A Kot El Ngarbab El Rolel A Okesiu El Sebechem El Ousbech Er Ngii

KA U ke omdasu el kmo, ke ta er a Rekristiano? A leuaisei, e kau a ta er tirke el betok er a 2 el biliol el chad el kmo, te Kristiano el oltirakl er a Kristus. Chelecha el taem, e ngbetok el telael el klechelid a ulengakl el Kristiano, engdi ngkakerous a osisecheklir me a uldesuir. Engdi a klaumerang er kau a locha kmal ngodech er tirke el leko te Kristiano. Me a leuaisei, a tekoi el moumerang, ngklou a ultutelel? Ngkmal klou a ultutelel, a lsekum e ngsoam el mo oltirakl er a Klekristiano el losaod er ngii a Biblia.

A rultirakl er a Jesus a lulemekedong er tir el kmo te “Kristiano” (Rellir 11:26) Ngdimlak a belkul a lousbech a bebil er a ngakl el mo omngakl er tir, e le ngdi mle chimong a klaumerang er a Klekristiano el mla er ngii er sel taem. A Rekristiano a uleltirakl a osisecheklel me a ulekrael er ngike el uchelel a Klekristiano el Jesus Kristus. E kuk mekerang a ikelesia er kau? Kau, ke oumerang el kmo, ngolisechakl aike el lulisechakl a Jesus me aike el luluumerang a Rekristiano el tir a oltirakl er a Jesus? Ke mekerang e oumerang? Ngar er ngii a di ta el rolel, kede ousbech er a Biblia el mo oterekokl a tekoi.

Molatk er tiang: A Jesus a kmal uleba dmolech el omengull er a Biblia el ngii a Tekingel a Dios. Ngdimlak el kengei er tirke el mirruul a osisecheklel a Biblia el mo diak a belkul, e le tir el ulemdasu el kmo a osisecheklir er a redi chad a meklou a belkul. (Markus 7:9-13) Me ngkmal bleketakl el kmo, a klaumerang er a remera el oltirakl er a Jesus a mengai er a Biblia. Me a derta el Kristiano a di ngii el oker er ngii el kmo, ‘Aike el lolisechakl a ikelesia er ngak, ngoltirakl er a Biblia?’ A bo donger er tia el ker, e ngera me ngdiak morriter er a klekakerous er a osisecheklel a ikelesia er kau me a mera el lolekoi er ngii a Biblia?

A Jesus a dilu el kmo, a omengull er kid el mo er a Dios a kirel oltirakl er a klemerang, e a klemerang a debetik er ngii er a Biblia. (Johanes 4:24; 17:17) A apostol el Paulus a dilu el kmo, a osebeled a ultuil er sel “bo dodengelii a klemerang.”(1 Timothy 2:4) Me ngkmal kirel a klaumerang er kid el mo ultuil er a klemerang er a Biblia, e le osebeled a ultuil er ngii!

ROLEL A DOMEKESIU A KLAUMERANG ER KID EL MO ER A BIBLIA

Aki kmal melisiich er kau el mo menguiu aika el elolem el ker e momtab a nger er ngii er a Biblia. Ngdirrek el momes aike el bades el llechukl, e morriter a nger er ngii. E di lekau el oker el kmo, ‘Ngera klekakerous er aike el lolisechakl a ikelesia er ngak me aike el lolisechakl a Biblia?’

Tia el rolel a omesuub a mo ngosukau el mo kutmeklii a klou a belkul el omerritel, me ke mo medengei a klekakerous er aika el teblo el tekoi. Kau, ke kongei el mo merriter er a klekakerous er a bebil er a osisechakl er a ikelesia er kau me aike el losaod a Biblia? A Resioning er a Jehovah a kmal dmeu a rengrir el mo ngosukau el mo medengelii a klemerang el ngar er a chelsel a Biblia. Molengit er a Resioning el kirel a diak el locheraol el omesubel a Biblia me a lechub e bo er a website er kemam er a, jw.org.

1 KER: Ngtecha Dios?

NGER: A Jehovah el Demal a Jesus, a diak a ulebengelel e olab a bek el klisiich e ulemeob a rokui el tekoi.

A LOLEKOI A BIBLIA:

“Sel kimoluluuch, e aki di blechoel el mereng a sulel a Dios, el Demal a Rubak er kid el Jesus Kristus.”—Kolose 1:3.

“Rubak [el Jehovah] el Dios er kemam! Kau a kirem a klebkall, ma odanges, ma klisiich. Ele kau a mileob a rokui el tekoi.” —Ocholt 4:11.

Dirrek el momes er a Joel 2:32; me a 1 Timothy 1:17.

2 KER: Ngtechang a Jesus Kristus?

NGER: A Jesus a kot el Ngelekel a Dios. A Jesus a ulebeob, e ngar er ngii a uchelel. A Jesus a chederedall er a Jehovah e olengesenges er ngii.

A LOLEKOI A BIBLIA:

“Ele Chedam a kuk ngarbab er ngak.”—Johanes 14:28, BT

“A [Kristus] a moues el okesiul a diak le moues el Dios. Ng Ngelekel el Sechal el okiu uchei e ngarbab er a ikel rokui el mle duubech.”—Kolose 1:15.

Dirrek el momes er a Mateus 26:39; me a 1 Korinth 15:28.

3 KER: Ngerang a chedaol reng?

NGER: A chedaol reng a klisiich el lousbech er ngii a Dios el mo kutmokl aike el soal. Ngdiak el chad. A rechad a sebechir el mo mui er a chedaol reng e nguu a klisiich el oeak ngii.

A LOLEKOI A BIBLIA:

“Ma Elisabeth er a le rengesii a Maria el ouetkeu er ngii, e a ngalek a uluuedikel er a chelsel a delel. A Elisabeth a miltuchel er a Chedaol Reng.”—Lukas 1:41.

“Sel le mer kemiu a Chedaol Reng, e ng mor ngii a klisichiu.”—Rellir 1:8.

Dirrek el momes er a Genesis 1:2; me a Rellir 2:1-4; 10:38.

4 KER: Ngerang a Rengedel a Dios?

NGER: A Rengedel a Dios a kabelment el ngar er a eanged. A Jesus a King er a Rengedel a Dios. Ngdi kmedung e tia el Renged a mo kutmeklii a soal a Dios er a beluulechad el rokir.

A LOLEKOI A BIBLIA:

“E sola e ngikel ongeuid el anghel a uluutrombetang, e mlar ngii a meklou el ngor el ngar a eanged el kmo, ‘A omerrederel a beluulchad a mla mo chederdellel a Rubak er kid ma Mesias er ngii, me ng mo mengedereder el mo cherechar!’”—Ocholt 11:15.

Dirrek el momes er a Daniel 2:44; me a Mateus 6:9, 10.

5 KER: A rokui el ungil el chad, te mo er a eanged?

NGER: Ngdiak. Ngdi ulterekokl a ildisir a reblak a rengrir el chad, el domekedong er tir el “kekerel delebechel,” a mla mengilt er a Dios el mo er a eanged. Te mo mengedereder el obengkel a Jesus el king er a beluulechad el rokir.

A LOLEKOI A BIBLIA:

“Kekerel delebechel, lak kom medakt, ele ng ungil er a rengul a Demmiu el meskemiu a Rengedel.”—Lukas 12:32.

“Te mo prist er a Dios ma Kristus, e mo mengedereder el obengkel.”—Ocholt 20:6.

Dirrek el momes er a Ocholt 14:1, 3.

6 KER: Ngera moktek er a Dios el kirel tia el chutem me a klechad?

NGER: Ngar er a cheungel a Rengedel a Dios, e tia el beluulechad a mo baradis me a reblak a rengrir el chad a mo dmeu a rengrir er a cherrungel el klisichel a bedengir me a diak a ulebengelel el klengar me a budech.

A LOLEKOI A BIBLIA:

“Tirkel medemedemek a mo ungilbesrir el kiei el ngar a beluu el ungil a rengrir er a cherrungel budech.”—Psalm 37:10, 11.

“Ng mo smuld a rokui el chiuosech er a mederir. Ng dikea lluut el mor ngii a kodall, e mo diak a klengiterreng, ma langel, ma ringel. A di mla tekoi a mla mo diak.”—Ocholt 21:3, 4.

Dirrek el momes er a Psalm 37:29; me a 2 Petrus 3:13.