Ngera Te Oumera er Ngii A Resioning er a Jehovah?

“Engdi somam el remenges aike el moumerang, e le ki medenge el kmo, tia el cheldebechel el lolisechakl el kirel a Dios a lomtok er ngii er ker me ker!” (Rellir a Rechapostol 28:22) Tirke el merredel er a beluu er a Rom er aike el kot el dark el rak er a reKristiano a kiltmeklii a ungil el kerebai. Ngmle sorir el remenges a omesodir tirke el teloi er sel ureor, er a bai tirke lomtok el diak leteloi er tir.

Me ngdirrek el uaisei, a Resioning er a Jehovah a blechoel el lolekoi el lomtok er tir er a chelecha el sils, me ngkmal mo cheleuid a bo domdasu el kmo ngsebeched el mo medengelii a klemerang el kirir el oeak a rumtok er tir. Me nguaisei aki kmal dmeu a rengmam el nguu tia el techall el mesoad a bebil er aike el kimoumera el tekoi.

A Biblia, ma Jesus Kristus, ma Dios

Aki oumera el kmo a “Chedaol el Llechukl el rokui a melluches luleak a Reng er a Dios, me ngar er ngii a belkul.” (2 Timoteus 3:16) Ngkmal diak leklemerang a tekingir a rechad a ledu el kmo ngdiak kim Kristiano. Aki bai kmal oumera er a tekingel a apostol el Petrus el kirel a Jesus Kristus el kmo: “Ngdiak a ngodech el ngakl el ngar er cheungel a eanged el lebilsterir a rechad el bo desobel er ngii.”—Rellir a Rechapostol 4:12.

Engdi, a Resioning er a Jehovah a oumerang el kmo a Dios a kuk ngar er bab er a Jesus, e le Jesus a dilu el kmo ng “Ngelekel a Dios” ma “Chedam a ulderchak.” (Johanes 10:36; 6:57) Ma Jesus a dirrek el dilu el kmo: “A Chedam a kuk ngar er a bab er ngak.” (Johanes 14:28; 8:28) Me nguaisei ngdiak kimoumera el kmo a Jesus a osisiu el uai a Demal, el uai sel osisechakl er a Trinidad. Aki bai oumera el kmo ngulebeob er a Dios e chederedellel.—Kolose 1:15; 1 Korinth 11:3.

A ngklel a Dios a Jehovah, el ngar er a tekoi er a Merikel. A Biblia a dmu el kmo: “A ngklem a JEHOVAH, e di kau el tang a kot el ngar er a bab er tia el beluulechad el rokir.” (Psalm 83:18, King James Version) Ma loltirakl er tia el chais, e a Jesus a millisiich er a ngklel a Dios, e olisechakl er a rubengkel el mo meluluuch el kmo: “A Demmam el ngar er a eanged, lemechedaol a ngklem.” E dirrek el di mle ngii el milluluuch el mo er a Dios el kmo: “Ak mla mo ochotii a ngklem er tirke el chad el mngiliiteterir er a beluulechad el meskak.”—Matteus 6:9; Johanes 17:6.

Ma Resioning er a Jehovah a oumera el kmo ngkirir el mo uai a Jesus el lomerk er a ngklel a Dios ma moktek er ngii el mo er a rokui el chad. Maki uaisei el ngiluu itia el ngakl el Sioning er a Jehovah e le ki oukerebai er a Jesus, el ngike el “Blak a Rengul el Locholt.” (Chocholt 1:5; 3:14) Ma Jesaia 43:10 a melekoi el mo er a rechedal a Dios el kmo: “A Jehovah a melekoi el kmo, ‘Kemiu a olecholt er ngak, el mesiungek el kngileltemiu.’”

Sel Rengedel a Dios

Ma Jesus a ulsisecheklterir a rulebengkel el meluluuch el kmo, “A rengedem lemei,” e rirellii a Renged el uai a dai er a osisecheklel. (Matteus 6:10; Lukas 4:43) A Resioning er a Jehovah a oumera el kmo sel Renged a mera el gobelment el ngar er a eanged, e mo mengedereder er a beluulechad, e a Jesus Kristus a ngike el mlengilt el diak lemeues el King er ngii. A Biblia a dmu el kmo: “A klisichel a kleking er ngii a di mo merael el mo klou; ma rengedel a di mo blechoel el ngar er a budech.”—Jesaia 9:6, 7, KJ.

Engdi, ngdiak dil ta el Jesus Kristus a mo king er a gobelment er a Dios. Ngmo er ngii a rebetok el mo obengkel el mengedereder el ngar er a eanged. A apostol el Paulus a milluches el kmo: “Ma doutekangel, e kede dirrek el mo mengedereder el lobengkel.” (2 Timoteus 2:12) A Biblia a olecholt el kmo tirke el mo mekiis e mengedereder el obengkel a Kristus el ngar er a eanged a ngar er ngii a ulterekokl el ildisir el “dart ma okouang ma cheua el telael el mlengubet er a beluulechad.”—Chocholt 14:1, 3.

Me nguaisei, a bek el gobelment a kirel ngar er ngii a rechedal, e a Resioning er a Jehovah a oumera el kmo te lmuut el betok el billiol er a di tirke el mo mengedereder el ngar er a eanged a mo nguu a diak a ullebengelel el klengar. Me tia el beluulechad, a mo mui er tirka el rredemellel a mo er a cheungel a Rengedel a Dios, sel lebo leparadis, e mo chederedellel a Jesus me tirke el lobengkel el mengedereder. Me nguaisei e ngkmal ulterekokl a rengrir a Resioning er a Jehovah el kmo ngdiak lebo lengemed tia el beluulechad e sel telbilel a Biblia a mo tmaut el kmo: “E a remedemedemek a rengrir a mo ouklalou er tia el beluulechad, me te mo kiei er ngii el mo cherechar.”—Psalm 37:29; 104:5.

Engdi ngmekerang e mei a Rengedel a Dios? Sel di ltir a rechad el kongei el mo chederedellel a gobelment er a Dios? Ngbai Biblia a olecholt el kmo sel lemei isel Renged e a Dios a mo kirel el kutmeklii tia el chutem e le ngkmo: “E a Dios el ngar er a eanged a mo toketekii a rengedel el mo diak a ullebengelel. Misel renged a . . . mo okngemed aike el bebil er a renged el rokui e sola e ngii a mo medechel el mo cherechar.”—Daniel 2:44.

Tia el Rengedel a Dios ngmei er oingerang? Sel domes a otutel aike el ulaoch er a chelechang, e a Resioning er a Jehovah a oumera el kmo ngkmal di kmedung e ngmo er ngii. Maki ouetkeu er kemiu el mo melatk a bebil er aike el lulaoch el mesaod er a blekerdelel aike el “uriul el sils” er tia el mekngit el blekeredel. Ngllechukl el ngar er a Matteus 24:3-14; Lukas 21:7-13, 25-31; ma 2 Timoteus 3:1-5.

Ngdiak a klekakeakl er a delongelam er a rolel a belumam, ma bedengam, ma blekerdelel a klengar er kemam, e le ki ‘betik a rengmam er a Jehovah el Dios er kemam er a rengmam el rokir, ma omeltkam el rokir, ma omelebedebekam el rokir, ma klisicham el rokir, ma rengar er bita er kemam el ua lebetik a rengmam er kemam.’ (Markus 12:30, 31) A rechad a medengelkemam el oeak sel bltikerreng el ngar er ngii er a delongelir a rudam er kemam el Kristiano er a bek el beluu. (Johanes 13:35; 1 Johanes 3:10-12) Me nguaisei ngdiak kibo er a bitang ma ka lebitang el kirel a politiks er aike el beluu. Aki melasem el mo uai tirke el kot el disciplo er a Jesus, el ngii a millekoi er kirir el kmo: “Te diak leklalou er a beluulechad, el ua ngak el diak kklalou er a beluulechad.” (Johanes 17:16) Aki oumera el kmo sel kimoleakl er kemam er tia el beluulechad e ngbelkul a kmo aki mengeroid er kemam er aike el mekngit el omeruul el ngar er ngii, el uai a blulak, ma omerechorech, ma deleboes el omeruul, ma laokreng, ma mengolchotaor, ma mekngit el usbechel a rasech, ma omeluluuch er a bleob, maike el bebil er a tekoi el lomtok a Biblia.—1 Korinth 6:9-11; Efesus 5:3-5; Rellir a Rechapostol 15:28, 29.

A Ungil el Omelatk el kirel a Ngar er a Medad el Klebesei

Ma Resioning er a Jehovah a oumera el kmo ngdiak ldi letiaikid a klengar er kid er tia el beluulechad e lemerekong. Aki oumera el kmo a Jehovah a ulderchii a Kristus el me er tia el beluulechad el oitelii a rsechel el uai a olubet me bo lsebechel a klechad el mo er ngii a melemalt el deleuill er tir ma Dios e nguu a diak a ullebengelel el klengar el ngar er sel beches el blekeradel. El di ua lullekoi a ta er a apostol er a Jesus el kmo: “Me chelechang [e kede] mluklemalt er a rsechel.” (Rom 5:9; Matteus 20:28) A Resioning er a Jehovah a kmal dmeu a rengrir er a Dios ma Ngelekel el kirel tia el olubet el meskid a techall er a klengar er a ngar er a medad el klebesei.

Ma Resioning er a Jehovah a ulterekokl a rengrir el kirel a klengar er tir er a ngar er a mederir el klebesei, el lultuil er a okiis er kodall el mo er ngii er a cheungel a Rengedel a Dios. Aki oumerang, el ua lolisechakl a Biblia, el kmo sel lemad a chad ngmo dibus, e “sel sils e ngmo nguemed a uldesuel.” (Psalm 146:3, 4; Esekiel 18:4; Olisechakl 9:5) Ochoi, a luut el mei er a rulekoad er a ngar er a medad el klebesei a ultuil er a omeltkel a Jehovah el mo er tir sel lebo er ngii a okiis.—Johanes 5:28, 29.

Engdi, ngdirrek el ulterekokl a rengrir a Resioning er a Jehovah el kmo te betok a mo suobel sel lebo lolekngemed a rokui el gobelment a Rengedel a Dios, el ua resilobel er a Ieleb el Noah ma telungalek er ngii, e te mo dmeu a rengrir e kiei er tia el beches el chutem el mo cherechar. (Matteus 24:36-39; 2 Petrus 3:5-7, 13) Engdi aki oumerang el kmo a osobel a ultuil er a kllungel a bo doltirakl a llechul a Dios, el ua lolekoi a Biblia el kmo: “Ma beluubechad . . . a mo nguemed; engdi ngike el meruul a soal a Dios a di kiei el mo cherechar.”—1 Johanes 2:17; Psalm 37:11; Chocholt 7:9, 13-15; 21:1-5.

Ngbleketakl el kmo, ngdiak lsebecham el mesaod aike el rokui el loumerang a Resioning er a Jehovah, engdi aki ouetkeu er kemiu el lmuut el merritel.

A rokui el bades er a Biblia el milluches a mlengai er a Biblia er a Tekoi er a Belau, a lak louchais er a oidel a ta er a Biblia.

A lak lemocholt, e a rokui el oidel a mlengai er a tekoi er a Belau el Biblia el Beches el Testament me sel Chedaol Biblia.

[Blurb on page 4]

Aki ngiluu itia el ngakl el Sioning er a Jehovah e le ki oukerebai er a Jesus