Kerrir A Rechad

◼ Ngoeak a ngera el rolel e ngsebeched el olengeseu er a rengar er a mui el taem el omesiou?

Meliuekl er a beluulechad el rokir er sera 2009 el rak er a omesiou, e te mle kmeed er a 800,000 el rudam me a rudos a milsiou el ngar er a mui el taem el omesiou me a ngar er a ileakl el taem el omesiou. Tirka el mesiou a milengoit a kot el redechel a temir, klisichir, me aike el ngar er ngii er tir me bo el sebechir el omerk er a ungil el chais er a Renged. (Osi. 3:9) Ngulterekokl a Jehovah el kmal dmeu a rengul er a urerir! Ngoeak a ngera el rolel e ngsebeched el olecholt er a osengel a Jehovah e ngosuterir el mo metik a deurreng e mo sebechir el outekangel el ngar er a omesiungir?

Ngulterekokl a ungil el cheldechedechad a sebechel el melisiich er tir el mo melemolem el ngar er a omesiungir. (Osi. 25:11) Ngsebeched el melodech a temed me bo el sebeched el oureor el obengterir el oldingel? Sel dedak el oureor, e nglocha sebeched el melekoi er tir el kmo ngdi ungil a dousbech er a mlid. E a lsekum e kede ngar er a mlirir, e nglocha sebeched el mesterir a sesei el udoud el olengeseu er tir er aike el lousbech. (1 Ko. 13:5; Fil. 2:4) Kede dirrek el olecholt a ngelsuid el oeak sel doltuchakl er tir e dongemedaol er tir el mei er a blid e omengur.​—1 Pe. 4:8, 9.

A Bades a olterekokl el kmo a Jehovah a mo mesterir tirke el osiik er a Rengedel el kot aike el lousbech. (Psa. 37:25; Mt. 6:33) A ta er a rolel a loruul er tiang a oeak a klodam er kid a Rekristiano. (1 Jn. 3:16-18) Nguaisei engdi tirka el ngar er a mui el taem el omesiou me a ileakl el taem el omesiou a diak lomdasu el kmo a rebebil a mo oungerachel el mesiou er tir. Te dirrek el locha diak lemereched el ouchais er a rebebil sel lebo er ngii a lousbech. Engdi, ngsebeched el ngosuterir tirka el blak a rengrir el rudam me a rudos er kid el oeak a lebiusech a medad er “a ikel ngesonges er tir.”

A Febe, el mle blak a rengul el omerk a klumech er a kot el dart el rak er a Ongdibel er a Kenkrea, er a lebo er a Rom, e a Paulus a millisiich er a rudam er a Rom el kmo: “Bo muar mechedaol el ngara Rubak e mnguu ngiil dil, e sola e a le ngarngii a lousbech er ngii er kemiu el ngiidi le ngerang e mngesuir.” (Rom 16:1, 2) Ngar er ngii a techelled el olecholt er a osisiu el bltikerreng el mo er tirke el tir a melemolem el omerk er a klumech el diak lemeterob, el uai tirke el ngar er a mui el taem el omesiou me a ileakl el taem el omesiou.​—Rel. 5:42.