Sel Leduubech a Tellemall er a Beluu
A LSEKUM ke mla chormii a tellemall er a beluu e kmal ungil medengelii a lolechesuar er ngii tirke el mla duubech a tellemall er a belurir: ngmechas a rengum, ngmeringel er kau oumerang, ngdiak modengei el kmo ke mo mekerang, suebek a rengum, e di mekngit a berrusem. Rebetok er tirke el chuarm el tiang a uchul, a kmal mo mechitechut a rengrir me a bedengir e mo diak a urungulir el melemolem er a klengar er tir.
A lsekum ke mla oriid a rokui el kloklem er a tellemall el dilubech er a beluu e ke locha feel el kmo ngdiak el sebechem el otekur a lmuut el ta er a tekoi. Ke locha dirrek el mo feel el kmo ngdikea ultutelel omolemolem el chad. Me nguaisei a Biblia melekoi el kmo ngngar ngii a ultutelel omolemolem el ngar, e ngar ngii a ungil luchul me ngsebechem el loumerang el kmo a klengar a lmuut el mo ungil er a ngar medam.
SEL BO DODENGEI A KLEMERANG EL NGAR ER A BIBLIA E NGMO SOAD EL MELEMOLEM EL NGAR
A Olisechakl 7:8 a kmo: “A ulebongel er a tekoi a kuk ungil er a uchelel.” Sel momuchel el lmuut el meleketek er a klengar er kau er uriul er a telemellel a beluu, e ke locha mo omdasu el kmo ngkmal diak el sebechem el tuobed er tia el meringel el blekeradel. Engdi sel obo mokekokau el melasem el lmuut el meleketek er a klengar er kau, e a blekeradel a merael el mo beot.
A Biblia ouchais el kirel a taem el “mo diak a langel . . . el mo diak ongit el kirel a ngesou.” (Isaia 65:19) Ngmo uaisei a beluulechad er sel taem el Rengedel a Dios a mo rullii el mo baradis. (Psalm 37:11, 29) A telemellel a beluu a di mo tekoi er a ngar er a mong. A ringelel a uldesuem me a bedengem el mlo er ngii er a uriul er a telemellel a beluu a mo mesuld el mo diak. A Dios lolab a bek el klisiich a tibir el kmo: “A ikel dilubech el tekoi er a ngar a mong a kmal di mo diak a melatk.”—Isaia 65:17.
Ka di molatk: A Ulemeob a kiltmokl a tekoi me lsebechel meskau a “omelatk me a ungil klengar er a ngar medad,” er cheungel a cherrungel el omengederederel. (Jeremia 29:11, NW) Kau el mla mo medengelii tia el klemerang ngsebechel rullau el mo soam el melemolem el ngar? A Sally el dulsaod er ngii er a uchelel tia el Ongkerongel a kmo: “Sel bo deblechoel el melatk aike el rokui el ungil tekoi el bo loruul a Rengedel a Dios er a ngar medad, e ngngosukid me kede chemoit a tekoi el dilubech er a ngar mong e merael el beduluchei.”
Mosuub a lmuut el betok el kirel aike el bo loruul a Rengedel a Dios el kired a rechad. Sel moruul el uaisei e ngsebechel lolterekokl er a rengum el kmo alta ke chelebangel a ringel le ngtelemellel a beluu a uchul, engdi ngngar ngii a ungil luchul me kede melemolem el ngar. Kede mengiil er sel lungil klengar er a ngar medad el diak a telemellel a beluu. Nguaisei engdi chelecha el dongiil e a Biblia meskid a ungil ulekrael el ngosukid me ngsebeched el melemolem loutekangel. Molatk a bebil er ngii.