Jehovah me a Jesus, e ngera uchul?

⁹ Sel doureor el obengterir a rebetik er a rengud e kede lmuut el mo kmeed er tir. Kede mo ungil el medengelterir me a omerellir. Kede dirrek el mo medengei aike el tekoi el lolatk el mo meruul me a rolel e ngsebechir el remuul. A Jesus a locha uluureor el obengkel a Jehovah el betok el biliol el rak. Me a bltikerreng er a delongelir a kmal mlo mesisiich el diak a ngera el sebechel el tomellii. A Jesus a milsaod er a deleuill er ngii me a Demal el kmo: “Ngak ma Chedam a di tang.” (Jn. 10:30) Ngkmal mle kmes a deleuill er tir me te dilak el oureor el ta rengrir.

10. Ngera me a berkel a klumech a rullid el mo kmeed er a Dios me a rebebil?

¹⁰ A Jesus a ullengit er a Jehovah me lomekerreu er a redisaiplo er ngii. E ngera uchul? Ngmilluluuch el kmo: “Me di bo le tang el ua kau me ngak el di tang.” (Jn. 17:11) Me sel dekiei el oltirakl a llechul a Dios e domerk er a klumech, e kede lmuut el mo ungil el medengei aike el ungil el blekerdelel. Kede mo medengei el kmo nguchul a llomeserreng a doumerang er ngii e doltirakl a ulekrael el lomeskid. Me sel dolekeed er kid er a Dios e nglmuut el mo kmeed er kid. (Monguiu er a Jakobus 4:8.) Kede dirrek el mo kmeed er a rudam me a rudos er kid e le kid el mo chelebangel a osisiu el mondai me a deurreng e dirrek el osisiu a turrekong el dolatk er ngii. Kede dmak el oureor, e dmak el oldeu a rengud, e dirrek el dmak el outekangel a ringel. A Octavia el kiei er a Britain a dmu el kmo: “Sel kuureor el obengkel a Jehovah e ngrullak el mo kmeed er a rebebil.” Ngmesaod el kmo, e le “ngmla mo tang a tekoi el lolatk el mo meruul e ngar er a ta el omerael” ngii me a resechelil. Me kid me kede dirrek el oba osisiu el uldasu. Sel domes er a blakerreng er a rudam el melasem el oldeu er a rengul a Jehovah, e ngrullid el lmuut el mo kmeed er tir.

11. Ngera me kede lmuut el mo kmeed er a Jehovah me a rudam er kid er a chelsel a beches el beluulechad?

¹¹ A bltkil a rengud el mo er a Dios me a rudam er kid a mesisiich er chelecha el taem, engdi nglmuut el mo mesisiich er a chelsel a beches el beluulechad. Ka di molatk aike el ungil el ureor el bo doruul! Kede mo outkeu er tirke el mo mekiis er a kodall e mo olisechakl er tir el kirel a Jehovah. Kede dirrek el mo oureor el meruul er tia el beluulechad el mo baradis. Ngkmal mo dmeu a rengud el dmak el oureor, e a cherengel a taem e kede merael el mo cherrungel el ngar er cheungel a omengederederel a Kristus. Me nglmuut el mo kmes a deleuill er kid el rokui e mengal mo kmeed er a Jehovah, el ngii a mo “mesterir a rokui a ikel lousbech.”​—Psa. 145:16.

KEDE MUKERREU A DOUREOR EL OBENGKEL A DIOS

12. Ngmekerang a berkel a klumech e omekerreu er kid?

¹² Ngkmal kired el omekerreu er a deleuill er kid me a Jehovah. Kid el kiei er a beluulechad er a Satan me tia el diak el cherrungel el klechad er kid a uchul me ngbeot er kid el mo omdasu e meruul a tekoi el ua rechad er tia el beluulechad. Me ngua dongikai el omtok er a berius el di omerius er kid el mo er cheroid. Seikid a uchul me ngkired el smisichid el mengikai el mo er sel soad el mo er ngii. Me ngdi osisiu, ngkirel el mo blak a rengud el omtok a omengesuseu er tia el beluulechad er a Satan. Me ngmekerang a berkel a klumech e omekerreu er kid? Sel douchais er a rechad el kirel a Jehovah me a Biblia e kede oterekokl a uldesued er a ungil e meklou a ultutelel el tekoi, me ngdiak dolatk aike el mo uchul a chelitechetul a klaumerang er kid. (Fil. 4:8) A berkel a klumech a melisiich er a klaumerang er kid e le ngomeklatk er kid er a telbilel a Dios me a melemalt el llechul. Ngdirrek el ngosukid el mo omekeroul a ungil el blekeradel el omekerreu er kid er a chelsel tia el mekngit el beluulechad er a Satan.​—Monguiu er a Efesus 6:14-17.

13. Ngua ngera uldesuel a ta el Sioning er a Australia el kirel a berkel a klumech?

¹³ Me sel demechesang el omerk er a klumech, e dosuub, e dolengeseu er a rebebil el ngar er a ongdibel, e ngomekerreu er kid e le ngmo diak a temed el di melatk a mondai er kid. A Joel el kiei er a Australia a kmo: “A berkel a klumech a rullak el mo tabesul a osengek er a tekoi. Ngomeklatk er ngak er aike el mondai el lechelebangel a rechad me a klungiaol el bla kngai sel kultaut a omellach er a Biblia. Tia el ureor a rullak me ak melasem el mo ngariou a renguk e dirrek el meskak a techellek el mo ultuil er a Jehovah me a rudam me a rudos er ngak.”

14. Ngmekerang a blakerreng er kid el omerk er a klumech e ochotii el kmo a Dios a olengeseu er kid?

¹⁴ A berkel a klumech a dirrek el oterekokl a rengud el kmo a Dios a smisichid el oeak a chedaol reng er ngii. Ka me domekesiu er ngii er tiang: Oleko ke oureor el merous a blauang el mo er a rechad er a beluam. Ngdi ngdiak muduudel el kirel, e dirrek el di kau el omechar a rokui el mousbech el kirel tia el urerem. Osisiu el taem e a rechad a diak el sorir aika el blauang, e a rebebil a kmal chetirir a omomesterir. Ngmo ua ngera klteketel el moruul er tia el ureor? Nglocha kmal di telkib e ngmo mechitechut a rengum e mo chetim el oureor. Me nguaisei, engdi ngbetok er kid a melemolem el omerk er a klumech er a bek el rak alta e nguchul e kede chemoit a ududed me a temed, me a rechad a mo melenguul er kid me a lechub e ngmo kesib a rengrir er kid. Me tiang a mera el olechotel a kmo a Dios a ousbech er a chedaol reng er ngii el olengeseu er kid.

A DOUREOR EL OBENGKEL A DIOS E NGOCHOTII A BLTKIL A RENGUD EL MO ER NGII ME A RECHAD

15. Ngmekerang a berkel a klumech e ngar er ngii a lerellii er a otutel a moktek er a Jehovah el kirel a klechad?

¹⁵ Ngmekerang a berkel a klumech e ngar er ngii a lerellii er a otutel a moktek er a Jehovah el kirel a klechad? A moktek er ngii a soal a rechad a lekiei el diak a ulebengelel, e tia el moktek er ngii a dimlak lemengodech er sera lerebet er a klengit a Adam. (Isa. 55:11) Me a Jehovah a kiltmeklii a rolel e ngmo sebeched el mengubet er a klengit me a kodall. Ngmilekerang? A Jesus a mle er a chutem e tilengetengii a klengar er ngii el kired. Me a rechad a sebechir el mo ngmai a klungiolir er tia el tengetengel a lsekum te olengesenges er a Dios. Me a Jesus a ullisechakl er a rechad er aike el soal a Dios a loruul, e milengelechel er a redisaiplo er ngii el mo meruul er a osisiu el ureor. Me sel domerk er a klumech e dolengeseu er a rechad el mo sechelil a Dios er chelechang, e kede oureor el oltirakl a mla meketmokl el ulekrael er a Dios el mo uchul a osebelir a rechad er a klengit me a kodall.

16. A ureor er a berkel a klumech, ngerang rullii er aike el kot el ngarbab el llechul a Dios?

¹⁶ Me sel dengesuterir a rechad el mo sebechir el nguu a diak a ulebengelel el klengar, e kede ochotii el kmo ngbetik a rengud er tir e betik a rengud er a Jehovah. E le moktek er Ngii a “soal a rokui el chad a bo le sobel e bo lodengelii a klemerang.” (1 Ti. 2:4) Sel taem el Farisi a uleker er a Jesus er a kot el ngarbab el llach, e a Jesus a dilu el kmo: “‘Bo le betik a rengum er a Rubak el Dios er kau er a rengum el rokir, ma klengar er kau el rokir, ma uldesuem el rokir.’ Tiaikid a kot el ngarbab el llach e kot el klou a belkul. E a ongerul klou a belkul a di ua ingii, el dmu el kmo, ‘Bo le betik a rengum er a ngar bitar kau el ua le betik a rengum er kau.’” (Mt. 22:37-39) Me sel domerk er a ungil chais e kede olengesenges aika el llach.​—Monguiu er a Rellir 10:42.

17. Ngua ngera uldesuem el kirel tia el techelled el omerk er a ungil chais?

¹⁷ Me kede kmal ngeltengat, e le Jehovah a mla meskid a urered el uchul a deuil a rengud, e okedid er a rudam er kid, e dirrek el omekerreu er a deleuill er kid me Ngii. Ngdirrek el meskid a techelled el ochotii a bltkil a rengud el mo er a Dios me a rechad. Me a Jehovah a ngar er ngii a rebetok el miliol el mesiungel el meliuekl er a beluulechad, e tir el rokui a kmal kakerous a blekeradel el lechelebangel. Engdi tir el rokui el meklou me a remekekerei, me a rungilbesrir me a remechebuul, me a remesisiich me a remechitechut a meruul aike el sebechir el ouchais er a klaumerang er tir el mo er a rechad. Me kede di ua uldesuel a Chantel er a beluu er a France el dilu el kmo: “Ngika el Kot el Ngarbab el Dios el ulemeob a rokui el tekoi e dmeu a rengul a dmu er ngak el kmo: ‘Morael! Bo mouchais el kirek el mera el ngar er a rengum. Ak mo meskau a klisiich, me a Tekingek el Biblia, me a ngelsurir a rechanghel me a rekldemem er tia el beluulechad, me a ungil el osisechakl me a bleketakl el ulekrael er sel kot el ungil el temel.’ Me tiang a kmal ileakl el techall el mo sebeched el dmak el oureor el obengkel a Dios e meruul a soal!”