Mousbech a Tract el Mo Omerk er a Ungil Chais
1. A rechedal a Dios te mekerang a lousbech a tract?
1 A rechedal a Jehovah a meketeketang el ousbech a tract el omerk er a ungil chais. Sera 1880 e a C. T. Russell me a rulebengkel a ulemuchel el meruul a Bible Students’ Tracts, el kirir a remenguiu a Watch Tower me lorous el mo er a buai. A C. T. Russell a ulemdasu el kmo a tract a kmal mle klou a ultutelel el kirel a berkel a klumech er a Renged, a uchul me sera luchelii a cheldebechel el diak longereker er a 1884, e ngulemekedong er ngii el kmo Zion’s Watch Tower Tract Society el okedongall el Watch Tower Bible and Tract Society of Pennsylvania er chelechang. Sera 1918 e ngmle betok er a 300 miliol el tract a lerirous a Remesuub er a Biblia. Aika el tract a dirk sebeched el ousbech el omerk er a klumech.
2. Ngera meketmokl el oeak aika el tract?
2 Ngar er Ngii a Leketmeklii: Aika el tract a kmal ungil a chiro er ngii el olechau a ues. Ngdi mekedeb a omesodel a tekoi er a chelsel el sebechir a rechad el mo sorir el ngmai a klemedengei er ngii. Ngungil el kirir tirke el chad er a blai el diak el sorir a magazine me a lechub a buk. Aika beot a lorous a rebeches el dirk mlo oldingel me a rengalek. Me a lmuut kung, e ngungil a meklungel el sebeched el di olab er a bek el taem.
3. Mouchais el kirel a tekoi el dilubech el leko er kau me a lechub e ngchisel a chad el bla mchiuii el olecholt er a klungel a ultutelel a tract.
3 Te betok a ulemuchel el mo medengelii a klemerang el oeak a tract. El ua tiang, a redil er a Haiti a milsa ta er a tract el cheloit er a rael me ngiluu e choiuii e dilu el kmo, “Ak mla metik er a klemerang!” Me ngmlo er a Blil a Ongdibel, e ulemuchel el mesuub a Biblia e miltecholb e le ngklisichel a Tekingel a Dios el lebiltik er ngii er a chelsel a tract a uchul.
4. Ngera kired el meruul sel bo dorous a tract?
4 Oldingel a Obliil: A tract a ungil el dousbech el ousioning, me ngmo er ngii a taem e kede mo merous er ngii el omuchel er a Ongeteruich me a Ta el Buil. Me ngdiak el soad el di merous er ngii, e ngbai soad lousbech er ngii el mo omuchel er a cheldechedechad. A lsekum ngar er ngii a semeriar el debetik er ngii me a lechub e ngmle semeriar er a uchei e ngsebeched el mo ochotii a rolel a dosuub a Biblia el ousbech er a Biblia Olisechakl me a lechub e ngkuk ta er a babier. Ngmekerang a dorous a tract sel doldingel a obliil? A bek el tract a kakerous, me ngkired el mo ungil medengei aike el bo dorous.
5. Ngmekerang a dorous a tract sel doldingel a obliil?
5 A cheldechedechad a kirel el ungil er sel basio el doldingel er ngii me a tract el dousbech er ngii. Ngsebeched el omuchel er a cheldechedechad sel debsang a chad er a blai a tract, e sel lesang a klebokel el ikrel tia el tract e ngsebechel el mo semeriar er ngii. Ngdirrek el sebeched el ocholt a bebil el tract e mecherei me ngmelilt er sel soal. E sel doldingel er a basio el rechad a bekikl el melai a chesmerir, e ngsebeched el di ochotii a tract me lesa chad er a blai me a lechub e ngsebeched el otechii er a cheungel a chesmerel. A lsekum a dai er a tract a ousbech a ker, e ngsebeched el oker er ngii me lochotii a uldesuel el kirel, me a lechub e ngsebeched el rullii a ker el mo omeksemeriar er ngii el mo mengedecheduch. E seikid e ngmo sebeched el chemuiu a bebil el tekoi el ngar tia el tract el obengkel, e sel debo er a ker e kede msang a techellel el mo ochotii a uldesuel. Ngsebeched el chemuiu aike el meklou a ultutelel el bades er a Biblia. E a uriul er a dosaod a bebil el suobel, e ngsebeched el rokir a cheldechedechad e oterekeklii a taem el deluut el mong. A lsekum a ongdibel a blechoel el omechei a babier er aike el blai el diak a rechad er ngii, e ngsebeched el loiang a tract er a basio el diak a ngodech el chad el sebechel mesang.
6. Ngmekerang a dousbech a tract sel dousioning er a rael?
6 Ousioning el Ngar er a Rael: Ke mla ousbech a tract el ousioning el ngar er a rael? Tirke el melengelakl er kid a di orreched me ngdiak a temir el mengedecheduch er kid. Me ngdiak el sebeched el mo medengei el kmo te semeriar me a lechub e ngdiak. Me a leuaisei e ngungil a debesterir a tract e le debesterir a beches el magazine e ngdiak dodengei el kmo te mo menguiu er ngii me a lechub e ngdiak. A ikrel a tract a kmal klebokel me a tekoi er ngii a di mekedeb me ngsebechel el rulleterir a rechad el mo sorir el menguiu er ngii sel bo er ngii a temir. Engdi a lsekum te diak el lorreched, e ngsebeched el mesaod a bebil el suobel el ngar er a tract el obengterir.
7. Mosaod a tekoi el dilubech el olecholt er a rolel a dousbech a tract el omerk a klumech er a ngii di el taem.
7 Omerk a Klumech er a Ngii Di el Taem: Ngbeot a dousbech a tract el omerk a klumech er a ngii di el taem. A ta el odam a blechoel el lolab a tract sel letobed el mo er a beluu. Me sel lesa chad el ua chad el oureor er a stoang e ngmsang a tract me bo longuiu er ngii. A ta el obekel el mlo mesarech er a beluu er a New York City a mle medengei el kmo te mo mesterir a rebetok el kakerous el chad. Me te ngiluu a Nations el babier me a bebil er a tract el ngar er a kakerous el omelekoi. Me sel lerengesii a chad el melekoi a ngodech el omelekoi el olterau a klalo er a tkul a rael me a lechub e te dengchokl er bita er tir me a lechub e te ngar er a blil a blengur, e te mesterir a tract el ngar er a omelekingir.
8. Ngoeak a ngera el rolel e a tract a uai a tane?
8 “Molalem a Dellemelem”: A tract a sebeched el omekesiu er ngii el ua tane. A chad er a sers a omriid a tane e le ngdiak lodengei el kmo ngera er ngii a sebechel el mo duubech. A Olisechakl 11:6 a melekoi el kmo: “Molalem a dellemelem a le tutau e dirrek a le kebesengei. Ng kmal diak modengei el kmo ng mo rokui el di mo ungil a dbechel, ma lechub e a tar a omelalem a kuk mo ungil er a tang.” Me a leuaisei, e bo leblak a rengud el ousbech a tract el omerk a “klemedengei.”—Osi. 15:7.
[Blurb el ngar er a 3 el llel]
A tract a ungil el dousbech el ousioning, me ngmo er ngii a taem e kede mo merous er ngii el omuchel er a Ongeteruich me a Ta el Buil