OMESODEL A SUOBEL ER A MEDAL TIA EL BABIER | NGOBEKETEKLANG A UES EL KIREL A TEKOI ER A EANGED

Ker El Kirir Tirke El Kiei Er A Eanged

Ngmla ta el molebedebek er a basio el ngar er a eanged me tirke el kiei er ngii? A leuaisei, e ngdiak di lekau a mla oker er tiang, e le aika el mereko el betok el telael el rak e a rechad a dirrek el mla oker el kirel. A rebebil a oumerang el kmo, tia el basio a dirrek el ngar er ngii a rebladek el kired el mengebkall er tir. E a rebebil a oumerang el kmo, ngbasio el kmal klebokel e ngar er ngii a deurreng er ngii, e kiei er ngii a rebetok el anghel me a remla mad el chad. Engdi ngar er ngii a rebebil el omes er ngii el basio el lekiei er ngii a rebetok er a dart el telael el bedengel a chelid.

Te betok a melekoi el kmo, ngdiak el sebeched el mo medengelii tia el basio, e le ngdirkak a chad el mla mo er ngii e sebechel el ouchais er kid el kirel. Tia el uldasu a diak el klemerang, e le Jesus a kiliei er a eanged er a uchei er a lemei er a beluulechad. Ngmle bleketakl a omesodel el mo er a remengeteklel a klechelid er a kot el dart el rak er a ledu el kmo: “Ele ngak a mlar a eanged el mei el diak be kuruul a soak, e ak bai meruul a soal ngikel ulderchak.” Me a Jesus a uluuchais el kirel tia el basio er a ledu er a re apostol er ngii el kmo: “A blil a Demak a betok a delemerab er ngii.”—Johanes 6:38; 14:2.

A Demal a Jesus a Dios el ngklel a Jehovah, e a delengcheklel a ngar er a eanged. (Psalm 83:18) Me ngdiak a ngii di el chad el sebechel el mo ungil el smodii, a lak el Jehovah el Dios me a Jesus Kristus a smodii. Te mla ouchais a betok el omesodel a eanged el okiu a mengasireng el ues el bilsterir a reblak a rengrir mesiungel.

A ongingil el suobel a mo mesaod a bebil el bades er a Biblia el ouchais aike el bla leues a rechad el okiu a ues el mlo er tir. Sel bo mosuub aika el ues e lak mobes el kmo, aikang a mesaod a tekoi el diak el sebeched el remutech el olab a chimad. Me aika el omesodel a diak el lokiu a klemedengei er kid er a eanged, e le ngkmal mo meringel er kid el omtab. Sei a uchul me a Jehovah a uluusbech a ues el ngii a sebechel el meketeklii a omesodel a basio el ngar er a eanged me ngmo bleketakl er a rengud. Me aika el ues a mo ngosukau el mo bleketakl er a rengum el kirir tirke el kiei er a eanged el ngii a “betok a delemerab er ngii.”