Sel Dikea Lsebeched Loutekangel

El ua tiang a Sallya el kiei er a Merikel a urriid a kloklel er a mesisiich el eolt. Ngkmo: “Ak mlo omelechesiu el kmo ngkmal dikea el sebechek loutekangel. E betok el taem el blo kumdasu el kmo ngdi kmedung e a kubached.”

E sel lemad a betik er a rengud? A Janice er a Australia kmo: “Sera lemad a reteru el ngelekek el sechal e ngkmal di mloriou a rokui el tekoi er a klengar er ngak. Ak dilu er a Dios el kmo: ‘A kullengit me lemerekong ngmera el dikea el sebechek el mtekengelii a lmuut el ta er a tekoi. Bechikak me kmad.’”

A Daniel a miltemall a klengar er ngii er a lebo lemekngit a bechil. Ngmelekoi el kmo: “A bechik er a louchais er ngak el kmo ngmlo mengebelung er ngak e ngmera el di ua chad a lengiluu oles el rusur a renguk. Ngmlo melai a buil el di kumelechesiu el kmo a chad a merus er ngak el uaisei el betok el taem.”

Tia el Ongkerongel a mesaod er a uchul me ngngar ngii a klungiolel a klengar alta

• Ngduubech a tellemall er a beluu

• Ngmad a betik er a rengud

• Ngmo mekngit a bechid

• Ngngar ngii a meringel el rekted

• Ngdikea lsebeched loutekangel

Me a kot, e ngmekera sebeched el melemolem loutekangel sel leduubech a tellemall er a beluu?